ورال. 29 اقپان. باتىس قازاقستان وبلىسىندا «جاقسىلىق جاسا» شاراسى اياسىندا جاقىنعا, سونداي-اق, قارتتار مەن جالعىز باستى ادامدارعا كومەك كورسەتۋگە باعىتتالعان بىرقاتار ءىس-شارالار جۇرگىزىلۋدە. بۇل تۋرالى inform.kz-كە سىلتەمە جاساعان egemen.kz ءتىلشىسى حابارلادى.
ورتالىق كوممۋنيكاتسيالار قىزمەتىنىڭ باتىس قازاقستان وبلىستىق فيليالىندا وتكىزىلگەن ءباسپاسوز ءماسليحاتىندا «قامقور» جاستار قوعامدىق بىرلەستىگىنىڭ توراعاسى ادىلەت بەرىكقاليەۆ وسىعان قاتىستى بىرقاتار باستامانىڭ قولعا الىنعانىن اتاپ ءوتتى.
«سونىڭ ىشىندە جاس ۇرپاققا ەگدە جاستاعى ادامداردى قادىرلەۋ, اينالاسىنداعى جاندارعا مەيىرىممەن قاراۋعا ۇندەيتىن «ورىن بەر, سىپايى بول», جالعىزىلىكتى قاريالارعا تۇرمىستا كومەك كورسەتۋگە ورايلاستىرىلعان «ارداگەرلەردى ارداقتايىق!», ەرىكتىلەردىڭ بالالار مەن قارتتار ۇيىنە بارىپ, قايىرىمدىلىق كورسەتۋىنە, مادەني كەشتەردى ۇيىمداستىرۋعا باعىتتالعان شارالاردى ەرەكشە ايتىپ وتكەن ءجون», – دەدى ادىلەت بەرىكقاليەۆ.
سونداي-اق, ءباسپاسوز ءماسليحاتىنا قاتىسقان وبلىستىق بالالار ءۇيىنىڭ ديرەكتورى رايسا ناۋرىزوۆا ايتىپ وتكەندەي, سوڭعى ۋاقىتتا وبلىستىق بالالار ۇيىنە جەتكىلىكتى دەڭگەيدە قارجى ءبولىنىپ, ۇكىمەت بارلىق بالالاردى تولىعىمەن ءوز قامقورلىعىنا الىپ وتىر. «نەگىزىنەن ۇكىمەتتىڭ, ءبىزدىڭ ۇجىمنىڭ ماقساتى – بالالاردى ۇيگە جىبەرۋ. بالالار جۇرەك جىلۋلىعىن سەزىنىپ, ءۇي تاربيەسىن كورىپ وسسە دەيمىز. 2015 جىلى پاتروناتتىق تاربيەگە 38 بالا جىبەرىلدى. بيىل ازداۋ, ازىرگە ءتورت بالانى پاتروناتتىق تاربيەگە ازىرلەپ جاتىرمىز. جالپى 17-18 جاستاعى بالالاردى پاتروناتتىق تاربيەگە بەرۋ قيىنداۋ. ءوسىپ كەتكەن بالالاردى ەشكىم العىسى كەلمەيدى. بالالار ۇيىندەگىلەردىڭ جاسى – 3-تەن 18-گە دەيىنگىلەر. ولاردىڭ كوبىن ءوزىمىز ءوسىرىپ, مەكتەبىن بىتىرگەننەن كەيىن جوعارى وقۋ ورنىنا تۇسۋىنە بارىنشا جاعداي جاسايمىز», – دەيدى بالالار ءۇيىنىڭ باسشىسى.
تەمىر قۇسايىن.
دەرەك, سۋرەت: inform.kz.