كەشە پرەزيدەنت جانىنداعى ورتالىق كوممۋنيكاتسيالار قىزمەتىندە ەل ەكونوميكاسىنا ينۆەستيتسيالار تارتۋ شارالارى تۋرالى ءباسپاسوز ءماسليحاتى ءوتتى. وعان «قازىنا كاپيتال مەنەدجمەنت» اق وكىلدەرى قاتىستى.
«بايتەرەك ۇبح»-نىڭ ءجۇز پايىز ەنشىلەس ۇيىمى بولىپ تابىلاتىن «قازىنا كاپيتال مەنەدجمەنت» اق باسقارما توراعاسى الماس اعىباەۆ پەن باسقارما توراعاسىنىڭ ورىنباسارى داۋرەن وڭاەۆ اتالعان كومپانيانىڭ ەل ەكونوميكاسىنا قۇيعان ينۆەستيتسيالارىنىڭ كولەمى جايىندا ايتىپ بەردى.
«قازىنا كاپيتال مەنەدجمەنت» اق سوڭعى جىلدارى شەتەلدىك سەرىكتەستەرمەن بىرلەسىپ قازاقستاندا تىكەلەي ينۆەستيتسيالار نارىعىن دامىتۋمەن بەلسەندى اينالىسىپ كەلەدى. قازىرگى تاڭدا جالپى قورجىندا 13 تىكەلەي ينۆەستيتسيالار قورى, سونىڭ ىشىندە قازاقستانعا 300 ملرد. تەڭگەگە جۋىق ينۆەستيتسيا سالاتىن مىندەتتەمەسى بار 10 بەلسەندى قور بار», دەدى ا.اعىباەۆ.
«قازىنا كاپيتال مەنەدجمەنت» اق پرەزيدەنتتىڭ باستاماسى بويىنشا 2007 جىلدىڭ مامىرىندا قۇرىلعان بولاتىن. ونىڭ نەگىزگى قىزمەتى قازاقستاندا تىكەلەي ينۆەستيتسيالاردىڭ ءتيىمدى نارىعىن دامىتۋعا ىقپال ەتۋ. «قازىنا كاپيتال مەنەدجمەنت» اكتسيونەر رەتىندە مەملەكەتارالىق قورلارعا قاتىسادى. 2013 جىلدىڭ تامىزىنان بەرى «قازىنا كاپيتال مەنەدجمەنت» اق «بايتەرەك» كومپانيالار توبىنىڭ قۇرامىندا.
2015 جىلى قورلارعا سالىناتىن «قازىنا كاپيتال مەنەدجمەنت» ينۆەستيتسيالارى 27 ملرد. تەڭگەنى قۇراسا, 2007 جىلدان باستاعاندا «قازىنا كاپيتال مەنەدجمەنت» قىزمەتىنىڭ بۇكىل كەزەڭىندەگى بارلىق ينۆەستيتسيالاردىڭ 35 پايىزىن قۇرادى. وسى 2015 جىلعى ينۆەستيتسيالاردىڭ باسىم ۇلەسى قازاقستاندىق جوبالىق كومپانيالارعا سالىندى. ياعني, بارلىعى 12 جوباعا ينۆەستيتسيا سالىنسا, سونىڭ ىشىندە 10 جوباعا قازاقستاندا ينۆەستيتسيا سالىندى. سونىڭ ناتيجەسىندە قكم ينۆەستيتسيالىق قورجىنىنداعى قازاقستاندىق جوبالاردىڭ ۇلەسى 65 پايىزدان استى.
«اتقارىلعان جۇمىستاردىڭ سوڭعى ەكى جىلىندا باسقارۋشى حولدينگتىڭ قازاقستان ينفراقۇرىلىمدىق قورى, Baiterek Venture Fund, Almex-Baiterek Fund سەكىلدى جالپى مولشەرى 42 ملرد. تەڭگە بولاتىن قورلار قۇرۋ باستاماسىن ىسكە اسىردىق. بارلىق ستراتەگيالىق پورتفەل ىشىنەن اتالعان قورلاردىڭ ۇلەسى ۇشتەن ءبىرىن قۇرايدى», دەدى كومپانيا باسشىسى.
«قازىنا كاپيتال مەنەدجمەنت» اق-قا قاتىساتىن قورلار قىزمەت كەزەڭىندە جالپى سوماسى 1 ملرد. 83 ملن. دوللار بولاتىن 56 جوبانى قارجىلاندىرعان. 2016 جىلى كومپانيا قازاقستاندىق ينفراقۇرىلىم قورىن ايماقتىق كولەمدە كەڭەيتۋگە, سونداي-اق, قازاقستاندىق جوبالارعا ينۆەستيتسيا سالۋدىڭ جوعارى قارقىنىن ارتتىرۋعا قاتىستى جۇمىستاردى جالعاستىرۋدى جوسپارلاپ وتىر.
دينارا بىتىكوۆا,
«ەگەمەن قازاقستان».