كەشە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا العىس ايتۋ كۇنىنە ارنالعان شاراعا قاتىسقان نۇرسۇلتان نازارباەۆ 1 ناۋرىز تاعى ءبىر تاريحي ءسات – «نۇر وتان» پارتياسىنىڭ قۇرىلعان كۇنى ەكەنىن اتاپ ءوتتى.
بۇل ورايدا, مەملەكەت باسشىسى: «مەن بارشاڭىزدى وسى ايشىقتى كۇنمەن قۇتتىقتايمىن. «نۇر وتان» 17 جىلدا ءۇلكەن جولدى ءجۇرىپ ءوتتى. ءبىزدىڭ پارتيامىزدىڭ ساياسي كوشباسشىلىعى بارلىق قازاقستاندىق ماقتان تۇتاتىن ناقتى جەتىستىكتەرگە اينالدى. قازىر پارتيا الدىندا ايرىقشا ماڭىزدى مىندەتتەر تۇر. تاياۋدا وتكەن ۇكىمەتتىڭ كەڭەيتىلگەن وتىرىسىندا مەن قولجەتىمدى باسپانا, جول, ەلەكتر ستانسالارىنىڭ قۇرىلىستارىنا, ءاربىر كەنتتەگى نىسانداردى جوندەۋ جۇمىستارىنا ەلەۋلى قاراجات ءبولۋ تۋرالى مالىمدەدىم. وسىنىڭ ءبارى ادامدار ءۇشىن جاسالۋدا, ولار جۇمىسقا تارتىلادى. وسى قىزمەتتىڭ ءبارىن «نۇر وتان» جۇرگىزەتىن بولادى. ءاربىر قازاقستاندىقتىڭ يگىلىگىنە باعىتتالعان, جۇرگىزىلىپ جاتقان رەفورمالار مەن باعدارلامالاردىڭ ءمانىن ءاربىر ادامعا تۇسىندىرە الامىز دەپ ۇمىتتەنەمىن», – دەدى.
قازاقستان پرەزيدەنتى قازىر «نۇر وتان» پارتياسى ءماجىلىس سايلاۋى بويىنشا سايلاۋ ناۋقانىن جۇرگىزىپ جاتقانىنا نازار اۋداردى. «بۇل – مەملەكەتتىڭ بارشانى ۇيىستىرىپ, قازاقستانىمىزدىڭ وركەندەۋىنە جۇمىلدىرىپ وتىرعان ناعىز باستى ساياسي كۇشى ەكەنىنە سەنىمدىمىن. سايلاۋ ناۋقانى اياسىندا تەك ۇگىت-ناسيحات قانا ەمەس, تۇعىرنامانى تانىستىرۋ دا ءجۇرىپ جاتىر. پارتيانىڭ ءوزى جاڭارىپ, جاڭا جاقتاستارمەن تولىعۋدا. ءبىزدىڭ قاتارىمىزعا قازاقستاننىڭ جاڭا ازاماتتارى قوسىلىپ وتىرعانىنىڭ ءمانى زور», – دەدى نۇرسۇلتان نازارباەۆ.
قازاقستان پرەزيدەنتى ءراسىم بارىسىندا «نۇر وتاننىڭ» جاڭا مۇشەلەرىنە پارتيا بيلەتتەرىن تاپسىردى. نۇرسۇلتان نازارباەۆ ولاردىڭ ءبارىن ءومىر جولىنداعى جاڭا كەزەڭدەرىمەن قۇتتىقتاپ, مىقتى دەنساۋلىق پەن يگىلىك تىلەدى. «بۇل – سىزدەر ءۇشىن ساياسي سالاداعى جاڭا جولدىڭ باسى. سىزدەر حالىقتىڭ يگىلىگىنە باعىتتالعان پارتيانىڭ يدەيالارى مەن وي-تۇجىرىمدارىن جەتكىزۋشىلەر بولاسىزدار. سىزدەر ءوز ەنتۋزيازمدارىڭىزبەن جانە ءوز حالقىڭىزعا پايداسىن تيگىزۋگە دەگەن نيەتتەرىڭىزبەن ادامداردىڭ جۇرەگىنە جىگەر بەرۋگە تيىسسىزدەر. بۇگىن پارتياعا ءتۇرلى ەتنوستاردىڭ وكىلدەرى كىرىپ وتىرعانىنىڭ دا تەرەڭ سيمۆولدىق ءمانى بار», – دەدى نۇرسۇلتان نازارباەۆ.
نۇرسۇلتان نازارباەۆ «نۇر وتاننىڭ» بارلىق بەلسەندىلەرىن ەلىمىزدىڭ تاۋەلسىزدىگىنىڭ 25 جىلدىعىن تىڭ تابىستارمەن جانە جاسامپاز وزگەرىستەرمەن قارسى الۋعا شاقىردى. «ەڭ الدىمەن «شاعىن ىستەر» – ءاربىر قالا مەن اۋىلدى, جولداردى, مادەنيەت نىساندارىن اباتتاندىرۋ جايىن ەستە ۇستاۋ كەرەك. ءاربىر ەلدى مەكەن جۇمىس پەن دەمالىس ءۇشىن تازا, جايلى بولا ءتۇسۋى ءتيىس. 25 جىلدىق مەرەكە دەگەنىمىز وسى. بارلىق قالا مەن ەلدى مەكەندەردە اۋماقتى تازارتۋ مەن كوگالداندىرۋ, بالالار ۇيلەرىنە, ەگدە ادامدارعا, مۇقتاج جاندارعا كومەكتەسۋ جۇمىستارى جۇرگىزىلۋى كەرەك», – دەدى قازاقستان پرەزيدەنتى.
مەملەكەت باسشىسى بۇدان بەس جىل بۇرىن, تاۋەلسىزدىكتىڭ 20 جىلدىعى بەلەسىندە «اۋىلدى كوركەيتۋ – قازاقستاندى كوركەيتۋ» جوباسى ىسكە اسىرىلعانىن ەسكە سالدى جانە بيىل دا بۇكىل ەلدە ءدال سونداي پاتريوتتىق اكتسيا وتكىزۋگە شاقىردى. «ەلىمىز حالقىنىڭ جارتىسىنا جۋىعى اۋىلدىق جەرلەردە تۇرادى. بۇگىندە ءبىزدىڭ بۇكىل تابىسىمىزدىڭ قوزعاۋشى كۇشىنە اينالاتىن ەلدىڭ اگرارلىق سەكتورىن دامىتۋعا بارلىق مۇمكىندىك بار. مۇنى «نۇر وتانعا» جانە پارتيانىڭ ءاربىر مۇشەسىنە مەنىڭ تىكەلەي تاپسىرمام دەپ ساناڭىزدار», – دەدى نۇرسۇلتان نازارباەۆ.
بۇدان كەيىن قازاقستان پرەزيدەنتى ناۋرىز مەيرامى قارساڭىندا ءماجىلىس پەن ءماسليحاتتار سايلاۋلارى وتەتىنىنە, بيلىكتىڭ بۇكىل وكىلدى تارماعى قايتا سايلاناتىنىنا نازار اۋداردى. «مەن بارشا قازاقستاندىققا الداعى سايلاۋ ءبىزدىڭ جاڭارۋىمىزدىڭ, الدا تۇرعان بارلىق مىندەتتەرىمىزدىڭ ورىندالۋىنىڭ جاڭا كەزەڭىنىڭ باسى بولۋىنا تىلەكتەستىگىمدى بىلدىرگىم كەلەدى», – دەدى مەملەكەت باسشىسى.
ءلايلا ەدىلقىزى,
«ەگەمەن قازاقستان».
«نۇر وتان» پارتياسىنىڭ
سايلاۋ قورى قاراجاتىنىڭ ەسەبىنەن تولەندى.تاپسىرىس بەرۋشى: ف.ش.قۋانعانوۆ.