استانا. 1 ناۋرىز. قازاقستاننىڭ بىرقاتار وڭىرىندە اتموسفەرالىق فرونتتاردىڭ وتۋىنە بايلانىستى كۇن قۇبىلمالى بولادى. بۇل تۋرالى «قازگيدرومەتكە» سىلتەمە جاساعان egemen.kz ءتىلشىسى حابارلادى.
پاۆلودار وبلىسىنىڭ كەي جەرلەرىندە تۇمان ءتۇسىپ, كوكتايعاق, بۇرقاسىن بولادى. جەلدىڭ جىلدامدىعى سەكۋندىنا 15-20 مەترگە دەيىن جەتەدى. سولتۇستىك قازاقستان, اقمولا, قوستاناي وبلىستارىنىڭ كەي ايماقتارىندا تۇماندى اۋا رايى تىركەلىپ, كوكتايعاق, جاياۋ بۇرقاسىن بولادى. اۋا تەمپەراتۋراسى -12-20 گرادۋسقا دەيىن بارۋى مۇمكىن. تۇندە جانە تاڭەرتەڭ سەكۋندىنا 15-20 مەتر جىلدامدىقپەن جەل سوعادى.
شىعىس قازاقستان وبلىسىنىڭ كەي جەرلەرىندە تۇمان, كوكتايعاق بولۋى مۇمكىن. سونداي-اق, اۋا تەمپەراتۋراسى -27 گرادۋسقا دەيىن بارادى. ال جامبىل, قىزىلوردا, ماڭعىستاۋ, اتىراۋ, باتىس قازاقستان, اقتوبە وبلىستارىنىڭ كەي جەرلەرىندە تۇمان بولادى دەپ كۇتىلەدى.
وڭتۇستىك قازاقستان, الماتى وبلىستارىنىڭ كەي ايماقتارىندا جەلدىڭ جىلدامدىعى سەكۋندىنا 15-20 مەترگە دەيىن جەتەدى.
ايان ءابدۋالي.
دەرەك: «قازگيدرومەت».
سۋرەت: misanec.ru.