پارلامەنت سەناتىنىڭ توراعاسى قاسىم-جومارت توقاەۆ استاناعا جۇمىس بابىنداعى ساپارمەن كەلگەن ۇلىبريتانيا لوردتار پالاتاسىنىڭ مۇشەسى بارونەسسا پاتريتسيا دجانەت سكوتلاند استالسكايامەن كەزدەستى, دەپ حابارلادى سەناتتىڭ ءباسپاسوز قىزمەتى.
ق.توقاەۆ كەزدەسۋ بارىسىندا پ.سكوتلاندتى بيىلعى جىلى ساۋىردەن باستاپ قىزمەتكە كىرىسەتىن بريتانيا ۇلتتار دوستاستىعى ۇيىمىنىڭ باس حاتشىسى لاۋازىمىنا سايلانۋىمەن قۇتتىقتادى. ق.توقاەۆ وتكەن جىلى قاراشادا پرەزيدەنت نۇرسۇلتان نازارباەۆتىڭ لوندونعا رەسمي ساپارى بارىسىندا قول جەتكەن جانە كەلىسىمدەرمەن بەكىتىلگەن قازاقستان مەن ۇلىبريتانيا اراسىنداعى ارىپتەستىكتىڭ ستراتەگيالىق سيپاتىن اتاپ ءوتتى. سەنات باسشىسى قازاقستان پارلامەنتىنىڭ قىزمەتى تۋرالى اڭگىمەلەپ, بريتانيا پارلامەنتىمەن ءوزارا تىعىز ءىس-قيمىلدى دامىتۋعا مۇددەلىلىگىن اتاپ ءوتتى.
پ.سكوتلاند قازاقستاندا تاۋەلسىزدىك العاننان كەيىنگى جىلداردا جۇزەگە اسقان دامۋ مەن جاڭارۋلاردىڭ قارقىنىن جوعارى باعالادى. «ءبىز قيىن زاماندا ءومىر ءسۇرىپ جاتىرمىز. دەگەنمەن, پرەزيدەنت ن.نازارباەۆ ۇلتتى ۇيىستىرىپ, رەفورمالاردى العا جىلجىتا الدى. اسىرەسە, قازاقستاندا قىلمىستىق جانە ازاماتتىق سوت تورەلىگى سالاسىندا اتقارىلعان ۇلكەن جۇمىستى ەرەكشە اتاپ وتكىم كەلەدى», – دەدى بۇرىن انگليا جانە ۋەلستىڭ باس پروكۋرورى, سولتۇستىك يرلانديانىڭ باس ادۆوكاتى قىزمەتىن اتقارعان پ.سكوتلاند. دامۋ سالاسىنداعى الدىڭعى قاتارلى حالىقارالىق ينستيتۋتتار ۇزاق مەرزىمدى تۇراقتىلىقتى قامتاماسىز ەتۋ ءۇشىن الەۋمەتتىك كاپيتالعا ينۆەستيتسيالار قاجەت ەكەنىن ايتادى, بۇل ورايدا قازاقستان وڭ قادامداردى دايەكتى جۇزەگە اسىرىپ كەلەدى, دەدى ول.
سونداي-اق, مەيمان ۇلتتار دوستاستىعى مەن تاۋەلسىز مەملەكەتتەر دوستاستىعى جانە باسقا دا ءىرى حالىقارالىق ۇيىمداردىڭ اراسىنداعى ىنتىماقتاستىقتى نىعايتۋدى قولدايتىنىن ءبىلدىردى.