اتىراۋ. 29 اقپان. اتىراۋ وبلىسىنىڭ قۇرمانعازى اۋداندىق سوتى رەسەيدە كوشى-قون زاڭدارىن بۇزىپ, قازاقستان اۋماعىنا زاڭسىز كىرگەن وزبەكستان ازاماتىنا ايىپپۇل سالىپ, ەلدەن شىعارۋ جازاسىن تاعايىندادى. بۇل تۋرالى اتىراۋ وبلىستىق سوتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
وزبەكستان ازاماتى ج.كاريموۆ بيىلعى قاڭتاردا رەسەي فەدەراتسياسى جاعىنان اتىراۋ وبلىسىنىڭ قۇرمانعازى اۋدانىنداعى قيعاش اۋىلى تۇسىنداعى شەكارانىڭ سىم قورشاۋىنىڭ استىمەن قازاقستان رەسپۋبليكاسىنىڭ اۋماعىنا وتۋگە ارەكەت جاساعان. سول كەزدە ونى ەلىمىزدىڭ شەكاراشىلارى ۇستاعان. مۇنى ج.كاريموۆتىڭ ءوزى دە تولىق مويىنداپتى. ول ءوزىنىڭ مۇنداي زاڭسىز ارەكەتكە بارۋىنا رەسەي فەدەراتسياسىندا كوشى-قون زاڭدارىن بۇزعانى, سول ءۇشىن وزىنە رەسەيدەن شىعارۋ قاتەرى تونگەنىن ايتقان. شاراسى تاۋسىلعان وزبەكستاندىق امالسىز شەكارا بەكەتىن اينالىپ ءوتىپ, قازاقستان رەسپۋبليكاسى اۋماعىنا زاڭسىز كىرۋدى كوزدەپتى.
قۇرمانعازى اۋداندىق سوتى ج.كاريموۆتى تاعىلعان ايىپ بويىنشا كىنالى دەپ تانىدى. دەگەنمەن, وزبەكستان ازاماتىنىڭ ەل اۋماعىنا زاڭسىز كىرۋ ارەكەتىنە وكىنۋى مەن قىلمىستىق جاۋاپكەرشىلىككە العاش رەت تارتىلۋى دا ەسكەرىلدى. ءسويتىپ, وعان 500 ايلىق ەسەپتىك كورسەتكىش مولشەرىندە ايىپپۇل سالىنىپ, قازاقستان رەسپۋبليكاسىنىڭ اۋماعىنان 5 جىل مەرزىمگە شىعارۋ جازاسىن قوسا تاعايىندادى.
جولداسبەك شوپەعۇل.
دەرەك: اتىراۋ وبلىستىق سوتىنىڭ ءباسپاسوز قىزمەتى.
سۋرەت: pravdaurfo.ru.