استانا. 26 اقپان. بۇگىن شۆەيتساريانىڭ تسيۋريح قالاسىندا ۋەفا-نىڭ باس حاتشىسى, شۆەيتساريالىق دجانني ينفانتينو ەكىنشى تۋردا حالىقارالىق فۋتبول فەدەراتسياسىنىڭ پرەزيدەنتى بولىپ سايلاندى. بۇل تۋرالى تاسس-قا سىلتەمە جاساعان egemen.kz ءتىلشىسى حابارلادى.
فيفا-نىڭ جاڭا باسشىسى سايلاۋدا 207 داۋىستىڭ 115-نە يە بولدى.
«مەن سايلاۋدىڭ قورىتىندىسىن جانە ورىنتاقتى قابىل الامىن», - دەدى ينفانتينو سايلاۋدان كەيىن.
سايلاۋعا ودان باسقا ازيا فۋتبول كونفەدەراتسياسىنىڭ باسشىسى, باحرەين شەيحى سالمان بەن يبراگيم ءال-حاليفا, يوردانيا حانزاداسى ءالي بەن ءال-حۋسەين, فيفا پرەزيدەنتىنىڭ بۇرىنعى ورىنباسارى جەروم شامپان قاتىستى.
تەگى يتاليان شۆەيتساريالىق ازامات دجانني ينفانتينو فيفا تاريحىنداعى توعىزىنشى پرەزيدەنت بولىپ وتىر, بۇعان دەيىن ۇيىمدى فرانتسۋز روبەر گەرەن (1904-1906), اعىلشىن دەنيەل ۆۋلفولل (1906-1918), فرانتسۋز جيۋل ريمە (1931-1954), بەلگيالىق رۋدولف سەلدرەيەرس (1954-1955), اعىلشىن ارتۋر دريۋري (1955-1961), اعىلشىن ستەنلي روۋز (1961-1974), برازيليالىق جواو اۆەلانج (1974-1998), شۆەيتساريالىق نەمىس يوزەف بلاتتەر (1998-2015) باسقاردى.
فيفا-نىڭ كەلەسى سايلاۋى 2019 جىلى وتەدى. وسىلايشا ينفانتينو ءوزىنىڭ الدىنداعى بلاتتەردىڭ مانداتىن الدى. بۇلاردىڭ سوڭعىسى 2015 جىلعى مامىر ايىندا وسى ورىنتاققا قايتا سايلانعان ەدى. بىراق ۇيىم توڭىرەگىندە كوتەرىلگەن جەمقورلىق جانجالىنا بايلانىستى ارتىنشا قىزمەتىنەن كەتۋگە ءماجبۇر بولدى.
دجانني ينفانتينو 1970 جىلعى 23 ناۋرىزدا شۆەيتساريانىڭ ۆالە كانتونىنداعى بريگ قالاسىندا تۋعان. ۋەفا-دا 2000 جىلدىڭ تامىز ايىنان جۇمىس ىستەي باستادى. 2009 جىلعى قازاندا ۇيىمنىڭ باس حاتشىسى بولىپ تاعايىندالدى. ول ۋەفا پرەزيدەنتى ميشەل ءپلاتينيدىڭ «وڭ قولى» بولدى. ينفانتينو ەۋروپا چەمپيوناتىنىڭ فينالىنا قاتىساتىن قۇرامالار سانىن 16-دان 24-كە دەيىن كوتەرۋدىڭ باستاماشىسى ەدى.
رۋسلان يگىلىك.
دەرەك, فوتو: تاسس.