قىزىلوردا. 24 اقپان. قىزىلوردا وبلىسى مەن G-Global حالىقارالىق حاتشىلىعى اراسىندا جاسىل ەكونوميكانى دامىتۋ, قورشاعان ورتانى قورعاۋ مەن وڭىرگە ينۆەستيتسيا تارتۋ, يننوۆاتسيالىق جوبالاردى بىرلەسىپ جۇزەگە اسىرۋ, «ەكسپو-2017» كورمەسى ارقىلى قىزىلوردا وبلىسىنىڭ ۇزدىك يننوۆاتسيالىق جوبالارىن ناسيحاتتاۋ تۋرالى كەلىسىم جاسالدى. بۇل تۋرالى وبلىستىق اكىمدىكتىڭ ءباسپاسوز قىزمەتىنە سىلتەمە جاساپ egemen.kz حابارلايدى.
«G-Global – ەلباسىنىڭ باستاماسىمەن قۇرىلعان ۇيىم. ونىڭ نەگىزگى ماقساتى حالىقارالىق پروبلەمالاردى تالقىلاپ, ونى شەشۋ جولدارىن قاراستىرۋ. استانا ەكونوميكالىق فورۋمى مەن داعدارىسقا قارسى دۇنيەجۇزىلىك كونفەرەنتسياسى سياقتى اۋقىمدى شارالاردى وتكىزۋگە اتسالىسقان. سوندىقتان بۇگىنگى مەموراندۋم اياسىندا ءبىز دە G-Global حالىقارالىق حاتشىلىعىمەن بىرلەسىپ, ورتاق جوبالاردى جۇزەگە اسىرامىز دەپ سەنەمىن», دەدى وبلىس اكىمى قىرىمبەك كوشەرباەۆ.
«قىزىلوردا وبلىسىندا اتقارىلعان جۇمىستار, جۇزەگە اسىرىلۋى جوسپارلانعان جوبالاردى كورىپ, قۋانىپ وتىرمىن. ەكىجاقتى مەموراندۋمدى جۇزەگە اسىرۋ ءۇشىن ارنايى جول كارتاسى قابىلداناتىن بولادى. ياعني, بىرلەسىپ اتقاراتىن جۇمىسىمىزدى ايقىنداپ الامىز. نەگىزگى ماقساتىمىز – سىر وڭىرىنە ينۆەستيتسيا تارتۋ, «ەكسپو-2017» كورمەسى ارقىلى قىزىلوردا وبلىسىنىڭ ۇزدىك يننوۆاتسيالىق جوبالارىن ناسيحاتتاۋ», دەيدى G-Global حالىقارالىق حاتشىلىعىنىڭ باسشىسى سەرىك نوگەربەكوۆ.
ەرجان بايتىلەس.
دەرەك, سۋرەت: egemen.kz