ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى قازاقستان رەسپۋبليكاسىنىڭ پارلامەنتىندە بولدى, دەپ حابارلادى سەناتتىڭ ءباسپاسوز قىزمەتى.
شارا بارىسىندا بولاشاق زاڭگەرلەر, ساياساتتانۋشىلار مەن الەۋمەتتانۋشىلار جوعارى زاڭ شىعارۋ ورگانىنىڭ عيماراتىنا ساياحات جاساپ, سەنات پەن ءماجىلىستىڭ وتىرىس زالدارىندا, بىرلەسكەن وتىرىس زالىندا, حالىقارالىق كەزدەسۋ زالىندا, ءباسپاسوز ورتالىعىندا, كىتاپحانادا بولدى, جۇمىس ورگاندارىنىڭ قىزمەتىمەن تانىستى.
ساياحات بارىسىندا سەنات پەن ءماجىلىس اپپاراتتارىنىڭ قىزمەتكەرلەرى قوس پالاتالى پارلامەنتتىڭ تاريحىمەن تانىستىردى. وسىدان ءدال 20 جىل بۇرىن, 1996 جىلعى 30 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پارلامەنتتىڭ العاشقى وتىرىسىن اشقان بولاتىن. ستۋدەنتتەرگە ءتۇرلى شاقىرىلىمداعى دەپۋتاتتاردىڭ قىزمەتى تۋرالى اڭگىمەلەنىپ, شەتەلدىك پارلامەنتتىك دەلەگاتسيالاردىڭ ەستەلىك سىيلىقتارىنىڭ كورمەسى كورسەتىلدى.
پارلامەنتتە بولعان كەزدەرىندە ستۋدەنتتەر سەنات دەپۋتاتى بىرعانىم ءايتىموۆامەن كەزدەسىپ, قازاقستان پارلامەنتاريزمىنىڭ دامۋى تۋرالى لەكتسياسىن تىڭدادى, سونداي-اق, زاڭ شىعارۋ جۇمىستارىنىڭ ەرەكشەلىكتەرى مەن كەيبىر قۇقىقتىق اكتىلەردىڭ مازمۇنى تۋرالى قويىلعان ساۋالدارعا جاۋاپ الدى.