كەشە ەۋرازيا ۇلتتىق ۋنيۆەرسيتەتىندە ءبىلىم جانە عىلىم مينيسترى اسلان ءسارىنجىپوۆتىڭ قاتىسۋىمەن «جوعارى وقۋ ورنىنىڭ ۇزدىك وقىتۋشىسى – 2015» يەگەرلەرىن ماراپاتتاۋ ءراسىمى ءوتتى.
رەسپۋبليكالىق كونكۋرستا بەس جىلدان كەم ەمەس ۇزدىكسىز عىلىمي-پەداگوگيكالىق ءوتىلى بار قازاقستاندىق جوعارى وقۋ ورىندارىنىڭ وقىتۋشىلارى باق سىناعان. سايىستىڭ العاشقى كەزەڭى جوعارى وقۋ ورنىندا ىرىكتەۋ تۇرىندە وتسە, ال ەكىنشىسى رەسپۋبليكالىق دارەجەدە جالعاستى.
جەڭىمپازداردى ءبىلىم جانە عىلىم مينيسترلىگى, سونىمەن قاتار, جەتەكشى عالىمدار مەن مامانداردان قۇرالعان كوميسسيا انىقتادى.
جەڭىمپازداردى انىقتاۋدا باسا نازار اۋدارىلعان ولشەمدەر – وقۋ قۇرالدارى مەن وقىتۋدىڭ يننوۆاتسيالىق تەحنولوگيالارىن يگەرۋ, ينتەراكتيۆتى رەجىمدە اشىق ساباق جۇرگىزۋ, ستۋدەنتتەردىڭ عىلىمي-زەرتتەۋ جانە شىعارماشىلىق جۇمىستارىنا جەتەكشىلىك ەتۋ, وقىتۋ ساپاسىن ۇيىمداستىرۋ جانە تاربيە جۇمىستارى, اكادەميالىق, عىلىمي دارەجەنىڭ نەمەسە اتاقتىڭ بولۋى, عىلىمي-زەرتتەۋلەرى مەن جەتىستىكتەرى, عىلىمي جانە عىلىمي-پەداگوگيكالىق كادرلاردى دايارلاۋ.
جەڭىمپازدارعا كۋالىك جانە 200 ايلىق ەسەپتىك كورسەتكىش كولەمىندە مەملەكەتتىك گرانت تولەنەدى. «جوعارى وقۋ ورنىنىڭ ۇزدىك وقىتۋشىسى – 2015» گرانتىن تولەۋگە رەسپۋبليكالىق بيۋدجەتتەن 848 ملن. 400 مىڭ تەڭگە قاراستىرىلعانىن دا ايتا كەتكەن ارتىق بولماس.
سونداي-اق, گرانت يەگەرلەرى جىل بويى عىلىمي-زەرتتەۋ تاقىرىبى مەن وقۋ ۇدەرىسىن ۇيىمداستىرۋ ماسەلەلەرى بويىنشا حالىقارالىق, رەسپۋبليكالىق عىلىمي كونفەرەنتسيالاردىڭ, سيمپوزيۋمداردىڭ, كونگرەستەردىڭ جۇمىستارىنا قاتىسا الادى.
بۇل گرانت مەملەكەت باسشىسى ن.نازارباەۆتىڭ تاپسىرماسى بويىنشا 2005 جىلى تاعايىندالعان بولاتىن. 2015 جىلى ەلىمىزدىڭ 61 جوعارى وقۋ ورنىنان 200 ادام وسى گرانتتىڭ يەگەرى اتاندى. بۇلاردىڭ 42 پايىزىن عىلىم دوكتورلارى, 53,5 پايىزىن پروفەسسورلار, ال 4 پايىزىن PhD دوكتورلارى قۇرايدى.
راۋان قايدار,
«ەگەمەن قازاقستان».