جاڭا جىلدا قاي ەڭبەك ۇجىمى دا وتكەندى قورىتىندىلاپ, الداعى كۇندەرگە اسقاق مۇراتتار مەن ۇلكەن ۇمىتتەر بەلگىلەيتىنى بەلگىلى. ونىڭ ۇستىنە قوي جىلى تاريحي وقيعالار مەن اتاۋلى مەرەكەلەرگە تولى بولدى. مىنە, دوستىق ۇيىندە وسىنداي ماقساتتا وتكىزىلگەن قازاقستان حالقى اسسامبلەياسىنىڭ 20 جىلدىعىن قورىتىندىلاۋعا ارنالعان جيىنعا ەتنومادەني بىرلەستىكتەر مۇشەلەرى, ەڭبەك ارداگەرلەرى, باق وكىلدەرى, قالا جۇرتشىلىعى بەلسەندى قاتىستى.
القالى جيىندا الدىمەن ءسوز العان وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى جولداس ءنۇرشيننىڭ بايانداۋىنشا, مەرەيتويعا وراي وبلىسىمىزدا 1725 شارا ۇيىمداستىرىلعان. «مىڭ بالا» رەسپۋبليكالىق مادەني-اعارتۋشىلىق جوباسى اياسىندا وتكىزىلگەن شارالارعا 600 بالا قاتىسقان, ال مەملەكەتتىك ءتىلدى وقىتۋ كۋرستارىنان 300-دەن استام بالا ساباق العان, «مەنىڭ قازاقستانىم» ۇگىت پويىزىنىڭ حرومتاۋ جانە قاندىاعاش قالالارىنا ساپارلارى بارىسىندا «20 ىزگى ءىس» ەستافەتاسى بويىنشا كوپتەگەن قايىرىمدىلىق ىستەر ۇيىمداستىرىلعان. جىلدىڭ ەرەكشە وقيعالارىنىڭ ءبىرى رەتىندە العا اۋدانىنداعى بولگاركا اۋىلىندا ەتنوگرافيالىق مۋزەي-ءۇيدىڭ اشىلۋىن ايتۋعا بولادى.
وبلىستىق انالار كەڭەسىنىڭ ءتورايىمى نادەجدا ستەپانەنكو اقتوبەدە كوپ بالالى انالاردىڭ ونەگەسى جونىندە دەرەكتى فيلمدەر تۇسىرىلەتىنىن جەتكىزسە, «مىڭ بالا» بايقاۋىنىڭ «جاس شەشەندەر مەكتەبى» اتالىمىنىڭ جۇلدەگەرى گۇلنار ءابىلوۆا: «مەن – ازەربايجان قىزىمىن. اقتوبەدەگى №19 مەكتەپتە وقيمىن. ءبىزدىڭ مەكتەبىمىزدە ءتۇرلى ۇلتتىڭ بالالارى وقيدى, ءبىز ءبىر-بىرىمىزبەن قازاق تىلىندە سويلەسەمىز», – دەدى.
جيىندا ءسوز العان وبلىس اكىمى بەردىبەك ساپارباەۆ تاۋەلسىزدىكتىڭ العاشقى 24 جىلىندا جەتكەن جەتىستىكتەرىمىزدىڭ ءبارى دە ەلىمىزدەگى ىنتىماقتىڭ, بىرلىكتىڭ ارقاسى ەكەنىن ەلباسىمىز ۇدايى ايتىپ كەلە جاتقانىن ايرىقشا اتاپ ءوتتى. ءبىزدىڭ مەملەكەتتە سانداعان ۇلتتىڭ وكىلدەرى تۇرىپ جاتقانىمەن, وسى جىلدار ىشىندە ۇلتارالىق قاقتىعىستار, تۇسىنىسپەۋشىلىكتەر بولماعانىن, كەرىسىنشە, الەمگە ىنتىماعى جاراسقان ەل رەتىندە تانىلعانىمىزدى, قانداي قيىندىقتاردى دا اۋىزبىرشىلىكتىڭ ارقاسىندا جەڭىپ شىققانىمىزدى جەتكىزدى. ءوڭىر باسشىسى وسى ىنتىماق-بىرلىكتى نىعايتا تۇسۋگە ەتنومادەني بىرلەستىكتەردىڭ باسشىلارى مەن مۇشەلەرىنىڭ ەرەكشە ۇلەس قوسىپ وتىرعانىن ايتىپ, ولارعا ءوز ريزاشىلىعىن ءبىلدىردى.
جيىن سوڭى مەرەكەلىك كونتسەرتكە ۇلاستى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.