استانا. 5 قاڭتار. بۇگىن الماتىدا 70 جاسقا قاراعان شاعىندا بەلگىلى اكتەر, قازاقستاننىڭ ەڭبەك سىڭىرگەن مادەنيەت قايراتكەرى جانە قازاقستاننىڭ ەڭبەك سىڭىرگەن ءارتىسى مەڭتاي وتەپبەرگەنوۆ قايتىس بولدى. بۇل تۋرالى «قازاقفيلم» كينوستۋدياسىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
مەڭتاي وتەپبەرگەنوۆ 1946 جىلى 7 تامىزدا شىعىس قازاقستان وبلىسىنىڭ بەسقاراعاي اۋدانىنا قاراستى بەگەن اۋىلىندا تۋعان. ماسكەۋ تسيرك ۋچيليششەسىن, سونداي-اق, 1974 جىلى سەرگەي گەراسيموۆ اتىنداعى بۇكىلرەسەيلىك مەملەكەتتىك كينەماتوگرافيا ينستيتۋتىنىڭ (ۆگيك) اكتەرلىك فاكۋلتەتىن بىتىرگەن.
مەڭتاي سماعۇل ۇلى كسرو ەلدەرىنىڭ 13 كينوستۋدياسىندا 60 كارتيناعا تۇسكەن. كينوتۋىندىلاردا 17 ۇلتتىڭ وكىلى رەتىندە وينادى. ودان بولەك, انيماتسيالىق فيلمدەرگە دۋبلياج جاسادى. ول «بەلىي شامان», «تاينى مادام ۆونگ», «چاستنىي دەتەكتيۆ, يلي وپەراتسيا «كووپەراتسيا», «ينتەردەۆوچكا», «نا دەريباسوۆسكوي حوروشايا پوگودا, يلي نا برايتون بيچ وپيات يدۋت دوجدي», «رەكەتير» سىندى فيلمدەردە ءارتۇرلى وبرازداردى سومدادى.
سونىمەن قاتار, مەڭتاي سماعۇل ۇلىنىڭ ەسىمى قازاقستاندا پانتوميمو ونەرىن قالىپتاستىرۋشى رەتىندە تاريحقا جازىلعانىن اتاپ وتكەن ءجون. اكتەردى جەرلەۋ ءراسىمى 7 قاڭتار كۇنى وتەدى.
ەلامان قوڭىر.
دەرەك: «قازاقفيلم» كينوستۋدياسىنىڭ ءباسپاسوز قىزمەتى.
سۋرەت: kruto.me.