كوكشەتاۋ. 5 قاڭتار. استانا قالاسىندا اقمولا وبلىسىنىڭ مادەني ومىرىندەگى ەرەكشە وقيعا بولدى. قازاقستان رەسپۋبليكاسىنىڭ تۇڭعىش پرەزيدەنتى مۋزەيىنە وبلىستىڭ سيمۆولدىق «تاريحي ساندىعى» تابىس ەتىلدى. بۇل تۋرالى egemen.kz ءتىلشىسى حابارلادى.
بۇل شارا مادەنيەت جانە سپورت مينيسترلىگى مەن وبلىس اكىمدىگىنىڭ قولداۋىمەن, قازاق حاندىعىنىڭ 550 جىلدىعىنا ارنالعان «عاسىرلار اماناتى» رەسپۋبليكالىق اكتسياسى شەڭبەرىندە جۇزەگە اسىرىلدى.
وبلىستىق مادەنيەت باسقارماسىنىڭ باسشىسى ساۋلە بۋرباەۆا بۇل تاعلىمدى ءىس جىل بويى اتقارىلعان ۇلكەن جۇمىستىڭ قۋانىشتى قورىتىندىسى ەكەندىگىن ايتادى. مەرەكەلىك جىلدىڭ ماۋسىم ايىندا كوكشەتاۋدا حالىقارالىق مۋزەي فەستيۆالى وتكىزىلدى. وندا يتاليا, ۆەنگريا, رەسەي عالىمدارىنىڭ قاتىسۋىمەن «مۋزەيلەر جادىگەرلەرىندەگى قازاق حاندىعىنىڭ تاريحى» اتالاتىن عىلىمي-پراكتيكالىق كونفەرەنتسيا ۇيىمداستىرىلدى.
سول كۇنى ەلىمىزدىڭ بارلىق مۋزەيلەرى قىزۋ قولداعان «عاسىرلار اماناتى» رەسپۋبليكالىق اكتسياسى جۇمىسىن باستادى. اكتسيا بارىسىندا, وبلىستا جوعارىدا اتالعان «تاريحي ساندىق» جابدىقتالىپ, وعان قازاق, ورىس, اعىلشىن تىلىندەگى كوپتارماقتى فوتو-بەينە البوم جانە تاريحي دەرەكتەرگە نەگىزدەلگەن قىسقا مەتراجدى فيلمدەر ديسكىلەرى توپتاستىرىلدى.
استانا قالاسى قاۋىمداستىعىنىڭ, قازاقستان رەسپۋبليكاسى پارلامەنتى دەپۋتاتتارىنىڭ قاتىسۋىمەن وتكەن «تاريحي ساندىقتىڭ» تانىستىرىلىمىنا جينالعاندار اقمولا وبلىسى مۋزەيلەرىندە دايىندالعان قىسقا مەتراجدى فيلمدەرگە ايرىقشا قىزىعۋشىلىق تانىتتى. مۇنداعى بەلگىلى تاريحي تۇلعالاردى شاحمەت قۇسايىنوۆ اتىنداعى وبلىستىق قازاق مۋزىكالىق-دراما تەاترىنىڭ اكتەرلەرى سومداعان بولاتىن. سونداي-اق, ابىلاي حان, ۇمبەتاي جىراۋ جانە قاناي بي بەينەلەرىنە ارنالعان كورىنىستەر حان ورداسى – بۋرابايدا, بوگەنباي باتىر – ەرەيمەنتاۋدا, اقان سەرى – كوكشەتاۋ مەن ايىرتاۋدا, تاريحي وقيعالاردى جاڭعىرتۋشى جەرلەس جازۋشى ءىلياس ەسەنبەرلين ءوزى تۋعان اتباساردا تۇسىرىلگەنى تانىمدىق ارقاۋدى كۇشەيتە تۇسەدى. قۇندى جادىگەرلەر قاتارىندا ابىلاي حان تاعى, بوگەنبايدىڭ دۋلىعاسى, ساققۇلاق ءبيدىڭ كىلەمى, قاناي ءبيدىڭ ساپتاياعى, اقان سەرىنىڭ ادالباقانى, ءىلياس ەسەنبەرلين شىعارمالارىنىڭ قولجازبالارى, قازاق حاندارىنىڭ شەجىرەسى جانە باسقا دۇنيەلەر بار.
باقبەرگەن امالبەك.
دەرەك, سۋرەت: egemen.kz