پەتروپاۆل. 5 قاڭتار. «قازپوشتا» اق-نىڭ «اياز اتاعا حات جاز» جوباسى اياسىندا ۇيىمداستىرىلعان اكتسيا بارىسىندا وتباسىلىق ۇلگىدەگى بالالار اۋىلىنىڭ تاربيەلەنۋشىسىنە ەلباسى نۇرسۇلتان نازارباەۆتىڭ اتىنان مۋزىكالىق ورتالىق پەن قازاقستاندىق جازۋشىلاردىڭ كىتاپتار جيناعىن سالتاناتتى جاعدايدا تاپسىرىلدى. بۇل تۋرالى egemen.kz ءتىلشىسى حابارلادى.
وبلىس ورتالىعىنداعى وتباسىلىق ۇلگىدەگى بالالار ۇيىندە تۇرىپ جاتقان ۆيكتوريا گولۋبتسوۆا جەلتوقسان ايىندا «قازپوشتا» اق-ى ۇيىمداستىرعان- «اياز اتاعا حات جاز» اكتسياسىنا قاتىسىپ, پرەزيدەنت اتىنا حات جازادى. وندا اقجارما تىلەگىن جەتكىزە وتىرىپ, مۋزىكالىق ورتالىعىم بولسا دەگەن ارمانىن جاسىرمايدى. جاڭا جىل الدىندا ونىڭ بالاتىلەگى قابىل بولىپ, ۇلكەن قۋانىشقا بولەندى.
«قازپوشتا» اق سقوف-نىڭ ديرەكتورى ەرىك نۇراقاەۆتىڭ ايتۋىنشا, ەلىمىز بويىنشا اكتسياعا شامامەن 4 مىڭ بالا قاتىسقان. ولاردىڭ جۇرەك تۇكپىرىنەن شىققان جىلى لەبىزدەرى بارلىق جەرلەرگە ورناتىلعان جاشىكتەرگە سالىنىپ, عالامتورعا ورنالاستىرىلعان.
«بالالارعا جاساپ كەلە جاتقان ۇدايى قامقورلىعى ءۇشىن نۇرسۇلتان اتاما زور العىسىمدى بىلدىرەمىن. بارشا بالدىرعاندار اتىنان جاڭا جىل مەرەكەسىمەن قۇتتىقتايمىن. زور دەنساۋلىق, وتباسىلىق باقىت تىلەيمىن», دەيدى وتباسىلىق ۇلگىدەگى بالالار ءۇيىنىڭ شاكىرتى ۆيكتوريا گولۋبتسوۆا ەلباسىنا جازعان حاتىندا.
بۇگىندە بالالار اۋىلىندا 7 جاستان 18 جاس ارالىعىنداعى 51 تاربيەلەنۋشى تۇرىپ جاتىر.
ءومىر ەسقالي.
دەرەك,سۋرەت: egemen.kz