استانا. 4 قاڭتار. ورال ورتالىعىنداعى ايالدامالاردىڭ بىرىندە اقشا ايىرباستاۋ پۋنكتى مەن اۆتوساقتاندىرۋ كومپانياسىنىڭ كەڭسەسى ورنالاسقان پاۆيلون ورتەنىپ كەتتى. بۇل تۋرالى mgorod.kz حابارلادى.
ءورت سوندىرۋشىلەر حابارلاما تۇسكەننەن كەيىن وقيعا ورنىنا بىرنەشە مينۋتتا جەتكەن. وبلىستىق توتەنشە جاعدايلار قىزمەتىنىڭ قىزمەتكەرى: «جايىق جارىعى» مەكەمەسىنىڭ قىزمەتكەرلەرى كەشىگىپ جەتتى, سول سەبەپتى اقشا ايىرباستاۋ ورنىن ەلەكتر جەلىسىنەن ءوزىمىز اجىراتۋىمىزعا تۋرا كەلدى. سەيف, جيھاز جانە باسقا دا قۇندى زاتتاردى يەلەرىمەن بىرگە شىعارىپ ۇلگەردىك. ەكىنشى سەيف جانىپ كەتتى, بىراق ونىڭ ىشىندە اقشا بولمادى, تەك قاعازدار عانا بولعان», – دەدى.
ايتا كەتەيىك, توتەنشە وقيعاعا 5 ارنايى تەحنيكا مەن بىرنەشە ءورت سوندىرۋشىلەر جۇمىلدىرىلعان. وتقا ورانعان نىساننىڭ جالپى اۋدانى 60 شارشى مەتردى قۇرايدى. قازىرگى تاڭدا قىزىل جالىننىڭ شىعۋ سەبەبى انىقتالىپ جاتىر.
تالعات رايىمبەك.
دەرەك, سۋرەت: mgorod.kz.