قاراعاندىداعى شەت مەملەكەتتەردىڭ, حالىقارالىق ۇيىمداردىڭ بايقاۋشىلارىنا, بۇقارالىق اقپارات قۇرالدارىنىڭ وكىلدەرىنە جاردەمدەسۋ ورتالىعىندا «ءبىز اشىق, ءمولدىر, ءادىل سايلاۋ ءۇشىن» اتتى تاقىرىپتا بريفينگ ءوتتى.
جەرگىلىكتى جۋرناليستەرمەن جۇزدەسۋدە قازاقستان رەسپۋبليكاسىندا سايلاۋدى بايقاۋ ءجونىندەگى رەسپۋبليكالىق قوعامدىق كوميسسيا فيليالىنىڭ ءتورايىمى ن.ۆشيۆتسەۆا كوميسسيانىڭ ءوڭىردەگى جۇمىسىنىڭ باستالۋى تۋرالى ءمالىم ەتتى. ونىڭ پرەزيدەنتتىك سايلاۋلاردى وتكىزۋدەن تاجىريبەسى مول ەكەنى اتالىپ, قۇرامىنا قازاقستان حالقى اسسامبلەياسىنىڭ مۇشەلەرى, عىلىم مەن ءبىلىم جانە مادەنيەت قايراتكەرلەرى, قوعامدىق بىرلەستىكتەر جەتەكشىلەرى تارتىلعانى حابارلاندى.
«سايلاۋالدى نەگىزگى ءىس-شارالاردىڭ ءبىرى وبلىستىڭ بارلىق سايلاۋ ۋچاسكەلەرى ءۇشىن 784 بايقاۋشى دايىندالىپ, ولارمەن سەمينارلىق ساباقتار وتكىزۋ باستالدى», دەگەن ناتاليا نيكولاەۆنا كوميسسيا مۇشەلەرى مەن بايقاۋشىلاردىڭ سايلاۋ ۇدەرىسىنە قاتىسۋشىلارعا تەڭ قۇقىقتار مەن جاعدايلاردى قامتاماسىز ەتۋگە, سايلاۋ زاڭناماسىنا سايكەس تالاپتاردى ساقتاۋعا جۇمىس ىستەۋگە بەلسەندىلىك تانىتۋعا قۇشتارلىقتارىن ايتتى.
كەزدەسۋدە ماڭىزدى ساياسي ناۋقاندى ۇيىمداستىرۋ, سايلاۋالدى ۇگىت-ناسيحات جۇمىستارى, ونى بۇقارالىق اقپارات قۇرالدارىندا كورسەتۋ جونىندە تۇسىنىك بەرىلىپ, سۇراقتارعا جاۋاپ قايتارىلدى.
ايقىن نەسىپباي,
«ەگەمەن قازاقستان».
قاراعاندى.