وسكەمەندەگى ب.الەكساندروۆ اتىنداعى سپورت سارايىندا شايبالى حوككەيدەن «جۇلدىزشا» وبلىستىق ءتۋرنيرى جالاۋىن كوتەردى. شىعىس ءوڭىرىنىڭ وقۋشىلارى اراسىندا ءۇشىنشى مارتە ۇيىمداستىرىلىپ وتىرعان تۋرنير جەڭىستىڭ 70 جىلدىعىنا ارنالادى.
«جۇلدىزشا» ءتۋرنيرى ىلكىدەگى «التىن شايبانىڭ» بالاماسى ىسپەتتى. ءتۋرنيردىڭ نەگىزىن قالاۋشى – «التىن شايبا» كلۋبىنىڭ توراعاسى, اتاقتى باپكەر اناتولي تاراسوۆ. «التىن شايبا» – بالالار اراسىنداعى اۋقىمدى ءتۋرنيردىڭ ءبىرى بولعانى, باستاۋىن 1964 جىلدىڭ جەلتوقسانىنان الاتىنى جانكۇيەر قاۋىمعا بەلگىلى. ينسبۋرگتە وتكەن وليمپيادا ويىندارىنداعى جەڭىستەن سوڭ كسرو قۇراماسىنىڭ حوككەيشىلەرى «پيونەرسكايا پراۆدا» گازەتى ۇجىمىنىڭ شاقىرتۋىن قابىل الىپ, رەداكتسياعا كەلەدى. ارينە, قۇرقول ەمەس. اڭىزعا اينالعان حوككەيشى ۆەنيامين الەكساندروۆ تىلشىلەرگە كانادالىقتاردىڭ قاقپاسىنا سوعىلعان, وليمپيادا التىنىن اپەرگەن شايبانى تارتۋ ەتەدى. «التىن شايبانى» وتكىزۋ يدەياسى سول كەزدە پايدا بولعان ەكەن. جالپى, «التىن شايباعا» ز.بيليالەتدينوۆ, ۆ.مىشكين, ب.الەكساندروۆ, ۆ.كرۋتوۆ, ۆ.فەتيسوۆ سىندى تانىمال حوككەيشىلەر قاتىستى. وسكەمەندىك حوككەيشىلەر بۇكىلوداقتىق سايىستاردىڭ جۇلدەگەرى اتانعانى دا جانكۇيەرلەردىڭ جادىندا. 2000 جىلى ەلىمىزدىڭ ءبىلىم جانە عىلىم مينيسترلىگى ۇلتتىق دەنەشىنىقتىرۋ عىلىمي-تاجىريبەلىك ورتالىعى بالالار اراسىنداعى تانىمال حوككەي ءتۋرنيرى «جۇلدىزشانى» قايتا جاڭعىرتتى.
– ءبىزدىڭ بۇل ءتۋرنيردى جەڭىستىڭ 70 جىلدىعىنا ارناۋىمىز بەكەر ەمەس. ءتۋرنيردى تاماشالاۋعا كەلگەن ارداگەرلەر, قاريالار قازاقستاندىق حوككەيدىڭ گۇلدەنگەن كەزەڭىنىڭ كۋاسى بولعان جاندار. ولار وسكەمەن شاھارىنىڭ وتاندىق حوككەيدىڭ ورداسى بولعان شاعىن كوردى. بۇگىندە مەملەكەت, جەرگىلىكتى اتقارۋشى بيلىك تاراپىنان حوككەيدى دامىتۋعا قولايلى جاعداي جاسالۋدا. وسكەمەندە 2 مۇز كەشەنى سالىندى. تۋرا وسى ىسپەتتى نىسانداردى جاقىندا زىريان مەن ريددەر قالالارىنىڭ سپورتشى جەتكىنشەكتەرىنە سىيعا تارتامىز, – دەدى ءتۋرنيردىڭ اشىلۋ سالتاناتىندا وبلىس اكىمىنىڭ ورىنباسارى جاقسىلىق ومار.
دۋمان اناش,
«ەگەمەن قازاقستان».
وسكەمەن.