قازاق گەوگرافيالىق قوعامى جەردىڭ سولتۇستىك پوليۋسىنە ەكسپەديتسيا جۇمىسىن باستادى. جيھانگەرلەر ساپار بارىسىندا تابيعاتتىڭ ەڭ سۋىق نۇكتەسىنە قازاقستان رەسپۋبليكاسىنىڭ تۋى مەن قازاقستان حالقى اسسامبلەياسى جىلىنىڭ تۋىن تىگىپ, سولتۇستىك ءپوليۋستى باعىندىرعالى وتىر.
الماتى قالاسىنان نورۆەگيانىڭ وسلو قالاسىنا ۇشاقپەن جەتىپ, ودان ءارى شپيتسبەرگەن ارالىندا قوسىن قۇرىپ, مۇز قۇرسانعان بارنەو تۇبەگىنەن سولتۇستىك پوليۋسكە شاڭعىمەن باستالاتىن ساپار قۇرامىندا قازاق گەوگرافيالىق قوعامىنىڭ توراعاسى نۇرلان ابدۋوۆ, قازاقستاندىق بلوگەرلەر اليانسىنىڭ جەتەكشىسى عالىم بايتوق, Voxpopuli.kz فوتورەپورتاجدىق سايتىنىڭ باس رەداكتورى جاننا احمەتوۆا, «Shejire DNA» عىلىمي جوباسىنىڭ جەتەكشىسى نۇربول بايمۇحانوۆتار بار. جيھانگەرلەردى بەيبىت ساپارعا شىعارىپ سالۋ راسىمىندە قازاقستان رەسپۋبليكاسى پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسى مەن قازاقستان حالقى اسسامبلەياسىنىڭ ءبىر توپ مۇشەلەرى الماتىداعى دوستىق ۇيىندە سالتاناتتى شارا ۇيىمداستىرىپ, ساپارعا اتتانىپ بارا جاتقان توپ مۇشەلەرىنە قازاقتىڭ ۇلتتىق باس كيىمى تۇماق پەن سۋىق تابيعاتتا سەپ بولاتىن قۇرال-جابدىقتار سىيلادى.
شپيتسبەرگەن ارالى – سولتۇستىك مۇزدى مۇحيتتا ورنالاسقان پوليارلىق ارال. نورۆەگيا امىرلىگىنىڭ ەڭ شەتكى سولتۇستىك بولىگىنە ورنالاسقان ارال تۇرعىندارىنىڭ سانى 2600 ادام. ولاردىڭ قاتارىندا نورۆەگتەر, ورىستار, ۋكرايندار مەن پولياكتار بار. بارنەو مەن پوليۋسكە دەيىنگى 200 شاقىرىمدىق ارالىقتى قازاقستاندىقتار تاۋلىگىنە 20-25 شاقىرىم شاڭعىمەن ءجۇرۋ, مۇزداقتار ارقىلى ءوتۋ, مۇزتاۋدىڭ جارىلعان تۇستارىنان ارنايى قىسقى شانا سەكىلدى قيىندىقتارعا قارسى تۇرا وتىرىپ, ءجۇرىپ وتەتىن بولادى.
قازاقستاننىڭ بۇگىنگى جەتىستىكتەرىن الەمنىڭ الىس ايماقتارىنا ناسيحاتتاۋمەن قاتار ەكسپەديتسيانىڭ تاعى ءبىر مىندەتى, پلانەتانىڭ ەڭ سۋىق نۇكتەسىندە ورنالاسقان حالىقتىڭ قاندىق-تەكتىك قۇرامىن انىقتاۋ, ادامزات شەجىرەسىنىڭ تامىرىن تەرەڭدەتۋ بولىپ وتىر.
ەكسپەديتسيا وزىنە جۇكتەلگەن مىندەتتى اتقارا وتىرىپ قازاقستان حالقى اسسامبلەياسىنىڭ ءححىى سەسسياسىنا دەيىن ەلگە ورالۋعا ءتيىس.
قانات ەسكەندىر,
«ەگەمەن قازاقستان».
الماتى.