ەلباسى نۇرسۇلتان نازارباەۆ قازاقستان كۇرەس فەدەراتسياسىنىڭ قۇرمەتتى پرەزيدەنتى, بىرىككەن كۇرەس الەمىنىڭ بيۋرو مۇشەسى داۋلەت تۇرلىحانوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ەلدە بۇقارالىق سپورتتى دامىتۋ, سونىڭ ىشىندە جاس ۇرپاقتى سپورتقا باۋلۋ ماسەلەلەرى تالقىلاندى.
قازاقستان پرەزيدەنتى جاستار اراسىندا سالاماتتى ءومىر سالتىن ناسيحاتتاۋدىڭ, سونداي-اق, جوعارى جەتىستىكتەر سپورتىن دامىتۋمەن قاتار, حالىقتىڭ دەنەشىنىقتىرۋمەن جانە سپورتپەن بەلسەنە اينالىسۋى ءۇشىن قاجەتتى بارلىق جاعدايدى جاساۋدىڭ ماڭىزدىلىعىنا توقتالدى.
د.تۇرلىحانوۆ وتاندىق سپورتقا مەملەكەت باسشىسىنىڭ كورسەتىپ وتىرعان قولداۋى ناتيجەسىندە ءىرى قالالاردا عانا ەمەس, شالعاي وڭىرلەردە دە قاجەتتى ينفراقۇرىلىمدار سالىنىپ جاتقانىن ايتا كەلىپ, سول ءۇشىن العىسىن جەتكىزدى. بۇل جاعداي قاجەتتى ىرگەتاس قالاۋعا مۇمكىندىك بەرىپ, سونىڭ نەگىزىندە قازاقستان سپورتشىلارى وڭىرلىك جانە حالىقارالىق جارىستاردا جوعارى ناتيجەلەرگە قول جەتكىزىپ وتىرعانىن اتاپ ءوتتى.
سۋرەتتى تۇسىرگەندەر
س.بوندارەنكو, ب.وتارباەۆ.