كەشە قازاقستان رەسپۋبليكاسىنىڭ پرەزيدەنتتىگىنە كانديدات ن.ءا. نازارباەۆتىڭ رەسپۋبليكالىق قوعامدىق شتاب مۇشەلەرى پاۆلودار وبلىسىنىڭ ءوندىرىس وبەكتىلەرىندە بولىپ, ايماق بەلسەندىلەرىمەن كەزدەستى.
دەلەگاتسيانىڭ قۇرامىندا رەسپۋبليكالىق قوعامدىق شتابتىڭ باسشىسى مۇحتار قۇل-مۇحاممەد, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك, پاتريوتتار پارتياسىنىڭ توراعاسى عاني قاسىموۆ, «اق جول» دەموكراتيالىق پارتياسىنىڭ توراعاسى ازات پەرۋاشەۆ, «بىرلىك» پارتياسىنىڭ توراعاسى سەرىك سۇلتانعالي, حالىق بانكتىڭ ديرەكتورلار كەڭەسىنىڭ توراعاسى ا.پاۆلوۆ, پارلامەنت ءماجىلىسىنىڭ دەپۋتاتتارى, قحا مۇشەلەرى ولەگ دىموۆ, رومان كيم, ماجىلىستەگى «نۇر وتان» پارتياسى فراكتسياسىنىڭ مۇشەلەرى م.پىشەمباەۆ, م.بەگەنتاەۆ, ا.نۇركينا جانە ت.ب. بولدى.
پاۆلودار قالاسىندا ن.ءا.نازارباەۆتى قولداۋشى – قازاقستان ەلەكتروليز زاۋىتىنىڭ مەتاللۋرگتەرىمەن, «قازاقستان ءاليۋمينيى» اق ەنەرگەتيكتەرىمەن, اقسۋ فەرروقورىتپا زاۋىتىنىڭ, ەۋرازيالىق ەنەرگەتيكالىق كورپوراتسيا جۇمىسشىلارىمەن, سونداي-اق, «ەكىباستۇز قالاسىندا «بوگاتىر-كومىر» اق كاسىپورنىنىڭ جۇمىسشىلارىمەن كەزدەسۋلەر بولدى.
بۇدان باسقا, رقش مۇشەلەرى پاۆلودار وبلىسىنىڭ ۇكىمەتتىك ەمەس سەكتورىنىڭ وكىلدەرىمەن جانە لۋگانسك اۋىلىنداعى مادەنيەت ۇيىندە «لۋگانسك» ءوندىرىستىك كووپەراتيۆىنىڭ جۇمىسشىلارىمەن كەزدەستى.
العاشقى كەزدەسۋدىڭ قازاقستان ەلەكتروليز زاۋىتىندا وتكەنى ەستە قالارلىقتاي, مۇندا وسىدان 7 جىلدان استام ۋاقىت بۇرىن ەلباسى وسى كاسىپورىندى اشقان كەزدە بىلاي دەگەن بولاتىن: «مەن مەتاللۋرگ رەتىندە وسىنداي زاۋىت تۋرالى ارمانداعان ەدىم. ەندى قازاقستان شيكىزات وندىرۋمەن جانە ساتۋمەن قاتار, ونى الەمدىك نارىققا شىعارادى». ماسەلەن, 2009 جىلى قازاقستان ءاليۋمينيى لوندوننىڭ مەتالدار بيرجاسىندا رەسمي تىركەلگەن بولاتىن, ال 2010 جىلى الەمدىك دەڭگەيدەگى «ەۋروپالىق ساپا» ناگراداسىنا يە بولدى.
رەسپۋبليكالىق قوعامدىق شتابتىڭ باسشىسى م. قۇل-مۇحاممەد ءوز سوزىندە اتاپ وتكەنىندەي, ەلباسىنىڭ تۇراقتى قولداۋىنىڭ ارقاسىندا پاۆلودار وبلىسى قازاقستاننىڭ جاڭا يندۋستريالىق-يننوۆاتسيالىق ەكونوميكاسىنىڭ كوش باسىنان تابىلدى.
«قۋاتتى اليۋميني ءوندىرىسى, جاڭا مىس قورىتۋ الىبى, اقسۋ فەرروقورىتپا زاۋىتى, سونداي-اق, مىنا سىزدەر ەڭبەك ەتەتىن ەلەكتروليز زاۋىتى ءاربىر پاۆلودارلىق وتباسىنىڭ جايلى تۇرمىسىنا سەنىمدى نەگىز بولۋدا. سوندىقتان, مەن سىزدەردىڭ وسىنشا قامقورلىق جاساۋشى ەلباسىنا داۋىس بەرەتىندەرىڭىزگە ءسوزسىز سەنىمدىمىن!», – دەدى رەسپۋبليكالىق قوعامدىق شتابتىڭ باسشىسى.
پاۆلودارلىقتار جەدەلدەتىلگەن يندۋستريالىق-يننوۆاتسيالىق دامۋ باعدارلاماسى ءۇشىن ن.ءا. نازارباەۆقا العىستارىن ءبىلدىردى, اتالعان باعدارلامانىڭ شەڭبەرىندە عانا سوڭعى 5 جىلدا وبلىستا 94 جوبا ىسكە اسىرىلىپ, 11 000-نان استام جاڭا جۇمىس ورنى قۇرىلدى.
«ەلباسى ءوزىنىڭ ەڭبەك جولىن قاراپايىم مەتاللۋرگ بولىپ باستادى. سوندىقتان, سىزدەردىڭ ەڭبەكتەرىڭىزدىڭ باعاسىن, سىزدەردىڭ ارمان-مۇددەلەرىڭىزدى, سىزدەردىڭ ماڭىزدى پروبلەمالارىڭىزدى ءسوز جۇزىندە عانا ەمەس, ءوز تاجىريبەسىنەن جاقسى بىلەدى. ەڭبەك ادامى – مەملەكەت باسشىسى ساياساتىنىڭ, بىرلىك, بەيبىتشىلىك پەن كەلىسىم ساياساتىنىڭ تۇعىرى! الداعى بولاتىن سايلاۋ ءبىزدىڭ بىرلىگىمىزدىڭ جانە كوشباسشىمىزدىڭ توڭىرەگىنە توپتاساتىنىمىزدى تاعى دا كورسەتەتىنىنە سەنىمدىمىز! ەلباسىنا داۋىس بەرە وتىرىپ, ءبىز تۇراقتى, ءوسىپ-وركەندەگەن جانە قۋاتتى قازاقستان ءۇشىن داۋىس بەرەمىز!», – دەدى ەكىباستۇز قالاسىنداعى «بوگاتىر-كومىر» جشس-ءنىڭ جۇمىسشىلارىمەن كەزدەسۋ بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك.
اقسۋ ەلەكترستانساسىنداعى ەنەرگەتيكتەر اۋلەتىنىڭ وكىلى سۆەتلانا ماحمۋدوۆا ءوز ەنەرگەتيكتەر اۋلەتىنىڭ جالپى ەڭبەك ءوتىلىنىڭ 100 جىلدان اساتىنىن ايتتى. قازاقستان تاۋەلسىزدىك العاننان بەرى كاسىپورىنعا جاڭا تەحنولوگيالار ەنگىزىلۋدە, ءوندىرىس جاڭارتىلۋدا. وسىنىڭ بارىنە ەلباسى ساياساتىنىڭ, ەكونوميكامىزدىڭ ءوسۋىنىڭ, قازاقستانداعى بەيبىتشىلىك پەن تۇراقتىلىقتىڭ ارقاسىندا قول جەتىپ وتىر, دەدى ول.
ن.ءا. نازارباەۆتىڭ كانديداتۋراسىن قولداۋ ءۇشىن ساياسي پارتيالاردىڭ باسشىلارى – «اق جول» پارتياسىنان ازات پەرۋاشەۆ, «بىرلىك» پارتياسىنان سەرىك سۇلتانعالي جانە پاتريوتتار پارتياسىنان عاني قاسىموۆ ءسوز سويلەدى.
فاريدا بىقاي,
«ەگەمەن قازاقستان».
پاۆلودار وبلىسى.