استانا. 30 ماۋسىم. قالاداعى ءبىلىم ورداسىنىڭ قارا شاڭىراعى سانالاتىن قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ ءبىتىرۋشى تۇلەكتەرى ديپلوم الىپ, جاڭا ومىرگە قانات قاقتى. بۇل تۋرالى قورقىت اتا اتىنداعى قمۋ-ءنىڭ ءباسپاسوز قىزمەتى حابارلادى.
ديپلوم تاپسىرۋ سالتاناتىنا وبلىسى اكىمىنىڭ ورىنباسارى راۋان كەنجەحان ۇلى مەن قازاقستان رەسپۋبليكاسى پارلامەنتى سەناتىنىڭ دەپۋتاتى مۇرات باقتيار ۇلى جانە «نۇر وتان» پارتياسىنىڭ قىزىلوردا وبلىستىق فيليالى توراعاسىنىڭ ءبىرىنشى ورىنباسارى ناۋرىزباي بايقاداموۆ, «ابزال جانە ك» تولىق سەرىكتەستىگىنىڭ ديرەكتورى, قازاقستاننىڭ ەڭبەك ەرى ابزال ەراليەۆ قاتىستى. سونداي-اق, ۋنيۆەرسيتەت رەكتورى, تەحنيكا عىلىمدارىنىڭ دوكتورى, پروفەسسور قىلىشباي الدابەرگەن ۇلى بيسەنوۆ بارشا قاۋىمدى مەرەكەمەن قۇتتىقتاي وتىرىپ, تۇلەكتەرگە ىستىق لەبىزىن ءبىلدىردى. رەكتور ءوز سوزىندە: «ءبىزدىڭ مىڭداعان تۇلەكتەرىمىز ۋنيۆەرسيتەتتە العان بىلىمدەرى مەن كاسىبي بىلىكتىلىكتەرىنىڭ ناتيجەسىندە ەلىمىزدىڭ الەۋمەتتىك-ەكونوميكالىق دامۋىنا ەلەۋلى ەڭبەك ءسىڭىرىپ, تابىستى قىزمەت جاساۋدا. بۇل – ءبىز ءۇشىن ۇلكەن ماقتانىش. ءبىزدىڭ تۇلەكتەرىمىزدىڭ قاتارىندا ەسىمدەرى ەلگە تانىمال قوعام قايراتكەرلەرى, مەملەكەتتىك سىيلىقتىڭ لاۋرەاتتارى, قازاقستاننىڭ ەڭبەك ەرى اتاعىنىڭ يەگەرلەرى, بەلگىلى عالىمدار مەن ۇستازدار, داڭقتى سپورتشىلار دا بار. سىزدەردىڭ الدارىڭىزدا تۇرعان ەڭ باستى مىندەت – ۋنيۆەرسيتەتتەن العان بىلىمدەرىڭىزدى تاجىريبەمەن ۇشتاستىرا وتىرىپ, ەڭبەك نارىعىندا باسەكەلەستىك قابىلەتى جوعارى كاسىبي تۇلعا بولۋ», – دەپ ەرەكشە اتاپ ءوتتى. سونىمەن بىرگە, ۋنيۆەرسيتەت باسشىسى ۇلكەن ومىرگە قانات قاعىپ وتىرعان ءاربىر تۇلەكتىڭ ەلىمىزدىڭ رۋحاني-مادەني, ەكونوميكالىق-الەۋمەتتىك ءوسىپ-وركەندەۋىنە وزىندىك ۇلەس قوساتىندارىنا سەنىم ءبىلدىردى. سونىمەن ءوز كەزەگىندە وبلىس اكىمىنىڭ ورىنباسارى مەن كەلگەن قوناقتار ءبىتىرۋشى تۇلەكتەرگە سالتاناتتى تۇردە ديپلوم تابىستادى.
ايتا كەتەيىك, ۋنيۆەرسيتەتتىڭ 78 جىلدىق تاريحى بار. بۇگىندە ءبىلىم بەرۋ قىزمەتىندە وزىندىك ءداستۇرى قالىپتاسقان, رەسپۋبليكالىق, حالىقارالىق ءبىلىم كەڭىستىگىندە كەڭىنەن تانىلعان, ءىلىم مەن عىلىمنىڭ, مادەنيەت پەن ونەردىڭ قاراشاڭىراعى. ۋنيۆەرسيتەت ينستيتۋتسيونالدىق جانە ارنايى مامانداندىرىلعان اككرەديتتەۋدەن, مەملەكەتتىك اتتەستاتتاۋدان وتكەن ايماقتاعى ىرگەلى وقۋ ورنى. مۇندا ەلباسى تاپسىرماسىنا ساي نارىقتىڭ وزگەرمەلى جاعدايىنا بەيىمدەلگەن, باسەكەگە قابىلەتتى, كاسىبي بىلىكتى ماماندار دايارلاۋ باعىتىندا 2012-2013 وقۋ جىلىنان باستاپ باكالاۆرياتتىڭ 16 ماماندىعى وقۋ ۇدەرىسىن كوپتىلدى ءبىلىم بەرۋ جۇيەسى بويىنشا جۇزەگە اسىرىپ كەلەدى.
ەڭ باستىسى ءۇش ءتىلدى ەركىن مەڭگەرۋ ارقىلى اكادەميالىق ۇتقىرلىق, قوس ديپلوم باعدارلامالارى اياسىندا ۋنيۆەرسيتەتتىڭ 50-گە جۋىق ستۋدەنتتەرى مەن ماگيسترانتتارى امەريكا قۇراما شتاتى, تۇركيا, اۆستريا, وڭتۇستىك كورەيا, پولشا, ەگيپەتتىڭ جوعارى وقۋ ورىندارىندا بىلىمدەرىن جەتىلدىرىپ كەلدى.
جالپى, بيىلعى وقۋ جىلىندا ۋنيۆەرسيتەتتى 48 ماماندىق بويىنشا 1429 ستۋدەنت ءبىتىردى. ال 296 تۇلەك ۇزدىك ديپلوم يەگەرى اتاندى. سونىمەن قاتار, ماگيستراتۋرانىڭ 29 ماماندىعى بويىنشا كادرلار دايارلايتىن وقۋ ورنىنان بيىل 163 ءبىتىرۋشى عىلىم ماگيسترى دارەجەسىن الدى.
سالتاناتتى جيىن بارىسىندا ۋنيۆەرسيتەتتىڭ ءار جىلدارداعى تۇلەكتەرى, حالىقارالىق, رەسپۋبليكالىق ءان بايقاۋلارىنىڭ جەڭىمپازدارى «تۇران» تريوسى, ينديرا احمەتوۆا, نازەركە نۇرادينوۆا جانە قازاق ەستراداسىنىڭ جاس جۇلدىزى, جەرلەسىمىز سەرىك يبراگيموۆ اننەن شاشۋ شاشىپ, جاستارعا ەرەكشە كوڭىل-كۇي سىيلادى.
تالعات رايىمبەك.
دەرەك, سۋرەت: قورقىت اتا اتىنداعى قمۋ-ءنىڭ ءباسپاسوز قىزمەتى.