مەملەكەتتىڭ داعدارىسقا قارسى ساياساتىن سەناتورلار وسىلاي باعالاپ وتىر
مەملەكەت باسشىسى الەمدىك ەكونوميكانىڭ تۇراقسىزدىعىنا وراي «نۇرلى جول» مەملەكەتتىك باعدارلاماسىن وزگەرتۋ جونىندە تاپسىرمالار بەرگەن-ءدى. وسىعان وراي, ەكونوميكالىق جانە زاڭنامالىق وزگەرىستەردى جەدەل ەندىرۋ ماسەلەسى وتكىر تۋىنداعان بولاتىن. كەشە وسى ماسەلەلەردى تارقاتىپ ايتىپ بەرۋ ءۇشىن سەناتتىڭ قارجى جانە بيۋدجەت كوميتەتىنىڭ مۇشەلەرى ەرتارعىن استاەۆ پەن لاززات تۇرلاشوۆ بۇقارالىق اقپارات قۇرالدارى وكىلدەرىنىڭ الدىنا شىقتى.
ورتالىق كوممۋنيكاتسيالار قىزمەتىندە وتكەن بريفينگتە 2015-2017 جىلدارعا ارنالعان رەسپۋبليكالىق بيۋدجەتتى ناقتىلاۋ جايى كەڭىنەن قوزعالدى. الدىمەن ءسوز العان ە.استاەۆ ەڭ باستىسى, رەسپۋبليكالىق بيۋدجەت وڭتايلاندىرىلعانىمەن, ازاماتتاردى الەۋمەتتىك قورعاۋ ماسەلەسىندە وزگەرىس جوق دەسە دە بولعانداي ەكەنىنە نازار اۋداردى. سەناتور, سونداي-اق, «اگروبيزنەس-2020» باعدارلاماسىن وڭتايلاندىرۋ ناتيجەسىندە اوك باعىتىندا جاڭا عىلىمي-زەرتتەۋلەرگە قاراستىرىلعان 69,9 ميلليارد تەڭگەنىڭ 3 ميللياردى كەميتىنىن العا تارتتى. ەسەسىنە, «نۇرلى جول» باعدارلاماسىنا سايكەس اۋىل شارۋاشىلىعىن قولداۋعا, اوك سۋبەكتىلەرىن سۋبسيديالاۋعا 20,0 ميلليارد تەڭگە كوزدەلگەندىگىن اتاپ كورسەتتى. بۇدان باسقا, «2020 جىلعا دەيىنگى وڭىرلەردى دامىتۋ» باعدارلاماسى بويىنشا قاراستىرىلعان 368,3 ميلليارد تەڭگەنىڭ 83,3 ميللياردى كەمىتىلەتىن بولادى.
بىراق «نۇرلى جول» باعدارلاماسى شەڭبەرىندە تۇرعىن ءۇي قۇرىلىسى سالاسىنا ەرەكشە ەكپىن بەرىلەرى بەلگىلى بولىپ وتىر. اتاپ ايتقاندا, بۇرىن باستالعان تۇرعىن ءۇي قۇرىلىستارىن اياقتاۋ ءۇشىن ۇلتتىق قوردان ماقساتتى ترانسفەرت رەتىندە 30 ميلليارد تەڭگە قاراستىرىلعان. سونداي-اق, وسى قوردان جاڭا جوبالاردى ىسكە اسىرۋ ءۇشىن وبليگاتسيالىق زايم بەرۋ ماسەلەسى شەشىمىن تاۋىپتى. «سامۇرىق-قازىنا» ۇاق» اق ارقىلى جۇزەگە اسىرىلاتىن ءىس-شارالاردى وڭتايلاندىرۋ ارقاسىندا 22,3 ميلليارد تەڭگەنى ۇنەمدەۋگە قول جەتكىزىلمەك. ەلوردادا ەكسپو-2017 حالىقارالىق كورمەسىن وتكىزۋ ءۇشىن بولىنگەن قارجىنىڭ 10,0 ميلليارد تەڭگەسى دە وڭتايلاندىرىلعانى اتاپ ايتىلدى. ەرتارعىن استاەۆ ءسوزىنىڭ سوڭىنان «نۇرلى جول» باعدارلاماسىن جۇزەگە اسىرۋ ەكونوميكا وسىمىنە ىقپال ەتىپ, ءوزىنىڭ مۋلتيپليكاتيۆتىك تيىمدىلىگىن بەرەرىن, ەڭبەكاقىنىڭ وسىمىنە, دەنساۋلىق ساقتاۋ, الەۋمەتتىك از قامتىلعانداردى قولداۋعا قوسىمشا قارجى قوسىلارىن, جالپى العاندا, ەكونوميكانىڭ جاندانۋىنا ىقپال ەتەرىن ەرەكشە اتادى.
بۇدان كەيىن ءسوز العان لاززات تۇرلاشوۆ 2015-2017 جىلدارعا ارنالعان رەسپۋبليكالىق بيۋدجەتتى ناقتىلاۋ جانە ونىڭ مەملەكەت پەن حالىقتىڭ تىنىس-تىرشىلىگىنە, ەكونوميكالىق دامۋعا اسەرىن جان-جاقتى ايتىپ بەردى. دەپۋتاتتىڭ ايتۋىنشا, بيۋدجەتتى تۇزەتۋ سىرتقى فاكتورلاردىڭ ىقپالدارىن بەيتاراپ ەتۋگە, وتاندىق ەكونوميكانىڭ ودان ءارى قارقىندى دامۋىنا سەبەپشى بولۋعا, ازاماتتارىمىزدىڭ الەۋمەتتىك جاعدايلارىن قورعاۋعا باعىتتالۋعا ءتيىس. سىرتقى اسەردىڭ سەبەبىنەن ەل ەكونوميكاسىنىڭ دامۋ قارقىنى ءسال باسەڭسىگەنمەن, 2014 جىلدىڭ قورىتىندىسى بويىنشا تۇراقتى دامۋ بايقالدى. «بۇعان ەلىمىزدە سوڭعى جىلدارى مەكتەپ, اۋرۋحانا جانە باسقا دا ماڭىزدى الەۋمەتتىك وبەكتىلەردىڭ كوپتەپ سالىنۋى, سونداي-اق, ورتا جانە شاعىن بيزنەستىڭ دامۋى مەن مەملەكەتتىك باعدارلامالاردىڭ قارجىلاندىرىلۋى, الەۋمەتتىك تولەمدەر دەڭگەيىنىڭ ساقتالۋى دالەل بولا الادى», دەدى لاززات ماحات ۇلى.
اسقار تۇراپباي ۇلى,
«ەگەمەن قازاقستان».