وتكەن سەنبىدە الماتىنىڭ ىرگەسىندەگى بايسەركە اۋەجايىندا قازاقستان حالقى اسسامبلەياسىنىڭ 20 جىلدىعىنا ورايلاستىرىلىپ وتاندىق «اراي اگرو» ۇشاعىنىڭ تۇساۋكەسەر ءراسىمى وتكىزىلدى.
بۇل جەرگىلىكتى «اۆياماستەر ەيركرافت» زاۋىتىندا كانادالىق تەحنولوگيا بويىنشا جاسالعان بەسىنشى ۇشاق. ءبىرىنشى «اراي اگرو» ۇشاعىنىڭ تۇساۋكەسەرى وتكەن جىلدىڭ كوكتەمىندە ءوتىپ, بىردەن-اق فەرمەرلەر كوزايىمىنا اينالىپ, اۆياتسيا سالاسى ساراپشىلارىنىڭ دا كوكەيىنەن شىققان بولاتىن. ال ەندى قازاقستان حالقى اسسامبلەياسىنىڭ مەرەيتويى قارساڭىندا ۇيىمداستىرىلعان كەزەكتى كورسەتىلىم دە العاشقىسىنان ولقى سوققان جوق.
بايسەركە اۋەجايىنىڭ جازعى الاڭىنا ەلدىڭ ءار وڭىرىنەن كەلگەن اۋىلشارۋاشىلىق تاۋارلارىن وندىرۋشىلەر, ەتنومادەني ورتالىقتار وكىلدەرى, شەتەلدىك مەيماندار جينالدى. ولار كىشكەنتاي عانا جەڭىل موتورلى ۇشاقتىڭ شارىقتاي سامعاپ, نەبىر كەرەمەت ۇشۋ ۇلگىلەرىن كورسەتكەن جارقىن اۆيادۋماننىڭ كۋاگەرلەرى بولدى.
ءتورت ورىندى «اراي اگرو» جۇك تاسىمالداۋدان باستاپ مەملەكەتتىك شەكارانىڭ اۆياتسيالىق كۇزەتىنە دەيىنگى كوپتەگەن مىندەتتەردى اتقارا الادى. ۇشاق شالعاي ءارى قيىن اسۋلى جەرلەردەن ناۋقاستاردى كوشىرۋگە, ءورت سوندىرۋگە, براكونەرلەرمەن كۇرەس جۇرگىزۋگە وتە-موتە ىڭعايلى. الايدا, ونىڭ باستى ميسسياسى فەرمەرلەرگە ەگىستىككە كۇتىم جاساۋ ورايىندا كومەكتەسۋ, ەگىستىك القاپتارىن حيميالىق وڭدەۋدەن وتكىزۋ بولىپ تابىلادى. سوندىقتان, بۇل ۇشاقتى اۋە «تراكتورى» دەپ تە اتايدى. ول وڭاي باسقارىلادى. قۇنى 200 مىڭ دوللار شاماسىندا. ۇشۋ قاشىقتىعى – 1200 شاقىرىم. اي-95 ماركالى اۆتوموبيل بەنزينىن قۇيادى. «اراي اگرو» تۇراقجايدا ساقتاۋدى جانە ارنايى ۇشۋ-قونۋ الاڭدارىن تالاپ ەتپەيدى, تىكەلەي ەگىستىككە, كوگالدى الاڭقايعا, قارا جولعا قونا بەرەدى.
تۇساۋكەسەر بارىسىندا الماتى وبلىسى قحا توراعاسىنىڭ ورىنباسارى – حاتشىلىق مەڭگەرۋشىسى عابيت تۇرسىنباي جينالعانداردى قازاقستان حالقى اسسامبلەياسى جىلىمەن قۇتتىقتاي كەلە, قوعامداعى بىرلىك پەن تۇراقتىلىقتىڭ ارقاسىندا وتاندىق ەكونوميكانىڭ جۇيەلى دامىپ, سونىڭ ىشىندە كىشى اۆياتسيا سالاسىندا دا جاڭا وندىرىستەردىڭ پايدا بولىپ جاتقاندىعىن اتاپ ءوتتى. سوڭعى جيىرما جىلدا اسسامبلەيا جالپىحالىقتىق ينستيتۋتقا, تاتۋلىق پەن دوستىقتىڭ بەرىك ىرگەتاسىنا اينالىپ, ەلىمىزدىڭ ەتنوستىق جانە مادەني ءار الۋاندىعى ونىڭ دامۋىنا دا ۇلكەن سەرپىن بەرۋدە.
قحا مۇشەسى, «وگني الاتاۋ» گازەتىنىڭ باس رەداكتورى اتساليم يديگوۆتىڭ ايتۋىنشا, جاھاندىق باسەكەلەستىك ءوسىپ وتىرعان قازىرگى جاعدايدا رىنوكتى وتاندىق مازمۇنمەن بايىتۋ, «قازاقستاندا جاسالعان» بەلگىسىمەن ونىمدەردى كوپتەپ شىعارۋ اسا ماڭىزدى. مىسالى, «اراي اگرو» ۇشاقتارىنىڭ تەك وزىمىزدە عانا ەمەس, سونىمەن بىرگە, بۇكىل تمد ەلدەرى بويىنشا دا بالاماسى جوق. سوندىقتان, ولار ەلدىڭ تانىمال ۇلتتىق برەندتەرىنىڭ تىزبەسىنە كىرەتىندىگىنە سەنىم مول.
جاڭا تەحنيكانىڭ وتكەن جىلعى ونەركاسىپتىك پايدالانىلۋ تاجىريبەسى ونىڭ جوعارى ونىمدىلىگىن كورسەتتى. اگرونومداردىڭ باعالاۋىنشا, بۇل ۇشاقتار ەگىستىكتى ارامشوپتەر مەن زيانكەستەردەن از شىعىن جۇمساي وتىرىپ كوپ مارتە قورعاۋدى قامتاماسىز ەتەدى. ەگىس تاناپتارىن وڭدەۋدىڭ وزىندىك قۇنى 1 گەكتارعا شاققاندا 120 تەڭگەنى قۇرايدى.
«اۆياماستەر ەيركرافت» جشس ديرەكتورى داۋرەن ۋاليەۆ اتاپ وتكەندەي, الماتى وبلىسىنىڭ اۋىل شارۋاشىلىعىندا اۆياتسيالىق تەحنولوگيانى كەڭىنەن ەنگىزۋدىڭ بىرەگەي مۇمكىندىكتەرى بار. بۇل ءوز كەزەگىندە كوكونىستىڭ, كۇرىشتىڭ, قانت قىزىلشاسىنىڭ, جۇگەرىنىڭ, بۇرشاق پەن كۇنباعىستىڭ شىعىمدىلىعىن 25-40 پايىز ارتتىرۋعا جول اشپاق.
– بۇكىل الەمدە اۆياتەحنيكانىڭ شارۋاشىلىق ماقساتتا قولدانىلۋ اۋقىمى ەكونوميكانى دامىتۋ مەن حالىق ءومىرىنىڭ ساپاسىن ارتتىرۋدىڭ وزەكتى كورسەتكىشتەرىنىڭ بىرىنەن سانالادى, – دەدى د.ۋاليەۆ. – اۋە كەمەلەرىنىڭ سانى جاعىنان العاندا العاشقى بەستىكتە اقش, كانادا, ۇلىبريتانيا, جاپونيا مەن گەرمانيانىڭ بولۋى تەگىن ەمەس. ءبىز الدىمىزعا الەمدەگى اسا دامىعان 30 مەملەكەتتىڭ قاتارىنا قوسىلۋ ماقساتىن قويىپ وتىرمىز. ال بۇل ءۇشىن اۆياتسيالىق تەحنولوگيانى دامىتا ءتۇسۋىمىز وتە ماڭىزدى.
زاۋىت ءونىمىنىڭ ءبىر-بىرلەپ, جەكە تاپسىرىس بويىنشا دايىندالاتىنىن ايتا كەتۋ ءلازىم. وتكەن جىلى شىعارىلعان العاشقى ءۇش ۇشاق قوستاناي وبلىسىنىڭ ەگىس القاپتارىندا, تاعى ءبىرى ماسكەۋ ماڭىندا ۇشىپ ءجۇر. ال كوزايىم سامعاۋىن ءبىز باقىلاعان بەسىنشى ۇشۋ اپپاراتىن اقمولا وبلىسىنداعى «ءىزباساروۆ جانە ك» جشس فەرمەرلىك كاسىپورنى ساتىپ الدى. كومپانيانىڭ وندىرىستىك تۇراقجايىندا تاعى ەكى «اراي اگرو» قۇراستىرىلىپ بىتۋگە جاقىن. كاسىپورىن الداعى ۋاقىتتا قۋاتتىلىقتى ارتتىرىپ, تاياۋ شەتەلدەردە ديلەرلىك ورتالىقتار اشۋدى كوزدەپ وتىر.
قورعانبەك امانجول,
«ەگەمەن قازاقستان».
الماتى.