قوستاناي. 29 ماۋسىم. وسىدان ءبىراز بۇرىن «قر مينەرالدىق رەسۋرستار اكادەمياسى» سولتۇستىك قازاقستان فيليالىنىڭ توراعاسى ۆيكتور دەينەكا وبلىس اكىمىنە حات جازىپ, وندا قوستانايداعى گەولوگيالىق مۋزەيدى ساقتاپ قالۋ ءۇشىن ونى قارجىلاندىرۋ پروبلەماسىن كوتەرگەن بولاتىن. جاقىندا وسى ماسەلەنى نازاردا ۇستاعان نۇرالى سادۋاقسوۆ گەولوگيالىق مۋزەيگە ءوزى بارىپ, ماسەلەنىڭ ءمان-جايىنا قانىقتى. بۇل تۋرالى alau.kz سايتىنا سىلتەمە جاساي وتىرىپ, egemen.kz ءتىلشىسى حابارلادى.
حاتىندا ۆيكتور كۋزميچ سولتۇستىك قازاقستان گەولوگيالىق جانە جەر قويناۋىن پايدالانۋ ايماقارالىق باسقارماسىنىڭ كوكشەتاۋ قالاسىنا كوشىرىلۋىنە بايلانىستى قوستاناي قالاسىنداعى گەولوگيالىق مۋزەي جاعدايىنىڭ سىن كوتەرمەي تۇرعانىن جازعان بولاتىن. وندا اۆتور مۋزەي ورنالاسقان عيمارات, مۋزەيدىڭ جۇمىس ىستەمەۋىنە بايلانىستى جاعدايلاردى كوتەرگەن ەدى. قازىر مۋزەي «قوستاناي ىزدەستىرۋ-ءتۇسىرۋ ەكسپەديتسياسى» جاۋاپكەرشىلىگى شەكتەۋلى سەرىكتەستىگىنىڭ ەسەبىنەن تۇر, بىراق بۇل كاسىپورىننىڭ ءوزى بۇگىندە قارجىلىق قيىنشىلىقتى باستان كەشىپ وتىر. وسىعان بايلانىستى سولتۇستىك قازاقستان گەولوگيالىق جانە جەر قويناۋىن پايدالانۋ ايماقارالىق باسقارماسىنىڭ باسشىلىعى مۋزەيدى كوكشەتاۋعا كوشىرۋ تۋرالى شەشىم قابىلداعان بولاتىن.
مۋزەيگە كەلگەن وبلىس اكىمى نۇرالى سادۋاقاسوۆ ونداعى وتە باي جادىگەرلەرمەن تانىستى. مۋزەي ديرەكتورى تاتيانا كرىلوۆا اڭگىمەلەگەندەي, مۇندا 5 مىڭعا جۋىق گەولوگيالىق مينەرالدار ۇلگىلەرى قويىلعان. ونىڭ سىرتىندا 10 مىڭعا جۋىق جادىگەر قويمادا ساقتاۋلى. سونىمەن قاتار مۋزەيدە 1961 جانە 2013 جىلدارى اۋليەكولدەن تابىلعان مۇناي سىناماسى دا بار. مۋزەي قىزمەتكەرىنىڭ ايتۋىنشا, ەكسپوناتتارىنىڭ كوپتىگى جونىنەن رەسپۋبليكادا ونىڭ تەڭدەسى از. مۋزەي ديرەكتورى تاتيانا كرىلوۆا: «ءبىزدىڭ ماقسات مۋزەيدى وسى عيماراتتا قالدىرۋ بولىپ وتىر. مۇندا تاستار جۇيەلەنىپ قويىلعان» دەدى. وبلىس اكىمى مۋزەيدى وبلىستىڭ كوممۋنالدىڭ مەنشىگىنە وتكىزۋ كەرەك دەپ شەشتى.
وبلىس اكىمى نۇرالى سادۋاقاسوۆ: «مۋزەيدىڭ بىلىمدىك, تانىمدىق مادەني الەۋەتىن كورىپ وتىرىپ, ونى ساقتاۋعا ءتيىسپىز. جاقىن ۋاقىتتا مۋزەيدى وبلىستىڭ كوممۋنالدىق مەنشىگىنە الۋ جۇمىسىن باستايمىز. سودان ارى قاراي كورەمىز. مۋزەي وبلىستىق تاريحي-ولكەتانۋ مۋزەيى رەتىندە جۇمىس ىستەيدى نەمەسە ونىڭ ارنايى فيليالى بولادى. مۋزەيدى وبلىس قارجىلاندىراتىن بولادى», دەدى.
ءنازيرا جارىمبەتوۆا.
دەرەك, سۋرەت: alau.kz