بۇگىن, 28 اقپان كۇنى كەشكە بولگاريانىڭ استاناسى – سوفيا قالاسىندا ءداستۇرلى «ستراندجا» مەموريالىنىڭ 66-ءتۋرنيرى ءوزىنىڭ مارەسىنە جەتتى. بۇل تۋرالى بولگاريا بوكس فەدەراتسياسىنىڭ مالىمەتىنە سۇيەنگەن Ras.kz حابارلادى.
ونىڭ قورىتىندىسىندا قازاقستاننىڭ ەرلەر قۇراماسى 1 التىن, 1 كۇمىس, 3 قولا, ايەلدەر قۇراماسى 1 قولا مەدال الدى.
تۋرنير 24 اقپان كۇنى باستالدى. ول سوفيانىڭ «ۋنيۆەرسيادا حالل» سپورت ارەناسىندا ءوتتى.
جارىسقا الەمنىڭ 24 ەلىنەن 120-عا جۋىق بوكسشى قاتىستى. ولاردىڭ اراسىندا ايەلدەر قۇراماسى بويىنشا – 4, ەرلەر قۇراماسى بويىنشا 6 بوكسشى اپارعان قازاقستان كومانداسى دا بولدى.
سايىستىڭ ءبىرىنشى كۇنى 1/16 جانە 1/8 فينالدىق جەكپە-جەكتەر وينالدى. مۇنىڭ ەكىنشى ەلەكتىك شايقاسى بويىنشا اسا اۋىر سالماقتاعى قامشىبەك قوڭقاباەۆ ارميان ياكوب مەلكونيانمەن جۇپتاسىپ, قارسىلاسىن 2-راۋندتا نوكاۋتقا ءتۇسىردى.
كەلەسى, 25 اقپان كۇنى 1/8 فينالدىق ۇرىستار جالعاستى. وندا ءبىزدىڭ ەكى قىز شارشى الاڭعا شىعىپ, بىرەۋى ۇتتى, بىرەۋى ۇتىلدى. جەڭىسكە 75 كگ سالماقتاعى داريعا شاكىموۆا جەتتى. ول تۇرىك قۇربىسى سەما چالىشكاندى 3:0 ەتىپ ۇتتى. ال 60 كگ سالماقتاعى ءاليا ءابدىرايىموۆا برازيليالىق تاينا كاردوسوعا 0:2 بولىپ ەسە جىبەردى.
بۇل كۇنى ءتورت جىگىتىمىز رينگكە كوتەرىلىپ, تورتەۋى دە جەڭىس تويىن تويلادى. اتاپ ايتقاندا, جاقسىلىق ءىلياسوۆ (60 كگ) – مولدوۆان ۆاديم يۆانيۋكتى (3:0), عاني جايلاۋوۆ (64 كگ) – رەسەيلىك الەكسەي ءمازۋردى (2:1), رۋستام سۆاەۆ (75 كگ) – ازەربايجان كامران شاحسۋۆارلىنى (3:0), ال نۇربول التاەۆ (81 كگ) يراقتىق تاگەر ماحمۋد زايدوۋندى (3:0) تىزە بۇكتىردى.
26 اقپان كۇنى وتكەن شيرەك فينالدا تاعى ەكى قىزىمىز جولدان شىعىپ قالدى. الدىمەن 54 كگ سالماقتاعى دينا جولامان بولگار قىزى گابريەلا ديميتروۆادان 1:2 بولىپ ۇتىلدى. ال 64 كيلوداعى زارينا تسولوەۆا ازەربايجاندىق ەلەنا ۆىستروپوۆاعا 0:2 بولىپ جول بەردى. تەك 75 كگ سالماقتاعى داريعا شاكىموۆا عانا جەڭىس جولىن جالعاستىردى. ول بەلورۋس ۆيكتوريا كەبيكوۆادان 2:0 ەسەبىمەن ارتىق كورىندى.
جىگىتتەردىڭ ۇرىسىن باستاعان 56 كيلوعا دەيىنگى سالماقتاعى جانبولات تىلەگەن ۇلى ارميان گەنريك موكوياندى 2:1 ەتىپ ءسۇرىندىردى. 60 كيلوعا دەيىنگى سالماقتا يراقتىق اممار حاسسانمەن قولعاپ تۇيىستىرگەن جاقسىلىق ءىلياسوۆ 2:0 ەسەبىمەن جەڭدى. ال 64 كيلو سالماقتاعى عاني جايلاۋوۆ بۇل كۇنى ساتسىزدىككە ۇشىراعان جالعىز جىگىتىمىز بولدى. ول وزبەك فازليددين گايبنازاروۆقا 0:3 ەسەبىمەن جول بەردى. مۇنىڭ ەسەسىنە, بۇدان كەيىن شارشى الاڭعا شىققان ءۇش بوكسشىمىز دا ۇتىسقا جەتتى. اتاپ ايتقاندا, 75 كيلوداعى رۋستام سۆاەۆ برازيليالىق مايك كارۆاليۋدى 2:1,81 كيلوداعى نۇربول التاەۆ كوسوۆولىق ارمەند حاحاجدى 3:0, ال 91 كيلودان اۋىر سالماقتاعى قامشىبەك قوڭقاباەۆ يرلاند دين گاردينەردى 2:1 ەسەبىمەن ۇتىپ شىقتى.
27 اقپان كۇنى وينالعان جارتىلاي فينالدا جالعىز شايقاسقان قىزىمىز داريعا شاكىموۆا (75 كگ) قىتاي لي كياننان 0:2 بولىپ ۇتىلدى. ال جىگىتتەر اراسىنان رينگكە ءبىرىنشى بولىپ كوتەرىلگەن جانبولات تىلەگەن ۇلى ۋەلستىك سين ماكگولدريكتى 3:0 ەسەبىمەن تىزە بۇكتىردى. سودان كەيىن شارشى الاڭعا شىققان ءۇش بوكسشىمىز قاتارىنان ۇتىلىسقا تاپ بولدى. اتاپ ايتقاندا, جاقسىلىق ءىلياسوۆ (60 كگ) ارميان سامۆەل بارسەگياننان 1:2, رۋستام سۆاەۆ يرلاند مايكل و`رەيلليەن 0:2, نۇربول التاەۆ (81 كگ) بولگار رادوسلاۆ پانتەلەەۆتەن 1:2 ەسەپتەرىمەن جەڭىلدى. ءبىزدىڭ كوماندادان اقتىق سىنعا جولداما العان ەكىنشى سپورتشى 91 كيلودان اۋىر سالماقتاعى قامشىبەك قوڭقاباەۆ بولدى. ول گرۋزين ميحەيل باحتادزەنى 3:0 ەتىپ تىزە بۇكتىردى.
28 اقپان كۇنى قانات جايعان فينالدا ءبىزدىڭ ەكى جىگىتىمىز ونەر كورسەتىپ, ەكەۋى دە ۇتىلىپ قالدى. ولاردىڭ ەكەۋى دە وزبەك بوكسشىسىنان اسا المادى. الدىمەن 56 كيلو سالماقتاعى تارازدىق جانبولات تىلەگەن ۇلى وزبەكستاننىڭ 2013, 2014 جىلدارعى ەكى دۇركىن چەمپيونى مۋرودجون احماداليەۆتەن 1:2 بولىپ ۇتىلدى. اسا اۋىر سالماقتاعى قىزىلوردالىق قامشىبەك قوڭقاباەۆ تاعى سونداي ءوز ەلىنىڭ سوڭعى ەكى چەمپيوناتىنىڭ التىن جۇلدەگەرى باحودير جولولوۆتان 1-راۋندتا نوكاۋتپەن جەڭىلدى. ءبىر ايتا كەتەرلىگى, ءبىزدىڭ بۇل ەكى جىگىت تە ەشقاشان قازاقستاننىڭ چەمپيونى بولىپ كورمەگەن.
تۋرنيرگە ءوزىنىڭ ءبىرىنشى قۇرامىمەن بارعان وزبەكستان قۇراماسى ساپىنان فينالعا 8 بوكسشىسىن شىعاردى. ولاردىڭ 5-ەۋى قارسىلاستارىن جەڭىپ, باس جۇلدەگە قول جەتكىزدى. قالعان ءۇش بوكسشىنىڭ ىشىنەن تەك فازليددين گايبنازاروۆ قانا فينالدا ۇتىلدى. سوڭعىسى – باحودين جالولوۆ ءبىزدىڭ قامشىبەك قوڭقاباەۆتان نوكاۋتپەن جەڭىلدى. ول ازەربايجان ازاماتتىعىن العان كۋبالىق لورەنتسو سوتومايورعا ەسە جىبەرىپ الدى. ال وزبەك بوكسشىلارى قاتارىنداعى ەڭ جاسى ۇلكەنى جانە تاجىريبەلىسى ەلشود راسۋلوۆ شارشى الاڭعا شىقپاي-اق جەڭىستى بەردى.
سونىمەن فينالدىق شايقاستار بىلايشا اياقتالدى:
ەرلەر
49 كگ. ابدۋللا قۋچقاروۆ (وزبەكستان) – داۆيد البرديان (يزرايل) 2:1
52 كگ. شاحوبيددين زويروۆ (وزبەكستان) – دجەك باتەسون (انگليا) 3:0
56 كگ. مۋرودجون احماداليەۆ (وزبەكستان) – جانبولات تىلەگەن ۇلى (قازاقستان) 3:0
60 كگ. ەلۆين يساەۆ (ازەربايجان) – سامۆەل بارسەگيان (ارمەنيا) 2:1
64 كگ. لورەنتسو سوتومايور (ازەربايجان) – فازليددين گايبنازاروۆ (وزبەكستان) 3:0
69 كگ. سيمەون چاموۆ (بولگاريا) – ياروسلاۆ ساموفالوۆ (ۋكراينا) 2:1
75 كگ. بەكتەمير مەليكۋزيەۆ (وزبەكستان) – مايكل و`رەيللي (يرلانديا) 3:0
81 كگ. رادوسلاۆ پانتەلەەۆ (بولگاريا) – ەلشود راسۋلوۆ (وزبەكستان) WO
91 كگ: رۋستام تۋلاگانوۆ (وزبەكستان) – گەۆورگ مانۋكيان (ۋكراينا) 3:0
+91 كگ. قامشىبەك قوڭقاباەۆ (قازاقستان) تكو I – باحودين جالولوۆ (وزبەكستان)
ايەلدەر
51 كگ. ستويكا پەتروۆا (بولگاريا) – رەن كانكان (قىتاي) 3:0
54 كگ. ستانيمرا پەتروۆا (بولگاريا) – كريستينا كرۋز (اقش) 3:0
60 كگ. سۆەتلانا كامەنوۆا (بولگاريا) – ميرا پوتكونەن (فينليانديا) تكو I
64 كگ. انگەن الەكسيۋسون (شۆەتسيا) – ەلەنا ۆىستروپوۆا (ازەربايجان) 2:0
75 كگ. لي كيان (قىتاي) – نۋچكا فونتين (نيدەرلاندى) 2:1