ۇلتارالىق تاتۋلىق – الەمدى بەيبىتشىلىك بەسىگىندە تەربەپ تۇرۋشى بىردەن-ءبىر ماڭىزدى فاكتور. «الا قويدى بولە قىرىققان جۇنگە جارىمايدى» دەمەكشى, ءبارىن تەڭ كورۋ كەرەك, ول ءۇشىن ءاربىر ەلدەگى وزگە ۇلت وكىلدەرىنىڭ وتانعا دەگەن سۇيىسپەنشىلىگى باسىم بولۋى ءتيىس.
ءبىزدىڭ اۋدانىمىزدا دا ەل قاتارلى ءومىر ءسۇرىپ, ۇرپاقتارىن ءوربىتىپ, ورتاسىنا سىيلى دا قادىرلى بولىپ جۇرگەن وزگە ۇلت وكىلدەرى جەتەرلىك. سولاردىڭ ىشىندە حالىقتىڭ جىلى ىقىلاسىنا بولەنىپ, قازىرگى كۇندە زەينەت جاسىنا كەلگەن تاتار قىزى بيبينۇر تەمىربولاتوۆا, پولياك قىزى رايسا سوۆەتسكايا جانە قازاق قىزى روزا جەتپىسقىزىنىڭ ءجونى ءبىر باسقا. سەبەبى, بۇلاردىڭ ەكەۋى وزگە ۇلت وكىلدەرى بولا تۇرا, قازاقتىڭ امانعاليەۆتەر وتباسىنا كەلىن بولىپ تۇسكەندەرى.
بيبينۇر حۇسايىنقىزى جالپاقتال اۋىلىندا دۇنيەگە كەلەدى. جالپاقتال ورتا مەكتەبىندە ءبىلىم الادى. اپكەسى مايرا تالدىقۇدىق اۋىلىنا مەدبيكە بولىپ اۋىسۋىنا بايلانىستى بيبينۇر اپامىز وتباسىمەن قونىس اۋدارادى. بيبينۇر اجەي ورال قالاسىندا 10 ايلىق تىگىن ۋچيليششەسىن ءبىتىرىپ, ەلگە كەلىپ تىگىنشىلىكپەن شۇعىلدانادى. سونىمەن قاتار, قۇرىلىس سالاسىندا مايلاۋشى, سىلاقشى قىزمەتتەرىن دە اتقارعان. 1962 جىلى قازاق ۇلتىنىڭ جىگىتى ەرمەك امانعاليەۆپەن وتباسىن قۇرىپ, سەگىز بالانى دۇنيەگە اكەلەدى.
ال پولياك قىزى رايسا پەتروۆنا بولسا, 1949 جىلى ۋكراينانىڭ ۆيننيتسا وبلىسىنداعى, تۋربوۆسكي اۋدانىنا قاراستى كۋروۆكا سەلوسىندا دۇنيەگە كەلەدى. كەڭەس وكىمەتىنىڭ قازاقستاندا تىڭ جانە تىڭايعان جەرلەردى يگەرۋ كەزىندە رايسا اجەنىڭ وتباسى دا قازاقستانعا قونىس اۋدارىپ, تالدىقۇدىق اۋىلىنا كوشىپ كەلەدى. وسى جەردە ءبىلىم الادى. مەكتەپتى تامامداعان سوڭ اۋىلدا ءتۇرلى سالادا ەڭبەك ەتەدى. 1967 جىلى مەحانيزاتور مۇستافا امانعاليەۆكە تۇرمىسقا شىعىپ, 9 بالانى دۇنيەگە اكەلەدى. مۇستافا اعامىز ومىردەن ەرتە وتەدى دە, ورىمدەي بالالارىن ءوزى تاربيەلەپ ەر جەتكىزەدى.
سونىمەن قاتار, مۇزافار امانعاليەۆ اعانىڭ زايىبى روزا جەتپىسوۆا اپايىمىز جاڭاقالا اۋدانىندا دۇنيەگە كەلگەن. ەسەپشى بولىپ قىزمەت ەتەدى. مۇزافار اعا ەكەۋى 4 بالا تاربيەلەپ وسىرگەن.
جەرگىلىكتى جۇرتپەن بىتە قايناسىپ كەتكەن ولاردىڭ جۇزدەرى باسقا بولعانىمەن, جۇرەگى ءبىر. ال ەلىمىزدەگى بىرلىك, تاتۋلىق, كەلىسىمنىڭ باياندى بولۋىن تىلەيتىن انالاردىڭ ءتىلى دە ءبىر بولىپ كەتكەندەي. ولار قازاق ءتىلىن – ۇلت پەن ۇلىستى بىرىكتىرۋشى, ۇيىستىرۋشى, ءتۇسىندىرۋشى, ءبىر-بىرىمەن ۇعىستىرۋشى قۇرالعا اينالعان مەملەكەتتىڭ ەڭ باستى تەتىگى دەپ سانايدى.
بيبينۇر اپامىزبەن تىلدەسكەندە: «قازاقتا بىرلىك بولماي, تىرلىك بولمايدى» دەگەن ۇلاعاتتى ۇعىم بار. ماعان ەلىمىزدە بەيبىت ءومىر ءسۇرىپ جاتقان ۇلتتار مەن ۇلىستاردىڭ تاتۋلىعى ارتىپ, قازاقستانىمىزدىڭ نىعايىپ, وركەندەۋىنەن اسقان باقىت جوق. ءبىز كىندىك قانىمىز تامعان جەردە تۇرامىز جانە وسىندا ءومىر ءسۇرىپ, ءوسىپ-ونەمىز, ادەت-عۇرپىمىزدى, مادەنيەتىمىزدى جانە ءتىلىمىزدى ۇستانامىز. قازاق جەرىن مەكەن ەتكەن ۇلتتاردىڭ بارىنە وسىنداي مۇمكىندىك بەرىلگەن. وسى ءۇشىن قازاق حالقىنا, ەلباسىمىزعا مىڭ العىس ايتامىز», – دەپ اعىنان جارىلدى.
سونىمەن قاتار, رايسا پەتروۆنا دا بىلاي دەيدى اعىنان جارىلا: «ماقساتىمىز – ورتاق, مۇراتىمىز – ءبىر, سوندىقتان كەلەشەگىمىزدىڭ كەمەلدەنۋىنە كەپىل بولاتىن تاتۋلىق پەن دوستىقتىڭ دىڭگەگىن بيىكتەتۋ بارشامىزدىڭ پارىزىمىز. ويتكەنى, ءبىز راسىندا كوپۇلتتى مەملەكەتتە, ونىڭ ىشىندە ءوز شاڭىراعىمىزدا بىرنەشە ۇلتتىڭ ادامدارىمەن بىرگە تۇرامىز. وسى سەبەپتى, ەلدىڭ اۋىزبىرشىلىگى مەن تاتۋلىعىن بارلىعىنان جوعارى قويامىز. قازاق حالقىمەن قۇدا بولعانىمىزعا دا بىرنەشە جىل بولدى. ولار قۇداسىن قۇدايىنداي قۇرمەتتەيدى. بۇل وڭىردە جەرگىلىكتى ۇلت قازاق بولعاندىقتان, ۇيدە قازاقشا سويلەپ, ۇلتتىق ءداستۇردى ۇستانامىز. توي-جيىندارعا, مادەني شارالار مەن كونتسەرتتەرگە بىرگە بارامىز. اپتا سايىن داستارقان باسىندا كەزدەسىپ, اڭگىمە-دۇكەن قۇرامىز».
تالدىقۇدىق اۋىلىندا ءبىر شاڭىراق استىندا باس قوسقان ءتۇرلى ۇلت وكىلدەرى وسىلايشا باقىتتى ءومىر سۇرۋدە. ولارمەن ديدارلاسىپ, اڭگىمەلەسۋ بارىسىندا ارقايسىسىنىڭ جۇرەگى قازاق, ەلىم, جەرىم دەپ سوعاتىنىن بايقادىق. بۇل – ءبىزدىڭ تاۋەلسىزدىكپەن بىرگە جەتكەن سىيىمىز. ەندىگى ۋاقىتتا بۇل قۇندىلىقتاردى ۇرپاقتان-ۇرپاققا جالعاۋ – بارشامىزدىڭ ورتاق مىندەتىمىز.
گاۋھار ادىلجانقىزى.
باتىس قازاقستان وبلىسى,
قازتالوۆ اۋدانى.