بۇل ويدى بارشا قازاقستاندىقتار قۋاتتايدى
كەشە استاناداعى س.سەيفۋللين اتىنداعى قازاق اگروتەحنيكالىق ۋنيۆەرسيتەتىندە «ەلىن سۇيگەن, ەلى سۇيگەن – ەلباسى» اتتى پاتريوتتىق تەاترلاندىرىلعان فلەش-موب ءوتتى. شارا بارىسىندا قازاتۋ-دىڭ ستۋدەنتتەرى ۇستىمىزدەگى جىلدىڭ 26 ءساۋىرى كۇنى وتەتىن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا جاستاردى بەلسەندى اتسالىسۋعا شاقىرعان ۇندەۋ جاريالادى. وقۋ ورنىندا ۇيىمداستىرىلعان كەڭ اۋقىمدى شاراعا قازاقستان حالقى اسسامبلەياسى توراعاسىنىڭ ورىنباسارى اناتولي باشماكوۆ, «نۇر وتان» پارتياسىنىڭ حاتشىسى فارحاد قۋانعانوۆ, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ رەكتورى اقىلبەك كۇرىشباەۆ, پارلامەنت ءماجىلىسىنىڭ دەپۋتاتى باقىتبەك سماعۇل, استانا قالاسى اكىمىنىڭ ورىنباسارى ەرمەك امانشاەۆ, ت.ب. قاتىستى. اقىلبەك كۇرىشباەۆ, قازاتۋ رەكتورى: – بۇگىن ءبىزدىڭ ستۋدەنتتەرىمىز ەلىمىزدەگى ەڭ باستى ساياسي وقيعا – كەزەكتەن تىس پرەزيدەنتتىك سايلاۋعا قاتىستى وزدەرىنىڭ ازاماتتىق بەلسەندىلىكتەرىن كورسەتتى. ءبىزدىڭ جاستارىمىز قوعامىمىزداعى وڭ وزگەرىستەردىڭ بارلىعى ەلباسى نۇرسۇلتان نازارباەۆتىڭ اتىمەن تىكەلەي بايلانىستى ەكەنىن جاقسى تۇسىنەدى. مەملەكەت باسشىسىنىڭ سارابدال دا ساليقالى ساياساتىنىڭ ارقاسىندا ەلىمىزدە جەكە ادامنىڭ ۇيلەسىمدى دامۋىنا, جاستاردىڭ ينتەللەكتۋالدىق الەۋەتىنىڭ تولىقتاي اشىلۋىنا بارلىق جاعداي جاسالعان. جوعارى ءبىلىم بەرۋ سالاسىندا دا تۇبەگەيلى وزگەرىستەر ءجۇردى. ماسەلەن, ءبىزدىڭ ۋنيۆەرسيتەتىمىز ءۇش جىل ىشىندە الەمدەگى جەتەكشى ۋنيۆەرسيتەتتەر رەيتينگىندەگى توپ-700-ءدىڭ قاتارىنا ەندى. ءسويتىپ, عىلىمي-زەرتتەۋ جوو اتاندى. عىلىمدى قارجىلاندىرۋ سوڭعى ءۇش جىلدا سەگىز ەسەگە ۇلعايدى. وسىلايشا, جاس وقىتۋشىلارىمىز بەن ستۋدەنتتەرىمىز ءبىزدىڭ قابىرعامىزدا ءجۇرىپ-اق سالماقتى عىلىمي-زەرتتەۋلەرمەن اينالىسىپ, يننوۆاتسيالىق جوبالار جاساۋعا مۇمكىندىك الدى. ءبىزدىڭ بارلىعىمىز پرەزيدەنتپەن بىرگە «قازاقستان-2050» ستراتەگياسىندا بەلگىلەنگەن كورسەتكىشتەرگە قول جەتكىزەتىنىمىزگە سەنىمدىمىن. ويتكەنى, بۇگىندە ەلىمىزدە جوعارى بىلىكتى جاس كادرلار مەن ءوز ەلىنىڭ شىنايى پاتريوتتارى ءوسىپ كەلەدى. ماقسات ەسماعۇلوۆ, قازاتۋ-دىڭ 4-كۋرس ستۋدەنتى: – مەن بولاشاق جاس مامان ينجەنەر رەتىندە ەلىمىزدە جوعارى ءبىلىم الۋ ءۇشىن بارلىق جاعداي جاسالعانىن ەرەكشە اتاپ كورسەتكىم كەلەدى. ءبىز ءاردايىم مەملەكەتتىڭ قولداۋىن ايقىن سەزىنۋدەمىز. ەلباسى نۇرسۇلتان نازارباەۆتىڭ دانا دا سالماقتى ساياساتىنىڭ ناتيجەسىندە ەلىمىز كۇن وتكەن سايىن دامۋ ۇستىندە. سوندىقتان ءوز باسىم تۇڭعىش پرەزيدەنتىمىز جۇرگىزىپ كەلە جاتقان ساياساتتىڭ جالعاستىرىلعانىن قالايمىن. ەلىمىزدىڭ جەدەل دامۋى مەن قازاقستاندىقتاردىڭ ءال-اۋقاتىنىڭ ارتۋىنا بايلانىستى مەن قازاقستان جاستارىن 26 ءساۋىر كۇنى وتەتىن كەزەكتەن تىس پرەزيدەنتتىك سايلاۋدى جان-جاقتى قولداۋعا شاقىرامىن. ەگەر مەنەن قازىر قازاقستان پرەزيدەنتتىگىنە كانديداتتار قاتارىنان كىمدى كورگىڭىز كەلگەن بولار ەدى دەپ سۇراسا, مەن ويلانباستان-اق ەلىمىزدى ءارى قاراي دا پرەزيدەنت نۇرسۇلتان نازارباەۆتىڭ باسقارعانىن قالايتىنىمدى ايتار ەدىم. ءويتكەنى, ەلباسىنىڭ دانا ساياساتىنىڭ ءناتيجەسىندە ەلىمىز الەمدەگى تۇراقسىز احۋالدارعا قاراماستان, ءوزىنىڭ بىرقالىپتى دامۋ باعىتىنان اينىعان ەمەس. مۇمكىندىكتى پايدالانىپ, ەلباسى نۇرسۇلتان نازارباەۆتان الداعى پرەزيدەنتتىك سايلاۋعا ءتۇسۋ ءۇشىن ءوزىنىڭ كانديداتۋراسىن ىلگەرىلەتۋدى وتىنەر ەدىم. ءويتكەنى, مەن ءوزىمنىڭ بولاشاعىم مەن ەلىمنىڭ بولاشاعىن تۇڭعىش پرەزيدەنت نۇرسۇلتان نازارباەۆتىڭ قولىنا تولىق سەنىممەن تاپسىرا الامىن. ساۋلەبەك ءبىرجان. سۋرەتتى تۇسىرگەن ەرلان وماروۆ.* جەدەلسوز – بەدەلسوز
بەكبولات مۇقىشەۆ, «ارداگەرلەر ۇيىمى» رەسپۋبليكالىق قوعامدىق بىرلەستىگى توراعاسىنىڭ ورىنباسارى: – بۇگىندە الەمدە قارجى-ەكونوميكالىق داعدارىستىڭ جاڭا تولقىنى كورىنىس بەرۋدە, گەوساياسي شيەلەنىستەر اسقىنا تۇسۋدە, قاراما-قايشىلىقتار مەن قاۋىپ-قاتەرلەر ۋشىققان جاڭا ايماقتار پايدا بولۋدا. وسىنداي حالىقارالىق جاعدايدا قازاقستان بۇرىنعىسىنان دا بەرىك, ىنتىماقتاستىعى بەكەم بولۋى قاجەت. پرەزيدەنتتىك سايلاۋدىڭ قوعامنىڭ بارلىق تاراپتارىن بىرىكتىرىپ, نىعايتىپ, «نۇرلى جول» باعدارلاماسى نىق ادىمداپ العا باستايتىندىعىنا سەنىمدىمىز. وسى جەردە اتاپ كورسەتەتىن ءبىر جايت بار. ول – ەلباسى نۇرسۇلتان نازارباەۆتىڭ 26 ساۋىرگە بەلگىلەنگەن پرەزيدەنتتىك سايلاۋعا ءوزىنىڭ كانديداتۋراسىن ۇسىنۋ ماسەلەسى. بۇل – بارشا قازاقستاندىقتاردىڭ كوكەيىندەگى ماسەلە. باقىتجان ەرتاەۆ, پارلامەنت ءماجىلىسىنىڭ دەپۋتاتى, حالىق قاھارمانى: – قازىرگى تاڭدا قازاق ەلى بەيبىتشىلىكتە ءومىر ءسۇرىپ جاتىر. ەل قورعانى – قارۋلى كۇشتەرىمىزدىڭ زامان تالابىنا ساي اسكەري تەحنيكامەن جاراقتاندىرىلعانى دا كوڭىلگە ۇلكەن مەدەۋ. بۇگىندە حالقىمىز ەلىمەن ماقتانسا, بۇكىل ساربازدارى مەن ساردارلارى وتان الدىنداعى جاۋاپكەرشىلىگىن جاقسى سەزىنەدى جانە ولار تۋعان وتاندارىن قورعاۋعا دايىن ەكەندىكتەرىن اركەز ىستەرىمەن دالەلدەپ تە ءجۇر. قازىرگى كەزدە قازاقستاندىقتاردىڭ ويىن ءبىر عانا ماسەلە مازالاسا كەرەك. ول – ەلباسىنىڭ ءوز كانديداتۋراسىن پرەزيدەنتتىككە ۇسىنۋى. پرەزيدەنت حالىق قالاۋىنا تۇسىنىستىكپەن قارايدى دەپ ۇمىتتەنەمىز. سوندىقتان بارشا قازاقستاندىقتاردى 2015 جىلعى 26 ءساۋىر كۇنى وتەتىن پرەزيدەنتتىك سايلاۋعا ءبىر كىسىدەي قاتىسۋعا شاقىرامىز. باقىتبەك سماعۇل, پارلامەنت ءماجىلىسىنىڭ دەپۋتاتى: – بىزدەر, اۋعان سوعىسى ارداگەرلەرى ۇيىمدارىنىڭ, قازاقستان ارداگەرلەرى قاۋىمداستىعىنىڭ وكىلدەرى نۇرسۇلتان ءابىش ۇلى نازارباەۆتىڭ پرەزيدەنتتىك سايلاۋ وتكىزۋ تۋرالى شەشىمىن تولىق قولدايمىز ءجانە مەملەكەت باسشىسىن قولداپ قانا قويماي, پرەزيدەنتتىككە كانديدات رەتىندە ءتىركەلگەنىن قالايمىز. قازاقستاندىقتاردى ەلىمىزدىڭ بولاشاعى جولىندا تاريحي تاڭداۋ جاسايتىن شاق كۇتىپ تۇر. ءوز باسىم مۇنى بەكەرگە ايتىپ وتىرعانىم جوق. ەلباسى پرەزيدەنتتىكتەن ۇمىتكەر رەتىندە سايلاۋعا تۇسەدى دەپ ۇمىتتەنەمىن. بۇل ءبىزدىڭ كۇردەلى كەزەڭدە قوعامدى توپتاستىرۋعا سەپتىگىن تيگىزىپ قانا قويماي, «نۇرلى جول» باعدارلاماسىن, باسقا دا جوسپارلاردى تابىستى جۇزەگە اسىرۋعا العىشارت جاسايتىنى انىق. ابىلاي مىرزاحمەتوۆ: قازاقستان ۇلتتىق كاسىپكەرلەر پالاتاسىنىڭ باسقارما توراعاسى: – ۇلتتىق كاسىپكەرلەر پالاتاسى مەملەكەت باسشىسى نۇرسۇلتان نازارباەۆتىڭ ەلىمىزدە كەزەكتەن تىس پرەزيدەنتتىك سايلاۋدى وسى جىلى وتكىزۋ تۋرالى شەشىمىن تولىعىمەن قولداعان بولاتىن. ەندى پرەزيدەنت سايلاۋ وتەتىن كۇندى دە تاعايىنداپ بەرىپ وتىر. وسى ورايدا, قازاقستان كاسىپكەرلەرى, باسقا دا وتانداستارىمىز سەكىلدى, پرەزيدەنتتىك سايلاۋعا ەلباسى دا ءوزىنىڭ كانديداتۋراسىن ۇسىنعانىن قالايدى. وسى ارادا ءبىر اتاپ كورسەتەرىم, قازاقستاندىق كاسىپكەرلەر ءار ۋاقىتتا ەلىمىزدىڭ تۇراقتىلىعىن, سونىڭ ىشىندە ەكونوميكاسىنىڭ قارقىندى دامۋىن, شاعىن جانە ورتا بيزنەستىڭ كەڭ قانات جايۋىن قولداپ كەلدى جانە ءارى قاراي دا قولداي بەرمەك. ەلباسىنىڭ جۇرگىزىپ كەلە جاتقان سارابدال ساياساتىنىڭ ناتيجەسىندە وتانىمىزدىڭ الداعى ۋاقىتتاردا دا العان باعىتىنان اۋىتقىماي, تەك نىق قاداممەن ىلگەرى جىلجي بەرەتىنى كۇمانسىز. نۇرلان ەرىمبەتوۆ, قازاقستان ازاماتتىق اليانسىنىڭ پرەزيدەنتى: – ەلباسىنىڭ ۇندەۋىن ۇلكەن قۋانىشپەن قابىلدادىم. جاسىراتىنى جوق, كۇتكەن ۇندەۋىم ەدى, ءۇمىتىم اقتالدى. بايقاعانىم, مەنىڭ دوستارىم, اعايىن-تۋىستارىم, ءوزىم جەتەكشىلىك ەتەتىن ازاماتتىق قوعامنىڭ بەلسەندىلەرى – ءبارى-ءبارى وسى ۇندەۋدى قولدادى. سەبەبى, قازىر كوپ جەردە داعدارىستار, قاقتىعىستار ورىن الىپ جاتىر. بىزگە قازىر تۇراقتىلىق كەرەك. الدىمىزدا تۇرعان ۇلكەن جوسپارلارىمىزدى اياعىنا دەيىن جەتكىزۋىمىز قاجەت. ال مۇنىڭ ەلىمىزگە پرەزيدەنت نۇرسۇلتان نازارباەۆ باسشىلىق جاساعان جاعدايدا عانا جۇزەگە اسۋى ىقتيمال ەكەنى ايتپاسا دا تۇسىنىكتى. سوندىقتان ازاماتتىق قوعامنىڭ وكىلدەرى دە, بارشا قازاقستاندىقتار سەكىلدى, نۇرسۇلتان ءابىش ۇلىنىڭ ۇستىمىزدەگى جىلدىڭ 26 ساۋىرىنە بەلگىلەنگەن پرەزيدەنتتىك سايلاۋعا قاتىسقانىن قالايدى.