ءوڭى تۇگىل, تۇسىنە كىرمەگەن توسىن قۋانىشتى جاي الدان شىعارى, ءوزى اعىنان جارىلا ايتقانداي, سول كۇنى ميسوچەنكو اجەيدىڭ قاپەرىندە جوق ەدى. ءتورت بالاسىنىڭ ۇيدەگى كەنجەسى كەنەت تەلەديداردىڭ داۋىسىن كوتەرىڭكىرەپ: «ماما, ءسىز پرەزيدەنتكە حات جازىپ پا ەدىڭىز. ءسىزدى ايتىپ جاتىر», دەگەندە سەنەر-سەنبەسىن بىلمەي, اپىل-عۇپىل جاقىنداي ءتۇسىپ تىڭداعاندا, راس ەكەن. وسىنىڭ الدىندا قازاقستان حالقى اسسامبلەياسى كەڭەسى مۇشەلەرىنىڭ كەزەكتەن تىس پرەزيدەنتتىك سايلاۋ وتكىزۋ جونىندەگى ۇسىنىسىنا ريزالىقپەن ءوزىنىڭ, بالالارى مەن نەمەرەلەرىنىڭ باقىتتى ومىرىندەي بارشا جۇرت جاقسى تۇرمىسى, بىرلىگى مەن تىنىشتىعى ءۇشىن ەرەن ەڭبەگىنە العىس ءبىلدىرىپ جازعان حاتى مازمۇنىن ەلباسى اۋزىنان بىرگە ەستىپ, ءاپ-ساتتە انالارىنىڭ بۇتكىل ەل الدىندا مەرەيى اسۋى شاتتىققا بولەنگەن ۇلكەن شاڭىراققا ۇمىتىلماس وقيعا بولىپ قالىپتى. اسىل اجەلەرىن ايمالاعان, اجەلەرى قۇلاقتارىنا قۇيىپ وتىراتىنداي ەرتەڭدەرىنە الاڭسىز جەتكىنشەكتەردىڭ ماقتانىشى, اسىرەسە, بولەك ەكەنى سەزىلدى.
– ءبارىمىزدى ورتاق ماقسات, ءبىر تىلەككە ۇيىستىرعان تۇڭعىش پرەزيدەنتىمىز ن.ءا.نازارباەۆقا انالىق شىن جۇرەكتەن ءتاڭىر جارىلقاسىن ايتىپ, ريزاشىلىعىمدى بىلدىرگىم كەلدى. الداعى جىلى جاراتقان اماندىعىن بەرسە, سەكسەنگە تولعالى وتىرمىن. جاس كەزىمدە قازاقستانداي قۇشاعى كەڭ, باۋىرمالدىعى ىستىق ەلگە تامىر تارتۋعا جازعان تاعدىرىما تاۋبە ەتەمىن. تۇرعىلىقتى حالىقتىڭ ەشكىمدى جاتىرقامايتىن, مەيماندوس, اقكوڭىل قاسيەتى مۇلدەم باۋراپ, وسىناۋ عاجايىپ ەلدە ءبىرجولا تۇراقتاپ قالدىم. وسىناۋ ءۇردىس ۇلگىسى ۇزىلمەي كەلە جاتۋىنا قۋانىشتىمىن. سونى كەرەمەت جاراستىرىپ, ءبارىمىزدىڭ تاتۋ-ءتاتتى ءومىر ءسۇرۋىمىزدى ۇيلەستىرىپ, كەلەشەكتىڭ كەمەل بولۋىنا باستاعان نۇرسۇلتان ءابىش ۇلى نازارباەۆتىڭ ەرەن ەڭبەگىنە العىس قاشاندا شەكسىز. پرەزيدەنتتىك سايلاۋدىڭ وتكىزىلۋى جونىندەگى حالىقتىڭ قالاۋىن قولداپ, شەشىم شىعارىلۋى تىلەگىمىزگە ساي بولدى. ەل سەنىمى مەملەكەت باسشىسىنا ارتىلاتىندىعىنا, ءوز باسىم سونى قالايتىنىمدى تاعى ءبىر ايتقىم كەلەدى, – دەدى نينا الەكسەەۆنا بۇقارالىق اقپارات قۇرالدارى وكىلدەرىمەن كەزدەسۋدە.
بۇل كىسىنىڭ ەسىمى بۇعان دەيىن دە قاراعاندىلىقتارعا بەيمالىم ەمەس-ءتىن. وتكەن عاسىردىڭ 60-شى جىلدارى باسىندا قوساعى پەتر پروكوپەۆيچ ميسوچەنكومەن قول ۇستاسىپ سوناۋ بەلورۋسسيادان ءوندىرىس ەكپىنى الىسقا جاڭعىرعان جاس قالاعا كەلگەندە ەكەۋى دە قىز-قىز قايناعان قۇرىلىس جۇمىستارىنا اتسالىسۋدى تاڭداعان بولاتىن. ومىرلىك سەرىگى عۇمىرىنىڭ اياعىنا دەيىن سۇيىكتى ىسىنەن قول ۇزبەدى. كەنشىلەر شاھارىندا سول ۋاقىتتاردا سالىنعان اسەم تۇرعىن ۇيلەر مەن ءزاۋلىم عيماراتتاردىڭ كوبىندە قولتاڭباسى قالۋىمەن تانىلعان قۇرىلىسشى اتاندى. ول قابىرعالارىن شەبەرلىكپەن قالاۋمەن اينالىسسا, ىسكە شيراق نينا ءىشىن اسپەتتەۋدە الدىنا جان سالمادى. بۇگىندە نۇركەن ءابدىروۆ, بۇقار جىراۋ, بەيبىتشىلىك داڭعىلى سياقتى قالانىڭ ەڭ كورىكتى كوشەلەرىن نەمەرەلەرىنە كورسەتىپ, بۇلاردى ءبىز سالدىق دەپ مارقايىپ قوياتىنى دا سوندىقتان.
شۇكىر, وتباسىنداعى ونەگەلى تاربيەنىڭ, ادال ەڭبەككە باۋلۋدىڭ ارقاسىندا بالالارىنىڭ ءبارى ومىردەن ءوز جولدارىن تاپتى. ارقايسىسى جەكە-جەكە وتاۋ يەسى, ورتالارىنا سىيلى ازاماتتار قازىر. ولاردان تاراعان 7 نەمەرە مەن 8 شوبەرەسىنىڭ, قانى بەلورۋستىق, جۇرەگى قازاقستاندىق ميسوچەنكولار اۋلەتىنىڭ قازاق جەرىندە تۇپكىلىكتى تامىرلانۋىنا قۋانادى نينا الەكسەەۆنا.
سەكسەن دەگەن جاسىنا قاراپ ونى جان كۇيتتەگەن جان دەپ ويلاپ قالۋعا بولمايدى. وبلىستىق بەلورۋس «سپادچىنا» ەتنومادەني بىرلەستىگىنىڭ بەلسەندى مۇشەسى رەتىندە قوعامدىق ءىس-شارالاردىڭ بەل ورتاسىندا جۇرۋىمەن دە تانىمال. قانشا ايتقانمەن, جاقسىلىقتى كوڭىلگە توقىعان ادام عوي, ىنتىماقتاستىققا, بىرلىككە ۇندەگەن اقىل-كەڭەستەرى التىنداي باعالانادى. ءالى دە ساقتالعان ادەمى داۋىسىمەن ۇلتتىق اندەردى شىرقاعاندا قانداستارىنىڭ جان-دۇنيەسىن جادىراتادى. انا ءتىلىن ۇيرەنۋشىلەر ۇيىرىلەدى جانىنا.
دوستىق وسىنداي ويلى, كوكىرەگى تازا, ارلى ادامدار ارقىلى دانەكەرلەسەر ەمەس پە! «دوس تۇتقاندى قادىرلە» دەيدى حالىق. مۇنداي قۇرمەتكە لايىق وسى ءبىر قاراپايىم كەيۋانانىڭ شىنايى ازاماتتىق سەزىمى, وتانشىلدىق پاك نيەتى ءتانتى قىلادى ءبارىن. ءار ەتنوستىڭ سالت-ءداستۇرىن ساقتاۋعا, مادەنيەتىن وركەندەتۋگە بارلىق جاعدايدى جاساپ وتىرعان, حالقىنىڭ جۇرەگىنە جول تابا بىلگەن ەلباسىنا دەگەن ريزاشىلىقتارى شەكسىز.
ايقىن نەسىپباي,
«ەگەمەن قازاقستان».
قاراعاندى.