بۇگىن قازاقستاندا انالار كۇنى تويلانىپ جاتىر

بۇعان دەيىن ەلىمىزدە انالار كۇنى قىركۇيەك ايىندا تويلاناتىن. الايدا, ۇكىمەتتىڭ 2023 جىلعى 31 مامىرداعى قاۋلىسىنا سايكەس, مەرەكە مامىر ايىنىڭ ەكىنشى جەكسەنبىسىنە بەكىتىلدى. مەرەكە داتاسى حالىقارالىق ستاندارتتارعا سايكەستەندىرۋ ماقساتىندا اۋىستى.

انالار كۇنىن مامىردىڭ ەكىنشى جەكسەنبىسىندە تويلاۋ ءداستۇرى الەمنىڭ 20-دان استام ەلىندە قالىپتاسقان. ولاردىڭ قاتارىندا اقش, كانادا, گەرمانيا, يتاليا, تۇركيا, جاپونيا, برازيليا مەن اۋستراليا سياقتى مەملەكەتتەر بار. 

ەلىمىزدە انالاردىڭ مارتەبەسىن كوتەرىپ, وتباسى ينستيتۋتىن نىعايتۋ باعىتىندا قازاقستان حالقى اسسامبلەياسى جانىنان «انالار كەڭەسى» قۇرىلعان. 

بۇگىندە رەسپۋبليكا بويىنشا انالار كەڭەسىنىڭ 1 713 بولىمشەسى جۇمىس ىستەيدى, ونىڭ ىشىندە 17 وبلىستىق, 56 قالالىق, 159 اۋداندىق جانە 1 481 اۋىلدىق ءبولىم بار, ال كەڭەس قۇرامىندا 16 051 ايەل قىزمەت اتقارادى.

2024 جىلعى ۇلتتىق بايانداماعا سايكەس, قازاقستاندىقتاردىڭ باسىم بولىگى انالارعا ارنالعان مەملەكەتتىك قولداۋ شارالارى تۋرالى حاباردار. كوپبالالى انالارعا ارنالعان جاردەماقىنى 81,3% بىلەدى. اتاۋلى الەۋمەتتىك كومەكتى – 76,1%, جۇكتىلىك جانە بوسانۋ دەمالىسىن – 73,5%, بالا تۋعانداعى بىرجولعى تولەمدى – 71,4% حالىق بىلەدى.

ايدا بالاەۆا: قازاق دۇنيەتانىمىندا انا بەينەسى قاشاندا ايرىقشا قاستەرلەنگەن

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, وتكەن جىلى بالا تۋعان كەزدەگى بىرجولعى جاردەماقىنى 338 مىڭ ادام العان. بۇل ماقساتقا 61,1 ملرد تەڭگە جۇمسالعان.

سونىمەن قاتار جۇمىس ىستەيتىن ايەلدەرگە مەملەكەتتىك الەۋمەتتىك ساقتاندىرۋ قورىنان بالا 1,5 جاسقا تولعانعا دەيىن اي سايىنعى الەۋمەتتىك تولەم بەرىلەدى. ال جۇمىس ىستەمەيتىن ايەلدەرگە بالا كۇتىمى بويىنشا مەملەكەتتىك جاردەماقى قاراستىرىلعان.

ەڭبەك زاڭناماسى اياسىندا انالارعا قىسقارتىلعان جۇمىس كۇنى, اقىلى ءۇزىلىس جانە تولىق ەمەس جۇمىس ۋاقىتى ءتارتىبى سياقتى جەڭىلدىكتەر ۇسىنىلادى.

سوڭعى جىلدارى بالا كۇتىمى بويىنشا تولەم مەرزىمى 12 ايدان 18 ايعا دەيىن ۇزارتىلىپ, كوپبالالى جانە ەرەكشە بالا تاربيەلەپ وتىرعان وتباسىلارعا ارنالعان جاڭا قولداۋ تەتىكتەرى ەنگىزىلدى.

انالار كۇنى – تەك قۇتتىقتاۋ ايتىلاتىن كۇن ەمەس. بۇل – انانىڭ قوعامداعى ءرولىن باعالاپ, ونىڭ ءومىر ساپاسىن جاقسارتۋ جولدارىن ويلاستىراتىن ماڭىزدى داتا. ويتكەنى مىقتى انا – مىقتى وتباسى. ال مىقتى وتباسى قۋاتتى مەملەكەتتىڭ نەگىزى بولىپ قالا بەرمەك.