15 مامىر كۇنى استانا قالاسىندا قازاقستان رەسپۋبليكاسى قارۋلى كۇشتەرى اۋە قورعانىسى كۇشتەرىنىڭ جوسپارلى ءىس-شارالارى وتەدى. وسىعان وراي ەلوردا اسپانىندا جويعىش ۇشاقتاردىڭ دەمونستراتسيالىق ۇشۋى ۇيىمداستىرىلادى, دەپ حابارلايدى Egemen.kz.
ءىس-شارانىڭ جوعارى دەڭگەيدە ءوتۋىن قامتاماسىز ەتۋ ماقساتىندا 10 مامىردان باستاپ اۋە كەڭىستىگىندە اسكەري اۆياتسيانىڭ دايىندىق جۇمىستارى مەن جاتتىعۋ ۇشۋلارى باستالادى.
قورعانىس مينيسترلىگى ۇشۋ ءىس-شارالارىنىڭ قالا تۇرعىندارى ءۇشىن تولىقتاي قاۋىپسىز ەكەنىن اتاپ ءوتتى.
كولۋمبيادا اسكەري ۇشاق اپاتقا ۇشىرادى: 66 ادام قازا تاپتى
«جويعىش ۇشاقتاردىڭ ۇشۋى مەن جاتتىعۋ ءىس-شارالارى قاۋىپسىز بيىكتىكتە جۇزەگە اسىرىلادى جانە قالا تۇرعىندارىنىڭ كۇندەلىكتى تىنىس-تىرشىلىگىنە كەدەرگى كەلتىرمەيدى.ەلوردا تۇرعىندارى مەن قوناقتارىنان جاتتىعۋلار مەن دەمونستراتسيالىق ۇشۋ كەزەڭىندە تۋىنداۋى مۇمكىن قىسقا مەرزىمدى شۋ دەڭگەيىنىڭ ارتۋىنا تۇسىنىستىكپەن قاراۋدى سۇرايمىز», دەلىنگەن حابارلامادا.
دەمونستراتسيا كەزىندە قولدانىلاتىن ءتۇرلى ءتۇستى تۇتىندەر تەك شوۋدىڭ كوركەمدىك سيپاتىن ارتتىرۋعا ارنالعان. ولاردىڭ قورشاعان ورتاعا نەمەسە ادام دەنساۋلىعىنا ەشقانداي زيانى جوق.
بارلىق ۇشۋلار قاۋىپسىزدىك تالاپتارىنا قاتاڭ سايكەس ۇيىمداستىرىلعان جانە حالىققا ەشقانداي قاۋىپ توندىرمەيدى.