استانا. 27 ماۋسىم. استانادا فۋتبولدان 17 جاسقا دەيىنگى جاسوسپىرىمدەر اراسىندا وتكەن قازاقستان پرەزيدەنتىنىڭ كۋبوگى ءۇشىن تۋرنيردە يسپانيا جاستارى جەڭىمپاز اتاندى. ولار فينالدا ازەربايجاندى ويىن سوڭىنداعى پەنالتي ارقىلى جەڭدى. ال قازاقستان قۇراماسى قولا جۇلدەگە تالاستا گرۋزيادان 1:8 ەسەبىمەن ويسىراي جەڭىلدى. بۇل تۋرالى egemen.kz حابارلادى.
فينالدىق باسەكە اسا تارتىستى ءوتتى. سوعان قاراماستان, قارسىلاستار ءبىرىنشى تايمدا ءبىر-ءبىرىنىڭ وسال تۇسىن تابا المادى. ال كەزدەسۋدىڭ ەكىنشى بولىگىندە ازەربايجان جاستارى ەسەپ اشىپ كەتتى. الايدا, يسپاندار كوپ ۋاقىت وتپەي جاتىپ تارازى باسىن تەڭەستىردى. قوس گولدىڭ دا اۆتورى كوماندا كاپيتاندارى ەكەنىن ايتا كەتەيىك.
ناتيجەسىندە تۋرنير جەڭىمپازى ويىن سوڭىنداعى پەنالتي ارقىلى انىقتالدى. بۇل سىندا يسپانيا قۇراماسىنىڭ باعى باسىم بولىپ, 4:1 ەسەبىمەن جەڭىسكە جەتتى. وسىلايشا پيرەنەي تۇبەگىنىڭ وكىلدەرى قازاقستان پرەزيدەنتىنىڭ كۋبوگى جارىسىندا چەمپيوندىق اتاقتارىن قورعاپ قالدى. وتكەن جىلى دا وسى سايىستا يسپانيا توپ جارعان ەدى.
جارىستىڭ قولا جۇلدەسى گرۋزيندەرگە بۇيىردى. ءۇشىنشى ورىن ءۇشىن بولعان ويىندا ولاردىڭ قازاقستاندى ءىرى ەسەپپەن جەڭگەنىن جوعارىدا ايتتىق. ال تاجىكستاندى 1:0 ەسەبىمەن جەڭگەن رەسەي-2 كومانداسى 5-ورىن السا, 7-ورىنعا بەلارۋس قۇراماسى تابان تىرەدى. ولار بۇل ورىن ءۇشىن وتكەن ماتچتا قىرعىزستاننان 3:1 ەسەبىمەن باسىم ءتۇستى.
ەلامان قوڭىر.
دەرەك: egemen.kz.
سۋرەت: presidentcup.kz.