شىمكەنتتە پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ توراعالىعىمەن مادەنيەت جانە ونەر ۋنيۆەرسيتەتىن قۇرۋ ماسەلەلەرى جونىندە كەڭەس ءوتتى. جوبا مەملەكەت باسشىسى قاسىم-جومارت توقاەۆتىڭ مەگاپوليسكە جۇمىس ساپارى بارىسىندا مادەنيەت جانە اقپارات مينيسترلىگى مەن شىمكەنت قالاسىنىڭ اكىمدىگىنە بەرگەن تاپسىرماسىمەن جۇزەگە اسىرىلماق.
كەڭەس جۇمىسىنا قالا اكىمى عابيت سىزدىقبەكوۆ, مادەنيەت جانە اقپارات مينيسترلىگى, جەرگىلىكتى اتقارۋشى ورگاندار, مەردىگەر ۇيىمداردىڭ وكىلدەرى, سونداي-اق م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنىڭ باسشىلىعى قاتىستى.
جيىن بارىسىندا ايدا بالاەۆا قاتىسۋشىلاردىڭ اۋقىمدى جوبانى ىسكە اسىرۋ بارىسى جونىندەگى باياندامالارىن تىڭدادى.
جاڭا جوعارى وقۋ ورنى م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىنىڭ مادەنيەت جانە ونەر فاكۋلتەتىنىڭ بازاسىندا قۇرىلادى. جوسپارعا سايكەس وقۋ ورنىندا 6 فاكۋلتەت, 17 كافەدرا جانە باكالاۆريات, ماگيستراتۋرا مەن دوكتورانتۋرا بويىنشا 46 ءبىلىم بەرۋ باعدارلاماسى جۇمىس ىستەيدى. نەگىزگى باسىمدىق كينو جانە تەلەۆيدەنيە, انيماتسيا, مەديا-مەنەدجمەنت, تسيفرلىق ديزاين, ستسەنوگرافيا جانە وزگە دە باعىتتار بويىنشا تەحنيكالىق كادرلار دايارلاۋعا بەرىلەدى.
سونىمەن قاتار قازاقستاندا العاش رەت تسيرك ونەرى سالاسىندا جوعارى ءبىلىمدى ماماندار دايارلاۋ جوسپارلانىپ وتىر. رەستاۆراتورلار دايارلاۋ دا جاڭا باعىتتاردىڭ ءبىرى بولماق.
كەزدەسۋدە شىمكەنت قالاسىندا جاڭا وپەرا جانە بالەت تەاترىن سالۋ ماسەلەسى دە قارالدى. بۇل نىسانعا قالا اكىمدىگى جالپى اۋماعى 2,8 گەكتار بولاتىن جەر ۋچاسكەسىن بەلگىلەپ قويعان. جوباعا سايكەس تەاتردىڭ كورەرمەن زالى 1500 ورىنعا لايىقتالىپ سالىنادى.
قازىرگى ۋاقىتتا قالادا 1984 جىلى سالىنعان, 330 كورەرمەنگە ارنالعان وپەرا جانە بالەت تەاترى جۇمىس ىستەپ تۇر.