قاسيەتتى ەرتىس-بايان ءوڭىرىنىڭ رۋحاني ورداسى ىسپەتتى ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترىنىڭ بيىلعى گاسترولدىك ساپارى تالدىقورعان وڭىرىنەن باستاۋ العان ەدى. وسى ونەر ساپارى 8-10 ءساۋىر كۇندەرى الماتى قالاسىندا جالعاستى.
ايماقتىق تەاتردىڭ ونەر تابارىگىن الا كەلگەن ترۋپپانىڭ ساپارى مەگاپوليستىڭ مادەني ومىرىندە ايشىقتى وقيعاعا اينالدى. اتالعان تەاتردىڭ الماتىداعى گاسترولى بالالارعا ارنالعان «الاددين» ەرتەگىسىمەن شىمىلدىعىن (اۆتورى: ب.شولپانقۇل) اشتى. س.لەۆيتسكيدىڭ «دجۋديت جاساعان قيىن تاڭداۋ» اتتى بالالار مەن ەرەسەكتەرگە ارنالعان سپەكتاكل-شوۋى, جانگەلدى سادىقوۆ قويعان «العاشقى ماحاببات» كومەدياسى, ازامات نىعمانوۆتىڭ «ۇجدان» ءاپساناسى (اۆتورى: ش.قۇدايبەردى ۇلى) مەن رەجيسسەر جۇلدىزبەك جۇمانباي قويعان «بالام, قاشان كەلەسىڭ؟..» دراماسى (اۆتورى: س.سىبانباي) ءۇش كۇن بويى كورەرمەندى ەرەكشە اسەرگە بولەدى.
– وسىناۋ گاسترولدىك ساپار سوناۋ شالعايدا جاتقان ەرتىس-بايان وڭىرىندەگى تەاتردىڭ وزىندىك ەسەپ بەرۋى مەن رەپەرتۋار تانىستىرۋى دەسەك تە بولادى. كورەرمەندەر بارلىق قويىلىمدى جاقسى قابىلدادى. گاسترولدىك ساپار كوڭىلىمىزدەن شىقتى. كورەرمەن قوشەمەتىنە بولەندىك. بىرقاتار رەسپۋبليكالىق, حالىقارالىق تەاتر فەستيۆالىنىڭ تالاي جۇلدەسىن جەڭىپ العان «ۇجدان» قويىلىمى مەن جۋىردا ساحنالانعان «بالام, قاشان كەلەسىڭ؟..» دراماسىنا بيلەتتەر الدىن الا تۇگەل ساتىلىپ كەتكەندىكتەن, «بالام, قاشان كەلەسىڭ؟..» قويىلىمىن قايتالاپ قويۋعا تۋرا كەلدى, – دەيدى «الاددين» ەرتەگىسىنىڭ رەجيسسەرى ءارى تەاتردىڭ اكتەرى باۋىرجان ماناتبەك ۇلى.
الماتى