22 مامىردا Almaty Arena-دا ياندەكس مۋزىكا سەرۆيسىنىڭ قولداۋىمەن Sadraddin-ءنىڭ جاڭا البومىن تىڭداۋ شاراسى – Listening Party ءوتتى, دەپ حابارلايدى Egemen.kz.
ونەر يەسىنىڭ ايتۋىنشا, «ZEIIN» – سوڭعى ەكى جىل بويى ۇلكەن زەيىنمەن, تەرەڭ ەموتسيامەن جازىلعان العاشقى تولىققاندى البومى. ءانشى جاڭا تۋىندىسىندا شىنايىلىققا, ىشكى سەزىمگە جانە تىڭدارمانمەن ەموتسيونالدى بايلانىسقا ەرەكشە ءمان بەرگەن.
«جاڭا البوم «ZEIIN» دەپ اتالادى. نەگە دەسەڭىزدەر, بۇل مەن سوڭعى ەكى جىل بويى بارىنشا زەيىن سالىپ جازعان العاشقى البومىم. تىڭدارماندارىم دا البومدى زەيىن قويىپ تىڭداسا ەكەن دەدىم. البومدا ءارتۇرلى جانردا, ءارتۇرلى ستيلدە اندەر بار. سول اندەردەن اركىم ءوزىن تابادى دەگەن ويدامىن. بۇرىن ازىلدەپ تۇڭعىش ۇلىمنىڭ اتىن زەيىن قويامىن دەيتىنمىن, البوم دا مەنىڭ تۇڭعىش بالام سياقتى, سول سەبەپتى وسىلاي اتادىم. «ZEIIN» – مەن ءۇشىن تەرەڭ ماعىنا», دەدى Sadraddin.
Listening Party كەزىندە ورىنداۋشى جاڭا البومداعى ترەكتەردى العاش رەت ۇلكەن ارەنادا ۇسىنىپ, كورەرمەندەرگە بىرنەشە توسىنسىي دايىنداعان. ونىڭ ىشىندە تىڭدارماندار كۇتپەگەن فيت تە بار.
Sadraddin 2025 جىلدىڭ قورىتىندىسى بويىنشا ياندەكس مۋزىكا سەرۆيسىنەن «سۋپەرلونچ پاتشاسى» اتاعىن العان بولاتىن. بۇل اتاق وعان «Qaragym-ai» ترەگى ءۇشىن بەرىلگەن.
«كوبىنەسە تىڭدارماندار مەنىڭ اندەرىمدى ياندەكس مۋزىكادان تىڭدايتىنىن بايقايمىن. مەنىڭ 3-4 جىل بۇرىن جازعان اندەرىمنىڭ ءالى كۇنگە دەيىن توپ-چارتتا تۇرعانىن كورۋ ماعان ءاردايىم شابىت بەرەدى, كۇشتى كوڭىل-كۇي سىيلايدى», دەدى ورىنداۋشى.
ونەر يەسى بولاشاقتا كوبىرەك مۋزىكالىق ەكسپەريمەنتتەر جاساعىسى كەلەتىنىن دە جەتكىزدى. ونىڭ ايتۋىنشا, قازىر وعان يندي-پوپ پەن يندي-روك جانرى جاقىن. الداعى ۋاقىتتا سول باعىتتاعى جۇمىستاردى دا ۇسىنۋى مۇمكىن.
ءانشى شىعارماشىلىعىنداعى ليريكا ءوزىنىڭ ىشكى بولمىسىمەن تىعىز بايلانىستى ەكەنىن ايتادى.
«البومدى جازۋداعى باستى ماقساتىم – تىڭدارمانمەن شىنايى بولۋ. ماعان بۇرىننان ليريكالىق, مۇڭلى اندەر ۇنايدى. البومدا ليريكانىڭ كوپ بولۋى دا سول سەبەپتەن», دەدى Sadraddin.
كەش بارىسىندا ورىنداۋشى ساحنا سىرتىنداعى ءومىرى تۋرالى دا ايتىپ ءوتتى. ونىڭ سوزىنشە, گريم بولمەسىندە مىندەتتى تۇردە جانىندا بولاتىن ءۇش زات – جەكە قۇلاققابى, ميكروفونى جانە ورامالى.
ال ەگەر ءدال قازىر كەز كەلگەن الەمدىك ارتىسپەن دۋەت ايتۋ مۇمكىندىگى تۋسا, تاڭداۋى Post Malone بولار ەدى.
فاناتتارىنىڭ قولداۋى كەشتىڭ ەڭ اسەرلى ساتتەرىنىڭ بىرىنە اينالدى. تىڭدارماندار كونتسەرتكە البومنىڭ نەگىزگى تۇسىنە ساي قىزعىلت ءتۇستى كيىممەن كەلىپ, ارنايى جالاۋلار مەن شارلار دايىنداعان.
«سول ءسات مەنى قاتتى تەبىرەنتتى», دەدى ءانشى.