دەپۋتات اسحات ايماعامبەتوۆ الەۋمەتتىك جەلىدەگى پاراقشاسىندا تۇتىنۋشىلار ءدارىحانادان ىزدەگەن ءدارىسىن تابا الماي قالعان جاعدايدا قاجەتتى پرەپاراتتى شەتەلدەن الدىرۋعا ءماجبۇر بولۋىنا بايلانىستى زاڭعا ماڭىزدى تۇزەتۋلەر ەنگىزىلگەنىن ايتتى, دەپ جازادى Egemen.kz.
ا. ايماعامبەتوۆتىڭ ايتۋىنشا, الەمدە قولدانىستاعى ەڭ جاڭا ومىرلىك ماڭىزى بار پرەپاراتتار قازاقستان نارىعىنا جەتكەنشە جىلدار وتەدى. ويتكەنى ولاردى تىركەۋ, تەكسەرۋ ۇدەرىستەرى تىم ۇزاق.
«ال ءدارى ەلدە تىركەلمەسە, ول ءدارىحانادا ساتىلمايدى. بيۋروكراتيا كوپ, تىركەلگەن ءدارى از بولعان سايىن باعاسى دا قىمباتتاي بەرەدى. بۇل ماسەلەنى زاڭ جۇزىندە شەشتىك», دەپ جازدى دەپۋتات.
ونىڭ سوزىنشە, ارنايى زەرتتەلە كەلە, زاڭعا ماڭىزدى تۇزەتۋلەر ەنگىزىلىپ وتىر.
«بىرىنشىدەن الەمدىك ەڭ جاڭا, ەڭ ۇزدىك دارىلەرگە ەندى «جاسىل ءدالىز» (Fast-track) ەنگىزىلەدى. ەگەر ءدارى اقش (FDA) نەمەسە ەۋروپادا (EMA) قاتاڭ تەكسەرىستەن ءوتىپ, تيىمدىلىگىن دالەلدەسە, ونى بىزدە قايتادان جىلداپ تەكسەرۋدىڭ قاجەتى جوق. ءبىزدىڭ ەنگىزگەن وزگەرىسىمىزبەن مۇنداي پرەپاراتتاردى وتە شۇعىل تارتىپپەن 15 كۇندە تىركەپ, حالىققا تەز ارادا جەتكىزۋگە جول اشىلدى», دەدى ول.
2027 جىلدان باستاپ ەل تۇرعىندارى وزدەرىنە قاجەتتى ءدارى-دارمەكتى تەگىن الادى
دەپۋتاتتىڭ مالىمدەۋىنشە, باسقا دا دارىلەردى تىركەۋ مەرزىمى دە قىسقارادى.
«قازىر قۇجاتتاردى راسىمدەۋ رەسمي تۇردە 210 كۇن, ال ءىس جۇزىندە جىلداپ سوزىلادى. ءبىز بارلىق بيۋروكراتيالىق كەزەڭدەردى زاڭمەن ءبىر قىزمەتكە بىرىكتىردىك. ناتيجەسىندە بۇل مەرزىم ايتارلىقتاي قىسقارادى», دەدى دەپۋتات.
سونىمەن قوسا, اسحات ايماعامبەتوۆتىڭ ايتۋىنشا, ساپاعا قاتاڭ باقىلاۋ جاسالادى, ەل ىشىندە شىعارىلاتىن دارىلەردىڭ قۇرامى (سۋبستانتسيالارى) ەندى شەكارادا قاتاڭ تەكسەرىستەن وتەدى.
بۇعان دەيىن وتاندىق ءدارى-دارمەك ۇلەسى شامامەن 40 پايىزعا جەتكەنى تۋرالى حابارلاعانبىز.