جاقىندا ەكونوميكالىق ايماقتان جاعىمدى جاڭالىق جەتتى, مۇندا سۋ تازارتۋ سۇزگىلەرىن شىعاراتىن جاڭا ءوندىرىس ورنى اشىلدى. جوبا يمپورتتى الماستىرۋدى, وتاندىق ءونىم ۇلەسىن ارتتىرۋدى ماقسات ەتكەن. كۇندەلىكتى تۇتىناتىن سۋدى ءسۇزىپ ءىشۋ – اقتاۋلىقتار ءۇشىن وزەكتى ماسەلە. سوندىقتان مۇنداي كاسىپورىننىڭ ىسكە قوسىلۋى وڭىردەگى ماڭىزدى باستامالاردىڭ ءبىرى بولدى.
«اكۆا فيلتەر» جشس جۇزەگە اسىراتىن ءوندىرىستىڭ جىلدىق قۋاتى 160 مىڭ سۇزگىش ەلەمەنتتى قۇرايدى. جوبانىڭ قۇنى – 100 ملن تەڭگە, ال جوسپارلانعان جىلدىق ءوندىرىس كولەمى 617,5 ملن تەڭگەگە جەتەدى. قازىر كاسىپورىندا 15-تەن استام جەرگىلىكتى تۇرعىن تۇراقتى جۇمىسپەن قامتىلعان.
وندىرىستە پايدالانىلاتىن نەگىزگى شيكىزات تا – وتاندىق ءونىم. پوليمەرلىك گرانۋلالار اتىراۋدان جەتكىزىلىپ, اقتاۋدا وڭدەلەدى. ءوندىرىس ورنىنىڭ ءونىمى – سۇزگىش ەلەمەنتتەر تۇرمىستا, مەديتسينادا جانە مۇناي-گاز سالاسىندا قولدانىلادى.
– مەملەكەت باسشىسى قاسىم-جومارت توقاەۆتىڭ وتاندىق وندىرۋشىلەردى قولداۋ مەن ينۆەستورلارعا قولايلى جاعداي جاساۋ باعىتىنداعى ساياساتىنىڭ ناتيجەسىن سەزىنىپ وتىرمىز. ارنايى ەكونوميكالىق ايماقتا كاسىپورىندارعا بىرقاتار سالىقتىق جەڭىلدىك قاراستىرىلعان. بۇگىندە ءبىزدىڭ كاسىپورىن – وڭىردەگى سۋ سۇزگىش ەلەمەنتتەرىن شىعاراتىن جالعىز ءوندىرىس ورنى. قۋاتىمىز تاۋلىگىنە 4 مىڭنان استام ءونىم شىعارۋعا جەتەدى, – دەيدى «اكۆا فيلتەر» جشس باسشىسى امانگەلدى تاسقىمباەۆ.
ونىڭ ايتۋىنشا, ارنايى ەكونوميكالىق ايماقتا كاسىپورىندارعا قولايلى جاعداي جاسالعان. ارنايى ەكونوميكالىق ايماق ءوز كوكجيەگىن كەڭەيتە تۇسپەك, ياعني الداعى ۋاقىتتا ءوندىرىس كولەمىن ۇلعايتۋ جوسپارلانىپ وتىر.
«اقتاۋ تەڭىز پورتى» اەا» اق اتقارۋشى ديرەكتورى گۇلميرا ابىشەۆانىڭ ايتۋىنشا, ايماقتا باسىم قىزمەت تۇرلەرى كەڭەيتىلگەن.
– ەندى وڭدەۋ ونەركاسىبىمەن قاتار تۋريزم, اۋىل جانە بالىق شارۋاشىلىعى, وزگە دە باعىتتاردا جاڭا جوبالاردى جۇزەگە اسىرۋعا مۇمكىندىك بار. بيىل جالپى قۇنى 158,6 ملرد تەڭگەنى قۇرايتىن 16 ينۆەستيتسيالىق جوبا ىسكە قوسىلادى, – دەدى گ.ابىشەۆا.
ونىڭ ايتۋىنشا, بۇل 16 ينۆەستيتسيالىق جوبا ىسكە قوسىلعاندا 1800-گە جۋىق جاڭا جۇمىس ورنى اشىلادى ەكەن. قازىر ونەركاسىپ, لوگيستيكا, تۋريزم مەن ينفراقۇرىلىم باعىتتارىنداعى نىسانداردا قۇرىلىس-مونتاج جۇمىسى جۇرگىزىلىپ, قاجەتتى وندىرىستىك جابدىقتار كەزەڭ-كەزەڭىمەن جەتكىزىلىپ جاتىر. جالپى, «اقتاۋ تەڭىز پورتى» اەا» اق اۋماعىندا جۇزەگە اسقان ءاربىر ءىرىلى-ۇساقتى جاڭا ءوندىرىس ورىندارى – ەل ەكونوميكاسىنا قوسىلعان ۇلەس بولماق.
ماڭعىستاۋ وبلىسى
