يۋنۋس ەمرە مەن شاكارىم قۇدايبەردى ۇلى شىعارماشىلىعى ارقىلى تۇركى الەمىنىڭ رۋحاني مۇراسىن دارىپتەۋ ماقساتىندا ۇيىمداستىرىلعان ءىس-شارا تۇركى ويشىلدارىنىڭ ەڭبەكتەرىنە ارنالعان كىتاپ كورمەسىن, ەكى ەل مادەنيەتى مەن دوستىعىن ارقاۋ ەتكەن سۋرەت كورمەسىن اشۋمەن باستالدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ پەن انكارا الەۋمەتتىك عىلىمدار ۋنيۆەرسيتەتىنىڭ رەكتورى, پروفەسسور, تۇركيا جازۋشىلار وداعىنىڭ توراعاسى ارىجان مۇسا قازىم كورمەگە تۋىندىلارى قويىلعان سۋرەتشىلەردى العىسحاتپەن ماراپاتتاپ, سودان كەيىن ەكى وقۋ ورنى اراسىنداعى ىنتىماقتاستىق تۋرالى مەموراندۋمعا قول قويدى. سونداي-اق تۇركيادان ارنايى كەلگەن قوناق انكارا الەۋمەتتىك عىلىمدار ۋنيۆەرسيتەتىنىڭ رەكتورى ارىجان مۇسا قازىمعا «ەۋرازيا ۇلتتىق ۋنيۆەرسيتەتىنىڭ قۇرمەتتى پروفەسسورى» اتاعى بەرىلىپ, ابايدىڭ قازاق-تۇرىك تىلدەرىندە جارىق كورگەن «قارا سوزدەرى» تارتۋ ەتىلدى. ارىجان مۇسا قازىم ءوز كەزەگىندە يۋنۋس ەمرە مەن شاكارىم قۇدايبەردى ۇلى شىعارماشىلىعىنىڭ ۇندەستىگىنە توقتالىپ, ەكى ويشىل فيلوسوفياسىنىڭ ءتۇپ-تامىرى قوجا احمەت ءياساۋيدىڭ حيكمەتتەرىنەن باستالاتىنىن ءسوز ەتتى.
ال پارلامەنت سەناتىنىڭ دەپۋتاتى نۇرتورە ءجۇسىپ يۋنۋس ەمرە مەن شاكارىم قۇدايبەردى ۇلىنىڭ شىعارماشىلىعىنا ارنالعان سيمپوزيۋم ەكى ەل اراسىنداعى رۋحاني بايلانىستى تەرەڭدەتۋگە وڭ ىقپال ەتەتىنىن, اتاجۇرتتا وتىرعان قازاق پەن ءبىر كەزدەرى سىردىڭ بويىنان انادولىعا قونىس اۋدارعان بۇگىنگى تۇرىك باۋىرلارىمىزدىڭ رۋحىن جاقىنداستىرۋ الدا دا جالعاسا بەرەتىنىن ءسوز ەتتى. مۇنان كەيىن يۋنۋس ەمرە ينستيتۋتىنىڭ پروفەسسورى تاۆۋكچىوگلى ورحان كەمال, «قازاق گازەتتەرى» سەرىكتەستىگى باس ديرەكتورى, عالىم ديحان قامزابەك ۇلى بايانداما جاسادى.
ديحان قامزابەك ۇلى ءوز بايانداماسىندا تۇركى دۇنيەسىنىڭ قوس ويشىلى يۋنۋس ەمرە مەن شاكارىم قۇدايبەردى ۇلى اراسىن التى عاسىر ۋاقىت ءبولىپ تۇرسا دا, ولاردىڭ رۋحاني ساباقتاستىعى ايقىن بايقالاتىنىن اڭگىمەلەي كەلىپ, ەكى تۇلعانىڭ شىعارمالارىندا دا جاراتقاننىڭ قۇبىلىسى مەن قۇندىلىعىن زەردەلەيتىن ادام زەردەسىنىڭ سيپاتى مەن دەڭگەيى كورىنىس تاپقانىن تىلگە تيەك ەتتى. «يۋنۋس ەمرەنىڭ «جاتتاعانىڭ جەتكىزبەس, ۇڭىلمەسەڭ ارىپكە» دەۋىندە تەرەڭ ءمان بار. ال شاكارىم قۇدايبەردى ۇلى مۇنى «جىعىلمايتىن دالەل تاپ, بىرەزۋ بولما ءوزىمشىل» دەپ جەتكىزەدى. اقىننىڭ ورنەگى دە, بەينەسى دە – ءسوز. ءسوز قۇدىرەتى – پوەزيا قۇدىرەتى. بۇل تۋرالى ەكى اقىن دا ءوز داۋىرىندەگى شىندىققا سايكەس تۇجىرىمداماسىن ۇسىنعان», دەدى الاشتانۋشى.
تۇركى حالىقتارىنىڭ رۋحاني بىرلىگىن نىعايتۋعا, حالىقارالىق عىلىمي ديالوگتى دامىتۋعا باعىتتالعان ماڭىزدى ءىس-شارا بارىسىندا قازاقستان مەن تۇركيانىڭ جەتەكشى عالىمدارى مەن قوعام قايراتكەرلەرى ويلارىن ورتاعا سالىپ, ەكى ەلدىڭ رۋحاني قارىم-قاتىناسى كەلەشەكتە دە تەرەڭدەپ, دامي تۇسەرىن ءسوز ەتتى.
