ەسەپكە سايكەس, قولما-قول اقشاسىز ترانزاكتسيالار كولەمى 5%-عا ءوسىپ, 42,4 ترلن تەڭگەگە جەتكەن. ال وتكەن جىلى بۇل كورسەتكىش 22,4% بولعان ەدى. قولما-قول اقشاسىز تولەمدەردىڭ جالپى وپەراتسيالارداعى ۇلەسى 87,9%-دى قۇرادى. ءبىر جىل بۇرىن بۇل كورسەتكىش 87,1% بولعان.
سونىمەن قاتار, بانكوماتتار ارقىلى قولما-قول اقشا شەشۋ وپەراتسيالارى 2,2%-عا ازايعان. بۇل – سوڭعى جىلدارداعى العاشقى تومەندەۋ ءارى سالىستىرمالى, ءارى ابسوليۋتتىك كورسەتكىش بويىنشا تىركەلىپ وتىر.
تولەم كارتالارىنىڭ سانى دا باياۋ وسۋدە: بيىل ءوسىم 3,9% بولسا, وتكەن جىلى 7,9% بولعان. ونىڭ ىشىندە جەرگىلىكتى كارتالار سانى 4,2%-عا ارتىپ, 28,2 ملن-عا جەتسە, حالىقارالىق كارتالار 3,8%-عا كوبەيىپ, 56,9 ملن بولعان.
POS جانە QR ارقىلى تولەم جاساۋ ۇلەسى تيىسىنشە 10,6% جانە 10,7%-عا دەيىن وسكەن. بۇل وفلاين ينفراقۇرىلىمنىڭ دامىپ جاتقانىن كورسەتەدى. ال قولما-قول اقشاسىز وپەراتسيالاردىڭ ورتاشا چەگى 13,1 مىڭ تەڭگەگە دەيىن تومەندەگەن.
ققق ماماندارىنىڭ ايتۋىنشا, قولما-قول اقشاسىز تولەمدەر نارىعى دامۋى جاڭا كەزەڭگە وتۋدە. ەندى نەگىزگى ءرولدى جاڭا پايدالانۋشىلاردى تارتۋ ەمەس, سەرۆيستەردى پايدالانۋ جيىلىگى اتقارادى. ساراپشىلار الداعى ءوسىم الەۋەتى تسيفرلىق قىزمەتتەر از تارالعان وڭىرلەرمەن بايلانىستى ەكەنىن ايتىپ وتىر.
