فوتو: اقوردا
ەلوردا اكىمى قالادا بارلىق باستى ەكونوميكالىق كورسەتكىشتەر بويىنشا وڭ قارقىن بايقالاتىنىن جەتكىزدى.
«بيىلعى ءتورت ايدا نەگىزگى كاپيتالعا سالىنعان ينۆەستيتسيا كولەمى 588 ميلليارد تەڭگەنى قۇرادى. بۇل بىلتىرعى وسى كەزەڭمەن سالىستىرعاندا 9,1 پايىز جوعارى. ولاردىڭ اراسىندا وڭدەۋ ونەركاسىبى, ءبىلىم, مەديتسينا, كولىك, ساۋدا, لوگيستيكا سالالارىنا قاتىستى جوبالار بار. بۇگىندە Astana LRT جەڭىل رەلستى كولىك جەلىسى تولىق جۇمىس ىستەپ تۇر. ەلوردانىڭ قوعامدىق كولىك جۇيەسىن جانداندىرۋ ماقساتىندا جوبانىڭ ەكىنشى كەزەڭى پىسىقتالىپ جاتىر», دەدى قالا اكىمى.
جەڭىس قاسىمبەك الەۋمەتتىك نىسانداردىڭ قۇرىلىسى, تۇرعىن ءۇي الاپتارىن كوركەيتۋ جونىندە ايتتى.
«سوڭعى جىلدارى استانادا 44 مەكتەپ سالىنعان. ال جاڭا وقۋ جىلىندا 12 ءبىلىم وشاعى اشىلادى. سونىمەن قاتار 2 وقۋشىلار سارايىن جانە 6 بالاباقشانى ەل يگىلىگىنە بەرۋ جوسپارلانىپ وتىر. 2028 جىلعا دەيىن 2 پەريناتالدى ورتالىق, كوپبەيىندى اۋرۋحانا جانە دياگنوستيكالىق كەشەننىڭ قۇرىلىسى اياقتالماق», دەدى جەڭىس قاسىمبەك.
قالا اكىمى ەلوردانىڭ ينجەنەرلىك-كوممۋنالدىق ينفراقۇرىلىمى, Smart City جوباسىنىڭ ىسكە اسىرىلۋى تۋرالى باياندادى. بيىل 173 اۋلا مەن قوعامدىق كەڭىستىكتى اباتتاندىرۋ, 1,1 ميلليون ءتۇپ جاسىل جەلەك ەگۋ كوزدەلگەن.
كەزدەسۋ سوڭىندا مەملەكەت باسشىسى استانا اكىمى جەڭىس قاسىمبەكتىڭ قىزمەتىن وڭ باعالاپ, ەلوردانى ودان ءارى دامىتۋعا قاتىستى بىرقاتار تاپسىرما بەردى.
