«Around the World» («دۇنيەجۇزىلىك ساياحات») دەپ اتالعان كونتسەرتتىك باعدارلاما ەكى ساعاتقا سوزىلىپ, ناعىز مۋزىكالىق ساياحاتقا اينالدى. بۇل كەشتە الەمنىڭ 13 ەلىنىڭ مادەنيەتىن اسقاقتاتقان 24 مۋزىكالىق تۋىندى ورىندالدى. اسىرەسە وركەستر رەپەرتۋارىندا ۇلتتىق مۇرا مەن الەمدىك ترەند عاجاپ ۇيلەسىمدى شىقتى. ساحنادا حالقىمىزدىڭ ءداستۇرلى اندەرى مەن كۇيلەرى عانا ەمەس, شەتەلدىك پوپ-حيتتەر مەن تانىمال ساۋندترەكتەردىڭ اسپاپتىق كاۆەرلەرى شىرقالدى.
ايتا كەتەيىك, كونتسەرتكە مۋزىكالىق اسپاپتاردىڭ بىرەگەي قۇرامى ايرىقشا اجار بەردى. ءبىر ساحنادا دومبىرا, شەرتەر, قوبىز, سىبىزعى, جەتىگەن سياقتى قازاقتىڭ ۇلتتىق اسپاپتارىمەن قاتار, سكريپكا, ۆيولونچەل, فلەيتا, ساكسوفون, فورتەپيانو, ەلەكترو جانە باس گيتارالار, باراباندار مەن ءتۇرلى پەركۋسسيانى قامتيتىن كلاسسيكالىق جانە زاماناۋي اسپاپتار كەرەمەت ۇيلەسىم تاپتى.
كەشكە قاتىسقان ۋنيۆەرسيتەتتىڭ اكادەميالىق باسشىلىعى دا اتقارىلعان جۇمىستىڭ اۋقىمىن وتە جوعارى باعالادى. ايتالىق, NU پرەزيدەنتى, پروفەسسور ۆاكار احماد ءبىلىم الۋشىلاردىڭ جان-جاقتى دامۋىنىڭ ماڭىزىنا توقتالدى.
«ستۋدەنتتەرىمىزدىڭ مۋزىكالىق كاسىبي دەڭگەيى تاڭعالارلىق دەسە بولادى. ەگەر ساحنادا ستۋدەنتتەر وركەسترى ونەر كورسەتىپ جاتقانىن بىلمەسەك, ونى اجىراتۋ مۇمكىن ەمەس ەدى. ءوز باسىم ستۋدەنتتەرمەن ماقتانامىن. ولار ينجەنەر جانە عالىم بولا تۇرىپ, سونىمەن بىرگە تاماشا مۋزىكانت ءارى ءارتىس بولا الادى. كاسىبي ورتادا ءبىز قولداناتىن كوپتەگەن داعدى – ۋاقىتتى باسقارۋ, كوماندادا جۇمىس ىستەۋ. سونداي-اق كوشباسشىلىقتى ءوز موينىنا الۋ سەكىلدى قاسيەتتەر وقۋ اۋديتورياسىنان تىس جەردە قالىپتاسادى», دەدى ول.
ال NU «Orchestra» كلۋبىنىڭ پرەزيدەنتى ارسەن ەلتاي ستۋدەنتتەر ۇيىمىنىڭ ۋنيۆەرسيتەتتەن تىس جەردە مىڭ جارىم كورەرمەندى قالاي جيناي العان قۇپياسىمەن ءبولىستى.
«بۇنىڭ ارتىندا ۇلكەن كوماندالىق جۇمىس تۇردى. سونداي-اق مىقتى تۇجىرىمداما, ساپالى ۆيزۋال, الەۋمەتتىك جەلىدەگى بەلسەندىلىك, تۇلەكتەرىمىز بەن سەرىكتەستەرىمىزدىڭ قولداۋى بىزگە دەم بەردى. كونتسەرت ءوز كورەرمەنىن تابادى دەپ سەندىك. بىراق 1500 ادام جينالىپ, تولىق انشلاگ بولۋى بىزگە قۋات بەرىپ, شابىتتاندىرعان ناتيجە بولدى», دەدى ا. ەلتاي.
سونىمەن بىرگە ارسەن تاجىريبەلى ستۋدەنتتەردىڭ جىل سايىن وقۋ ءبىتىرىپ, ولاردىڭ ورنىنا جاڭادان تۇلەكتەردىڭ كەلۋىنە قاراماستان, وركەستردىڭ كوپتەگەن جىل بويى كاسىبيلىكتىڭ وسىنداي جوعارى دەڭگەيىن قالاي ساقتاپ كەلە جاتقانى تۋرالى سۇراققا دا جاۋاپ بەرىپ, ىشكى ءداستۇردىڭ ماڭىزىن ەرەكشە اتاپ ءوتتى.
«مەنىڭ ويىمشا, ءبىزدىڭ باستى كۇشىمىز ادامدار مەن ونەردە دەر ەدىم. ءيا, جىل سايىن مىقتى مۋزىكانت ستۋدەنتتەر وقۋ بىتىرەدى. ولاردىڭ ورنىنا 1-كۋرس ستۋدەنتتەرى كەلەدى. بىراق وقۋ ورنىندا تالىمگەرلىك جۇمىس جۇيەلى جولعا قويىلعان. جوعارى كۋرس ستۋدەنتتەرى جاڭادان وقۋعا تۇسكەن جاستاردى وركەستر قۇرامىنا قابىلداپ, ولارعا مۋزىكالىق جاعىنان عانا ەمەس, سونىمەن بىرگە «Orchestra» كلۋبىنىڭ رۋحىن سەزىنۋگە كومەكتەسەدى. وسىنىڭ ارقاسىندا دىبىستالۋ دەڭگەيىمىز بەن جۇمىسقا دەگەن كوزقاراسىمىز ساقتالادى. ەڭ باعالىسى – تۇلەكتەرىمىزدىڭ كوبى ۋنيۆەرسيتەت بىتىرگەننەن كەيىن دە بىزبەن بايلانىسىن ۇزبەيدى. ۇنەمى قولداۋ كورسەتەدى. كونتسەرتكە كەلەدى. كەيدە ءتۇرلى جوبالارعا دا قاتىسادى. مىنە, وسى جاستاردىڭ اراسىنداعى ساباقتاستىقتى قالىپتاستىرادى», دەدى ارسەن ەلتاي.
شىنىندا, بەيبىتشىلىك جانە كەلىسىم سارايىنىڭ ساحناسىنداعى ستۋدەنتتەر وركەسترىنىڭ ءساتتى دەبيۋتى NU ستۋدەنتتىك باستامالارىنىڭ جاڭا ساپالى دەڭگەيگە كوتەرىلگەنىن, سونداي-اق بيىك ماقساتتى جوبالاردىڭ كاسىبي دەڭگەيدە جۇزەگە اسىپ جاتقانىن دالەلدەدى. NU «Orchestra» ستۋدەنتتەردىڭ ءار بۋىنىن مۋزىكاعا دەگەن سۇيىسپەنشىلىكپەن بىرىكتىرىپ, ۋنيۆەرسيتەتتىڭ شىعارماشىلىق قۋاتىنىڭ ءرامىزى بولىپ قالا بەرەدى.
