كەزىندە سپورتتىڭ قاي تۇرىنەن بولسا دا, كسرو-نىڭ سپورت شەبەرى ءنورماتيۆىن ورىنداۋ وتە قيىن ەدى. ونداي ۇلكەن ءىس تەك جالىقپاي ەڭبەك ەتىپ, جاتتىعۋ زالىندا شەلەكتەپ تەر توگىپ, ءدۇبىرلى دودالاردا ايانباي ايقاسىپ, بارلىق قيىندىققا توزە بىلگەن ساڭلاقتاردىڭ عانا قولىنان كەلەتىن.
سونداي دارىنى اسقان جاستاردىڭ ءبىرى قايرات ءابىلوۆ ەدى. 1971 جىلى قوستاناي وبلىسىنىڭ قامىستى اۋدانىندا دۇنيەگە كەلگەن ول بالاۋسا كەزىنەن بالۋاندىق ونەردىڭ سيقىرىنا اربالىپ, ەركىن كۇرەسكە مىقتاپ دەن قويدى. اۋدان ورتالىعىندا ۋۆايس دۋباەۆتىڭ قول استىندا جاتتىقتى. زەرەك بالانىڭ بويىندا بۇلا كۇشتىڭ بۇلقىنىپ جاتقانىن بايقاعان باپكەرى ونى ارناۋلى وقۋ ورنىنا جىبەرۋدى ءجون كوردى. ءسويتىپ, بوزبالا قاراعاندى قالاسىندا قونىس تەپكەن ايگىلى ءاليا مولداعۇلوۆا اتىنداعى №3 سپورت سالاسىنداعى وليمپيادالىق مەكتەپ-ينتەرناتتان ءبىر-اق شىقتى.
تالاي دارىندى سپورتشىنى شىڭداعان قاراشاڭىراقتا قايرات ءوز قاتارىنىڭ الدى بولدى. 1985–1986 جىلدارى ءوزى قۇرالپى بالالاردىڭ اراسىندا الماتى مەن ارقالىقتا وتكەن رەسپۋبليكا بىرىنشىلىگىندە قارسىلاس شاق كەلتىرمەدى. 1987 جىلى قاراعاندىدا ۇيىمداستىرىلعان مەكتەپ وقۋشىلارىنىڭ سپارتاكياداسىندا كۇمىس مەدالدى موينىنا ءىلىپ, بىشكەكتەگى بۇكىلوداقتىق تۋرنيردە توپ جاردى. 1988 جىلى تالدىقورعاندا قازاقستاننىڭ جاسوسپىرىمدەر ويىندارىنىڭ جەڭىمپازى اتانىپ, دۋشانبەدە مەكتەپ-ينتەرناتتار اراسىنداعى كسرو بىرىنشىلىگىنىڭ باس جۇلدەسىن ولجالادى. 1989 جىلى تبيليسيدە «ا» ساناتىنداعى تۋرنيردە بارلىق باسەكەلەسىنەن باسىم ءتۇسىپ, كسرو-نىڭ سپورت شەبەرىنىڭ كۇمىس بەلگىسىن كەۋدەسىنە تاقتى.
اۋەلى 69 كگ سالماق دارەجەسىندە كۇرەسىپ, ۋاقىت وزا 74 كگ سالماققا اۋىسقان ق.ءابىلوۆتىڭ جولىنا مايتالمان ماماندار ۇلكەن ۇمىتپەن قارادى. بىراق جالىندى جاستىڭ دارىنى اسسا دا, باعى جانبادى. ءتۇرلى جارىستا العان جاراقاتتارى قايراتتىڭ كەڭىنەن كوسىلۋىنە مۇمكىندىك بەرمەدى. سودان ناعىز جالىنداپ تۇرعان شاعىندا بوزكىلەممەن قوش ايتىستى. الايدا ۇلكەن سپورتتان الىستاعان جوق. ءوزى بيزنەسپەن اينالىسسا دا, دارىندى جاستارعا ۇنەمى قامقور قولىن سوزىپ ءجۇردى, دەمەۋشىلىك جاسادى. قايرات قۇباي ۇلىنىڭ قامقورلىعىن كورگەن تالاي جاس ورەن كەيىننەن ەل سپورتىنداعى ەلەۋلى تۇلعاعا اينالدى. وزەكتى ورتەر وكىنىش, ق.ءابىلوۆتىڭ ءومىرى تىم قىسقا بولدى, نەبارى 36 جاسىندا باقيعا وزدى. تۋعان اۋدانىندا جىل سايىن ايتۋلى ازاماتتى ەسكە الۋعا ارنالعان رەسپۋبليكالىق تۋرنير ۇزدىكسىز ءوتىپ تۇرادى.
بۇل كۇندەرى قامىستىدا سپورت كەشەنى سالىنىپ جاتىر. بيىل پايدالانۋعا بەرىلەدى دەپ جوسپارلانىپ وتىر. ءوڭىر تۇرعىندارىنىڭ وسى نىسانعا كەزىندە قازاقستان مەن كسرو قۇراما كومانداسىنىڭ مۇشەسى بولعان بەلگىلى بالۋان قايرات ءابىلوۆتىڭ ەسىمىن بەرسە دەگەن تىلەگى بار.