قوستاناي وبلىسى بويىنشا قارجىلىق مونيتورينگ اگەنتتىگىنىڭ دەپارتامەنتى «Bolashak Construction Company KZ» جشس باسشىسىنا قاتىستى الاياقتىق دەرەگى بويىنشا تەرگەۋدى اياقتادى, دەپ حابارلايدى Egemen.kz.
تەرگەۋ مالىمەتتەرىنە سايكەس, كۇدىكتى 2022-2024 جىلدار ارالىعىندا قاجەتتى رۇقسات قۇجاتتارىنسىز «سەميا» تۇرعىن ءۇي كەشەنىنىڭ ۇلەستىك قۇرىلىسىنا قاراجات تارتۋدى ۇيىمداستىرعان. ول ازاماتتارمەن پاتەرلەر مەن كوممەرتسيالىق نىسانداردى الدىن الا ساتىپ الۋ-ساتۋ شارتتارىن جاساسىپ, جوبا زاڭدى بولىپ كورىنۋى ءۇشىن الەۋمەتتىك جەلىلەردە جارناما جۇرگىزىپ, قوستاناي قالاسىنان كەڭسە جالعا العان.
وسى زاڭسىز ارەكەتتەردىڭ ناتيجەسىندە تۇرعىن ءۇي كەشەنىنىڭ ءۇشىنشى كەزەگىنىڭ قۇرىلىسىنا 28 جەكە جانە 1 زاڭدى تۇلعادان جالپى سوماسى 162 ميلليون تەڭگەدەن استام قاراجات تارتىلعان. الايدا كۇدىكتى بۇل قاراجاتتى نىساندى بەلگىلەنگەن مەرزىمدە اياقتاماي, ءوز ماقساتىنا پايدالانعان. قازىرگى تاڭدا ءۇشىنشى كەزەكتىڭ قۇرىلىسى اياقتالماعان.
سىبايلاس جەمقورلىققا قارسى ساياسات: قازاقستان تاجىريبەسى فرانتسيادا تانىستىرىلدى
سوت سانكتسياسىمەن كۇدىكتىنىڭ مۇلكىنە تىيىم سالىندى. ولاردىڭ قاتارىندا Hyundai Santa Fe اۆتوكولىگى, ءۇش بولمەلى پاتەر جانە جەرتولەدەگى كوممەرتسيالىق ءۇي-جايلار بار. سونداي-اق وعان قاتىستى ۇيقاماق تۇرىندەگى بۇلتارتپاۋ شاراسى قولدانىلدى.
قىلمىستىق ءىس سوت قاراۋىنا جولداندى.
جۇرگىزۋشى كۋالىگىن زاڭسىز الۋ: ەلىمىزدىڭ بىرنەشە وڭىرىندە 60-تان استام جەمقورلىق فاكتىسى اشكەرە بولدى
اگەنتتىك ازاماتتارعا قۇرىلىسقا رۇقسات قۇجاتتارى مەن كەپىلدىكتەرى جوق جوبالارعا قارجى سالماۋعا, تەكسەرىلمەگەن كومپانيالارعا سەنبەۋگە جانە ينۆەستيتسيا سالماس بۇرىن جوبانىڭ زاڭدىلىعىن مۇقيات تەكسەرۋگە كەڭەس بەرەدى.