مەملەكەت باسشىسى قاسىم-جومارت توقاەۆ تۇركىستان وبلىسى جۇرتشىلىعىمەن كەزدەسۋ بارىسىندا ەلىمىزدىڭ جاستارىنا, ولاردىڭ بىلىمىنە, قابىلەتىنە, كۇش-قۋاتىنا زور ءۇمىت ارتاتىنىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مەن پرەزيدەنت رەتىندە ەلىمىزدىڭ جاستارىنا, ولاردىڭ بىلىمىنە, قابىلەتىنە, كۇش-قۋاتىنا زور ءۇمىت ارتامىن. ەلىمىزگە جانى اشيتىن, ياعني شىن مانىندە جاناشىر ۇرپاق قانا قازاقستاننىڭ كوركەيۋىنە مول ۇلەس قوسا الادى. ەلىمىزدىڭ كەلەشەگى – وتانشىل, جاسامپاز, جاۋاپكەرشىلىگى مول جاستاردىڭ قولىندا. بۇل دا اقيقات دەسەك, ورىندى بولار», دەدى مەملەكەت باسشىسى.
پرەزيدەنت ناعىز وتانشىل ازامات دەگەنىمىز, بۇل – ەڭ الدىمەن ءوز جۇمىسىن ادال ورىنداپ, ادال ەڭبەك ەتىپ جاتقان ادام ەكەنىن ايتتى.
«ادال ەڭبەكپەن كەلگەن تابىس بەرەكەلى بولادى. جالقاۋ, ەرىنشەك ادام ەشقاشان وتانشىل ازامات بولا المايدى. قوعامىمىزعا جالاڭ ۇران, بوس اڭگىمە, قۇرعاق ۋادە, قىزىل ءسوز كەرەك ەمەس, ناقتى ءىس قاجەت. وتانشىلدىق دەگەنىمىز ادەمى ءسوز سويلەپ, جۇرت الدىندا كەرەمەت بولىپ كورىنۋ ەمەس, بۇل – ەڭ الدىمەن ەلگە پايدا اكەلۋ, وتانعا دەگەن ادالدىقتى ناقتى ىسپەن كورسەتۋ», دەدى مەملەكەت باسشىسى.
سونىمەن قاتار پرەزيدەنت قازىر تۇركىستان وبلىسىندا 700 مىڭعا جۋىق جاس ازامات تۇراتىنىن ايتتى.
«بۇل – تۇرعىنداردىڭ ۇشتەن ءبىرى دەگەن ءسوز. كيەلى وردانىڭ تاريحى قانداي تەرەڭ بولسا, بولاشاعى دا سونداي جارقىن بولادى دەپ سەنىمدى تۇردە ايتۋعا بولادى», دەدى ق.توقاەۆ.
مەملەكەت باسشىسى ءوز سوزىندە ەڭبەكقورلىق حالقىمىزدىڭ بولمىسىنا سىڭگەن قاسيەت بولۋعا ءتيىس ەكەنىن باسا ايتتى.
«بالاباقشادا, مەكتەپتە, ۋنيۆەرسيتەتتە, عىلىم ينستيتۋتىندا, مەديتسينادا, ءوندىرىس مەكەمەسىندە, ساۋدا جانە قىزمەت كورسەتۋ ورىندارىندا, ءتىپتى, مەملەكەتتىك قىزمەت پەن اسكەري سالانىڭ ءوزىن ايتپاعاندا, بارلىق سالاداعى باستى قۇندىلىق – ادال ەڭبەك, ادال قىزمەت بولۋعا ءتيىس.
وسى ماقساتپەن وتكەن جىلدى بۇكىل ەل بولىپ جۇمىسشى ماماندىقتارىن دارىپتەۋگە, ولارعا قۇرمەت كورسەتۋگە ارنادىق. بۇل كەزەكتى ناۋقان ەمەس, مەملەكەتتىك يدەولوگيانىڭ ءبىر بولىگى, سوندىقتان وسى جۇمىسپەن ۇنەمى اينالىسۋىمىز كەرەك. جۇمىستىڭ جامانى بولمايدى. ادال جۇمىستان ۇيالۋدىڭ ەشقانداي قاجەتى جوق. ەڭبەكتىڭ ءبارى قادىرلى. بۇل دانالىقتى جاستاردىڭ ءبارى جاقسى ءتۇسىنۋى كەرەك», دەپ اتاپ ءوتتى پرەزيدەنت.
ايتا كەتەيىك, بۇگىن مەملەكەت باسشىسى قاسىم-جومارت توقاەۆ تۇركىستان وبلىسىنا جۇمىس ساپارىمەن بارىپ, قوجا احمەت ياساۋي كەسەنەسىنە زيارات ەتتى.
مەملەكەت باسشىسى: ەل قولداۋىنا يە بولعان ناعىز حالىق كونستيتۋتسياسى تۇعىرىنا قوندى