استانادا جاڭا كونستيتۋتسيا جوباسى بويىنشا اۋقىمدى ءتۇسىندىرۋ جۇمىستارى ءوتتى

ءىس-شارالار لەگى ءبىلىم بەرۋ ۇيىمدارىندا, جوعارى وقۋ ورنىندا, وندىرىستىك نىساندا جانە بەلسەندى جاستار وكىلدەرىمەن اشىق پىكىر الماسۋ فورماتىندا ۇيىمداستىرىلدى. كەزدەسۋلەردىڭ نەگىزگى ماقساتى – قوعاممەن تىكەلەي ديالوگ ورناتىپ, ەل دامۋىنىڭ باسىم باعىتتارىن ءتۇسىندىرۋ جانە ۇسىنىستاردى تالقىلاۋ. جۇمىس توبىنىڭ قۇرامىندا پارلامەنت ءماجىلىسىنىڭ دەپۋتاتتارى, جەرگىلىكتى بيلىك وكىلدەرى مەن ءماسليحات دەپۋتاتتارى, مەملەكەت جانە قوعام قايراتكەرلەرى, قوعام بەلسەندىلەرى بولدى.

العاشقى كەزدەسۋ №115 «كەلەشەك مەكتەپ» ۇجىمىمەن ءوتتى. جيىندا ءبىلىم سالاسىنىڭ وزەكتى ماسەلەلەرى, جاس ۇرپاققا ساپالى تاربيە مەن ءبىلىم بەرۋ باعىتىنداعى رەفورمالار ءسوز بولدى. سپيكەرلەر ءبىلىم بەرۋ جۇيەسىندەگى جاڭاشىلدىقتار مەن پەداگوگ مارتەبەسىن ارتتىرۋ شارالارىنا توقتالدى.

سونىمەن قاتار كەزدەسۋلەر س. سەيفۋللين اتىنداعى قازاق اگروتەحنيكالىق ۋنيۆەرسيتەتىندە, ق. قۇلاجانوۆ اتىنداعى قازاق تەحنولوگيا جانە بيزنەس ۋنيۆەرسيتەتىندە جوعارى ءبىلىم بەرۋ سالاسىنىڭ قىزمەتكەرلەرىمەن ءوتتى. كەزدەسۋ بارىسىندا عىلىم مەن ءوندىرىس بايلانىسىن نىعايتۋ, ەڭبەك نارىعىنا بەيىمدەلگەن ماماندار دايارلاۋ ماسەلەلەرى تالقىلاندى.

سونداي-اق جالپىۇلتتىق كواليتسيا وكىلدەرى ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىمەن جانە جاستارىمەن دە كەزدەسۋ وتكىزىپ, جاڭا كونستيتۋتسيانىڭ جاستار ساياساتىنا, ءبىلىم بەرۋ جۇيەسىنە جانە جاس بۋىننىڭ مۇمكىندىكتەرىن كەڭەيتۋگە ىقپالى تۋرالى پىكىر الماستى.

بۇدان بولەك, مادەنيەت جانە تەاتر سالاسىنىڭ وكىلدەرىمەن كەزدەسۋ ۇيىمداستىرىلىپ, جاڭا كونستيتۋتسياداعى شىعارماشىلىق ەركىندىك, مادەنيەت قايراتكەرلەرىنىڭ قۇقىقتارى مەن قوعامداعى مادەني دامۋ باعىتى ءسوز بولدى.

كونستيتۋتسيالىق رەفورما: ەل دامۋىنىڭ جاڭا كەزەڭى

اقپاراتتىق ءىس-شارالار اياسىندا جۇمىس توبى «Mabetex Group» كومپانياسىنىڭ قىزمەتكەرلەرىمەن, «استانا الەۋمەتتىك تەحنولوگيالار» قوعامدىق بىرلەستىگىنىڭ مۇشەلەرىمەن, «نۇرلى جول» تەمىرجول ۆوكزالىنىڭ ۇجىمىمەن جانە №3 سورعى-سۇزگى ستانتسياسىنىڭ (نفس-3) قىزمەتكەرلەرىمەن كەزدەستى.

سونداي-اق №24 مامانداندىرىلعان ءورت ءسوندىرۋ بولىمىندە دە كەزدەسۋ ءوتتى. ءىس-شاراعا ءورت ءسوندىرۋ بولىمدەرىنىڭ شامامەن 100-گە جۋىق قۇتقارۋشىسى مەن قىزمەتكەرلەرى قاتىستى.

كواليتسيا وكىلدەرى قازاقستان رەسپۋبليكاسى ۇلتتىق ۇلانىنىڭ 5573 اسكەري بولىمىندە دە كەزدەسۋ وتكىزدى. مۇنداعى ءىس-شاراعا 1200-دەن استام سارباز بەن اسكەري قىزمەتشى قاتىستى.

رەفەرەندۋم-2026: داۋىس بەرۋ ۋچاسكەسىن جسن ارقىلى قالاي تابۋعا بولادى؟

كەزدەسۋلەر بارىسىندا ءسوز سويلەگەن سپيكەرلەر جۇزەگە اسىرىلىپ جاتقان رەفورما تۋرالى ايتتى.

«جاڭا كونستيتۋتسيا جوباسى 11 ءبولىم مەن 96 باپتان تۇرادى جانە مەملەكەت ادامعا قىزمەت ەتۋى ءتيىس دەگەن نەگىزگى قاعيدانى بەكىتەدى. سونىمەن قاتار پرەزيدەنت قاسىم-جومارت توقاەۆتىڭ پارلامەنتتى «قۇرىلتاي» دەپ اتاۋ باستاماسى تاريحي ساباقتاستىقتى نىعايتۋعا باعىتتالعان»,  دەدى پارلامەنت ءماجىلىسىنىڭ دەپۋتاتى داۋلەت تۇرلىحانوۆ

كۇننىڭ ەكىنشى جارتىسىندا «تۇران» گاز جىلۋ ستانتسياسىنىڭ ۇجىمىمەن كەزدەسۋ ءوتتى. وندا ەنەرگەتيكا سالاسىنىڭ ماڭىزى, وندىرىستەگى قاۋىپسىزدىك جانە الەۋمەتتىك جاۋاپكەرشىلىك ماسەلەلەرى قوزعالدى.

ودان ءارى ءىس-شارالار لەگى ەلوردانىڭ اباتتاندىرۋ جانە كوگالداندىرۋ كاسىپورىندارىنىڭ ەڭبەك ۇجىمدارىمەن – «استانا-زەلەنستروي» جانە «استانا-ورمانى», KEGOC ۇجىمىمەن, سونداي-اق «الماتى» اۋدانىنىڭ بەلسەندى ۇزاق ءومىر ءسۇرۋ ورتالىعىنداعى ەڭبەك ارداگەرلەرىمەن جۇزدەسۋمەن جالعاستى.

«جاڭا كونستيتۋتسيا جوباسىندا باستى نازار ادام كاپيتالىن دامىتۋعا باعىتتالعان. بۇل ساپالى ءبىلىم بەرۋ, كاسىبي دايىندىقتى جەتىلدىرۋ جانە ءاربىر ماماننىڭ قۇقىقتارى مەن مارتەبەسىن قورعاۋ شارالارىن قامتاماسىز ەتەدى», دەدى ماجىلىس دەپۋتاتى تاتيانا ساۆەلەۆا.

ساپار اياسىنداعى سوڭعى كەزدەسۋ بەلسەندى جاستارمەن ءوتتى. ەركىن فورماتتاعى ديالوگتا جاس بۋىننىڭ باستامالارى, ازاماتتىق بەلسەندىلىك, يننوۆاتسيالىق جوبالار جانە قوعامداعى جاستاردىڭ ءرولى تالقىلاندى.

ءماجىلىس دەپۋتاتى پاۆەل كازانتسەۆ جاڭا كونستيتۋتسيا جوباسى قازاقستاننىڭ بارلىق دەڭگەيدە قۋاتتى مەملەكەت رەتىندە قالىپتاسقان كەمەلدىگىن ايقىن كورسەتەتىنىن اتاپ ءوتتى.

اسكەري قىزمەتشىلەرگە كونستيتۋتسيالىق رەفورما تانىستىرىلدى

ءىس-شاراعا قاتىسۋشىلار جۇرگىزىلىپ جاتقان وزگەرىستەرگە قىزىعۋشىلىق تانىتىپ, كونستيتۋتسيالىق رەفورمالاردىڭ ءمانىن تولىق تۇسىنگەندەرىن جەتكىزدى.

كەزدەسۋلەر قورىتىندىسىندا جاڭا كونستيتۋتسيا جوباسى مەملەكەتتىلىكتى نىعايتۋعا, ازاماتتاردىڭ قۇقىقتارى مەن الەۋمەتتىك كەپىلدىكتەرىن كەڭەيتۋگە جانە باسقارۋ جۇيەسىنىڭ تيىمدىلىگىن ارتتىرۋعا باعىتتالعانى ايتىلدى.

ەسكە سالا كەتەيىك, «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى 12 اقپاندا قۇرىلدى. ونىڭ قۇرامىنا 5 ساياسي پارتيا مەن شامامەن 300-گە تارتا قوعامدىق ۇيىم كىردى. ولار شامامەن 5 ميلليون ادامدى بىرىكتىرەدى.