شىمكەنتتەگى «ساق» كينوستۋدياسى «الان تۋرالى اڭىز» اتتى تولىقمەترلى انيماتسيالىق ءفيلمىن كورەرمەنگە ۇسىنادى. زاماناۋي ديناميكالىق ستيلدە تۇسىرىلگەن تۋىندى حالىقارالىق اۋديتورياعا تۇسىنىكتى, شىتىرمان وقيعاعا تولى فورماتتا جاسالعان.
مادەنيەت جانە اقپارات مينيسترلىگىنىڭ تاپسىرىسىمەن تۇسىرىلگەن فيلم جەلىسىندە الان ەسىمدى اق بارىستىڭ باستان كەشكەن شىتىرمان وقيعالارى باياندالادى. كەيىپكەردىڭ ەرلىگى مەن قايسارلىعى تۋعان جەرگە دەگەن سۇيىسپەنشىلىگى ارقىلى ۇلتتىق قۇندىلىقتار كەڭىنەن ناسيحاتتالادى. ءفيلمنىڭ رەجيسسەرى – ازامات ەرنازاروۆ. ستسەناريىن باقىتجان قۇلجاباەۆ, باتىرحان داۋرەنبەكوۆ, ازامات ەرنازاروۆ جازعان. «بارىس – الماتىنىڭ ءرامىزى. وقيعادا الان ەسىمدى اق بارىس ءوزىنىڭ تۋعان قالاسىن قورعاپ, ەرلىك كورسەتەدى. الاننىڭ دوستارى تۋرالى دا كورسەتەمىز», دەيدى باتىرحان داۋرەنبەكوۆ.
ءفيلمنىڭ رەجيسسەرى ازامات ەرنازاروۆتىڭ ايتۋىنشا, وقيعا ديناميكاسى, تارتىستى ساتتەر مەن اسەرلى كورىنىستەر جاس كورەرمەندى عانا ەمەس, ەرەسەكتەردى دە بەيجاي قالدىرمايدى. تۋىندى ۇلتتىق رۋحتى, تاريحي-مادەني ەلەمەنتتەردى زاماناۋي 3D انيماتسيامەن ۇيلەستىرە وتىرىپ, قازاقى بولمىستى جاڭا فورماتتا تانىتۋدى ماقسات ەتەدى. «بۇل فيلم الەمدىك دەڭگەيدە جاسالعان. تۋىندىنى جاساۋعا ەكى جىل ۋاقىت كەتتى. جوبا وتاندىق انيماتسيا يندۋسترياسىنىڭ دامۋىنا سەرپىن بەرىپ, ۇلتتىق مازمۇنداعى ساپالى دۇنيەلەردىڭ كوبەيۋىنە ىقپال ەتەدى, كورەرمەنگە ساپالى دۇنيە ۇسىنامىز دەپ ويلايمىن», دەيدى «ساق» كينوستۋدياسىنىڭ ديرەكتورى نۋريددين پاتتەەۆ. كورسەتىلىم جۋىق ارادا ەلىمىزدىڭ بارلىق كينوتەاترلارىندا كورسەتىلەدى. سونداي-اق تاعىلىمى تەرەڭ تۋىندى الداعى ۋاقىتتا شەتەلدىك اۋديتورياعا دا جول تارتادى. ياعني انيماتسيالىق ءفيلمدى تۇركيا ەلىندە كورسەتۋ جوسپارلانىپ وتىر.