ەرلان قارين: كونستيتۋتسيالىق وزگەرىستەر حالىق مۇددەسىنە قىزمەت ەتەدى

اباي وبلىسىندا مەملەكەتتىك كەڭەسشى ەرلان قارين مەن «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى مۇشەلەرىنىڭ ءوڭىر جۇرتشىلىعىمەن كەزدەسۋى ءوتتى.

ساپاردىڭ باستى شاراسى اباي اتىنداعى وبلىستىق كىتاپحانادا ايماق بەلسەندىلەرىمەن وتكەن كەزدەسۋ بولدى. جيىنعا 500-گە جۋىق ادام جينالدى. تالقىلاۋعا ءماسليحات دەپۋتاتتارى, قوعامدىق كەڭەس مۇشەلەرى, ساياسي پارتيالار, قازاقستان حالقى اسسامبلەياسى, ارداگەرلەر ۇيىمدارى, بيزنەس, ءبىلىم بەرۋ, دەنساۋلىق ساقتاۋ, سپورت, عىلىم سالالارىنىڭ وكىلدەرى جانە جاستار قاۋىمداستىعى قاتىستى.

ديالوگتىڭ نەگىزگى تاقىرىبى – جاڭا كونستيتۋتسيا جوباسى مەن الداعى 15 ناۋرىزدا وتەتىن رەسپۋبليكالىق رەفەرەندۋم. مەملەكەتتىك كەڭەسشى ەرلان قارين قۇجاتتى دايىنداۋ بارىسىنداعى نەگىزگى پرينتسيپتەرگە ەگجەي-تەگجەيلى توقتالدى. ول بۇل جۇمىستىڭ اشىق جۇرگىزىلگەنىن جانە قوعامنىڭ كەڭىنەن اتسالىسقانىن, ال ازاماتتاردىڭ ۇسىنىستارى e-Otinish جانە eGov تسيفرلىق پلاتفورمالارى ارقىلى قابىلدانعانىن اتاپ ءوتتى.

ونىڭ ايتۋىنشا, ۇسىنىلىپ وتىرعان وزگەرىستەر مەملەكەتتىك باسقارۋ جۇيەسىنىڭ ورنىقتىلىعىن نىعايتۋعا, بيلىك ينستيتۋتتارىنىڭ وكىلەتتىكتەرى مەن جاۋاپكەرشىلىگى اراسىنداعى تەڭگەرىمدى كۇشەيتۋگە, سونداي-اق ەلدىڭ ستراتەگيالىق باسىمدىقتارى رەتىندە ادام كاپيتالىن, ءبىلىمدى, عىلىم مەن يننوۆاتسيانى دامىتۋعا باعىتتالعان.

ەرلان قارين جاڭا كونستيتۋتسيا تەك قۇقىقتىق قۇجات قانا ەمەس, سونىمەن بىرگە قوعامنىڭ قۇندىلىقتارىن ايقىندايتىن جانە مەملەكەتتىك ساياساتتىڭ «ادامعا باعدارلانۋ» ءپرينتسيپىن بەكىتەتىن زاماناۋي قوعامدىق كەلىسىم ەكەنىن اتاپ ءوتتى. 

«جاڭا كونستيتۋتسيادا كەز-كەلگەن ساناتتاعى, كەز-كەلگەن الەۋمەتتىك جانە كاسىبي توپتا, كەز-كەلگەن جاستاعى ادام ءوز مۇددەلەرى قامتىلعانىن كورە الادى. بۇل نە دەگەن ءسوز؟ بۇل ءاربىر ازامات ءوز قۇقىقتارىن قورعاۋدا سەنىمدى كونستيتۋتسيالىق كەپىلدىكتەرگە يە بولدى دەپ ايتۋعا بولادى. جاڭا كونستيتۋتسياعا سايكەس بارلىق ازاماتتار جاسىنا, الەۋمەتتىك جانە وزگە دە جاعدايىنا قاراماستان ەڭبەك ەتۋ جانە دەمالۋ قۇقىعىنا, ءبىلىم الۋعا جانە دەنساۋلىعىن ساقتاۋعا, ءسوز بوستاندىعى مەن بەيبىت جيىندار وتكىزۋگە, جەكە دەرەكتەرىن قورعاۋعا قولايلى قورشاعان ورتاعا يە بولا الادى», دەدى مەملەكەتتىك كەڭەسشى. 

ساپار اياسىندا مەملەكەتتىك كەڭەسشى اباي وبلىسىنىڭ شىعارماشىلىق زيالى قاۋىم وكىلدەرىمەن دە كەزدەستى. مۇندا مادەنيەتتى دامىتۋ, تاريحي جادىنى ساقتاۋ جانە ۇلتتىق بىرەگەيلىكتى نىعايتۋ ماسەلەلەرى نازارعا الىندى. قاتىسۋشىلار مەملەكەت قىزمەتىنىڭ قاعيداتتارى تىزبەسىنە تاريحي-مادەني مۇرانى ساقتاۋ جانە ۇلتتىق مادەنيەتتى قولداۋ تۋرالى تارماقتىڭ ەنگىزىلۋىنە قولداۋ ءبىلدىردى.

رەفەرەندۋم كەزىندە شالعايدا جۇرگەن ازاماتتار قالاي داۋىس بەرەدى؟

بۇدان بولەك, جالپىۇلتتىق كواليتسيا مۇشەلەرى بەلسەندى جاستارمەن, قوعامدىق بىرلەستىكتەرمەن جانە وڭىردەگى ءتۇرلى سالا وكىلدەرىمەن جەكە كەزدەسۋلەر وتكىزىپ, جاڭا كونستيتۋتسيا جوباسىنىڭ نەگىزگى ەرەجەلەرى مەن ونىڭ ەل دامۋىنداعى ماڭىزىن تالقىلادى. ەستەرىڭىزگە سالا كەتەيىك, قازاقستان رەسپۋبليكاسىنىڭ جاڭا كونستيتۋتسياسىنىڭ جوباسى بويىنشا رەسپۋبليكالىق رەفەرەندۋم 2026 جىلعى 15 ناۋرىزدا وتەدى.

كونستيتۋتسيا كۇنى 15 ناۋرىزدا اتالىپ ءوتۋى مۇمكىن