سەناتتا پالاتا سپيكەرى ماۋلەن اشىمباەۆتىڭ توراعالىعىمەن ماسليحاتتارمەن ءوزارا ءىس-قيمىل جونىندەگى كەڭەستىڭ كەزەكتى وتىرىسى ءوتتى. «جاڭا كونستيتۋتسيا – ۇزاقمەرزىمدى دامۋدىڭ بەرىك نەگىزى» تاقىرىبىنا ارنالعان ءىس-شارادا ادام قۇقىقتارى مەن بوستاندىقتارىن قورعاۋ, زاڭ ۇستەمدىگىن نىعايتۋعا قاتىستى زاڭنامانى جەتىلدىرۋ ماقساتىندا جۇرگىزىلىپ جاتقان كونستيتۋتسيالىق رەفورمانىڭ ماڭىزى تالقىلاندى.
م.اشىمباەۆ قاتىسۋشىلارعا ءىلتيپات ءبىلدىرىپ, كونستيتۋتسيالىق رەفورما ەل دامۋىنداعى شەشۋشى كەزەڭ ەكەنىن تىلگە تيەك ەتتى. جاڭا اتا زاڭ جوباسى ادىلەتتى قازاقستان يدەياسىن تولىق ىسكە اسىرۋعا ىقپال ەتىپ, ساياسي جۇيەنى دەموكراتيالاندىرۋ مەن جاڭعىرتۋدىڭ قۇقىقتىق نەگىزىن ايقىندايتىنى دا ايتىلدى.
«پرەزيدەنت قاسىم-جومارت توقاەۆتىڭ باستاماسىمەن بارلىق سالادا اسا ماڭىزدى رەفورمالار جۇيەلى تۇردە جۇزەگە اسىرىلىپ كەلەدى. قازىر جۇرگىزىلىپ جاتقان كونستيتۋتسيالىق وزگەرىستەر سول ىرگەلى ءىستىڭ جۇيەلى ءارى دايەكتى جالعاسى ەكەنى انىق. مەملەكەت باسشىسىنىڭ جارلىعىمەن 15 ناۋرىزدا جاڭا كونستيتۋتسياعا بايلانىستى رەسپۋبليكالىق رەفەرەندۋم وتەدى. بۇل – ەلدىڭ ساياسي جۇيەسىن دەموكراتيالاندىرۋ جولىنداعى تاريحي كەزەڭ. اتا زاڭ, ەڭ الدىمەن, مەملەكەتتىلىك پەن تاۋەلسىزدىكتى نىعايتۋمەن قاتار ازاماتتاردىڭ ءال-اۋقاتىن ارتتىرۋعا باعىتتالعان. سوندىقتان جاڭا كونستيتۋتسيا جوباسى زاڭ مەن ءتارتىپ قاعيداتتارىنا, ازاماتتاردىڭ مۇددەلەرى مەن قۇقىقتارىنا تابان تىرەيدى», دەدى سەنات توراعاسى.
پالاتا سپيكەرى جاڭا كونستيتۋتسيانىڭ پرەامبۋلاسىنا توقتالىپ, مۇندا ادامنىڭ قۇقىقتارى مەن بوستاندىقتارى العاش رەت مەملەكەتتىڭ نەگىزگى باسىمدىعى رەتىندە بەكىتىلگەنىن اتاپ ءوتتى. سونداي-اق ول ادام كاپيتالى, ءبىلىم, عىلىم, يننوۆاتسيانى دامىتۋعا باعىتتالعان ەرەجەلەرگە ەرەكشە توقتالدى.
سونىمەن قاتار سەنات توراعاسى كونستيتۋتسيالىق رەفورما ساياسي جۇيە ەۆوليۋتسياسىنىڭ تابيعي جالعاسى, ساراپشىلار مەن ازاماتتىق قوعامداستىق وكىلدەرىنىڭ ۇزاقمەرزىمدى بىرلەسكەن جۇمىسىنىڭ ناتيجەسى ەكەنىن ايتتى.
«جاڭا كونستيتۋتسيا – ادىلەتتى قازاقستاننىڭ كونستيتۋتسيالىق مودەلىنىڭ, جالپى ەلدىڭ ورنىقتى دامۋىنىڭ قۇقىقتىق نەگىزىن قالايتىن تاريحي قۇجات. وسىعان بايلانىستى بيلىك تارماقتارىنىڭ تيىمدىلىگىنە نەگىزدەلگەن زاماناۋي مەملەكەتتىك باسقارۋ جۇيەسىن قۇرۋ كوزدەلىپ وتىر. اتا زاڭنىڭ نورمالارىنا سايكەس قۇرىلتايدىڭ وكىلدى ءرولى ارتىپ, جاڭا ساياسي ينستيتۋتتار قۇرىلادى. وڭىرلەردىڭ جانە بارلىق الەۋمەتتىك توپتىڭ وكىلدىگىن قامتاماسىز ەتۋ ءۇشىن جوعارى كونسۋلتاتيۆتىك ورگان رەتىندە حالىق كەڭەسى قالىپتاساتىنى بەلگىلى. مەملەكەتتىك بيلىك ورگاندارىنىڭ كونستيتۋتسيالىق مارتەبەسى, قۇزىرەتى مەن مىندەتتەرى دە ايقىندالىپ وتىر», دەي كەلە م.اشىمباەۆ ءماسليحات دەپۋتاتتارىن مەملەكەت باسشىسى بەلگىلەپ بەرگەن مىندەتتەردى ىسكە اسىرۋ جولىندا جۇدىرىقتاي جۇمىلۋعا شاقىردى.
كەڭەسكە قاتىسۋشىلار قازىرگى وزگەرىستەرگە, ونىڭ ىشىندە بيلىك جۇيەسىن ترانسفورماتسيالاۋعا قاتىستى دا پىكىر ءبىلدىردى. سونداي-اق قۇرىلتاي, حالىق كەڭەسى, تاعى باسقا دا جاڭا ساياسي ينستيتۋتتار, ولاردىڭ قالىپتاسۋى, مىندەتتەرى, قۇزىرەتتەرى مەن قىزمەتى ءسوز بولدى. كونستيتۋتسيالىق رەفورما پارلامەنت پەن ءماسليحات دەپۋتاتتارى, قوعام قايراتكەرلەرى, ءتۇرلى سالاداعى ساراپشىلار مەن ماماندار, سونداي-اق ەل ەرتەڭىنە بەيجاي قارامايتىن بەلسەندى ازاماتتار قاتىسقان كەشەندى ءارى جۇيەلى جۇمىستىڭ ناتيجەسى ەكەنىن ايتتى قاتىسۋشىلار.
وتىرىسقا سەناتورلارمەن بىرگە وبلىستىق, قالالىق ءماسليحاتتاردىڭ دەپۋتاتتارى مەن قوعامدىق ۇيىمداردىڭ وكىلدەرى قاتىستى.