«Almaty Theatre» ساحناسىندا وتكەن كۇيشى ابىلاي تىلەپبەرگەننىڭ «سەرپىن» اتتى شىعارماشىلىق كەشى ۇلتتىق ونەردىڭ رۋحىن اسقاقتاتقان ايرىقشا مادەني وقيعاعا اينالدى. قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ۇيىمداستىرۋمەن وتكەن دومبىرا دۋمانىنا قازاقستاننىڭ حالىق ءارتىسى ديماش قۇدايبەرگەن قاتىسىپ, كەش يەسىمەن ءبىر ساحنادا ونەر كورسەتتى.
ايتۋلى كونتسەرت – «دارىن» مەملەكەتتىك جاستار سىيلىعىنىڭ لاۋرەاتى, تالانتتى ديريجەر ءارى كۇيشى, وركەستردىڭ باس ديريجەرى ابىلاي تىلەپبەرگەننىڭ شىعارماشىلىق جولىنداعى ماڭىزدى بەلەس بولدى. «سەرپىن» اتاۋىنىڭ ءوزى كونتسەرت مازمۇنىن ايقىنداپ, ۇلتتىق مۋزىكاعا جاڭا تىنىس, جاڭا سەرپىن بەرۋ يدەياسىن اڭعارتتى.
كەش باعدارلاماسىندا قازاق كۇي ونەرىنىڭ قوس الىبى – قۇرمانعازىنىڭ توكپە كۇيلەرى مەن تاتتىمبەتتىڭ شەرتپە ءداستۇرى جاڭاشا ينتەرپرەتاتسيادا ۇسىنىلدى. ءداستۇر مەن زاماناۋي كوزقاراستى شەبەر ۇشتاستىرعان ديريجەرلىك شەشىمدەر, وركەسترلىك بوياۋدىڭ باي پاليتراسى, ديناميكالىق ورنەكتەر مەن نازىك ليريكالىق يىرىمدەر كورەرمەندى تەرەڭ اسەرگە بولەدى. اسىرەسە ابىلاي تىلەپبەرگەننىڭ جەكە ورىنداۋىنداعى كۇيلەر زال ءىشىن ەرەكشە تەبىرەنىسكە بولەپ, دومبىرا ءۇنىنىڭ شىنايى قۋاتىن ايقىن سەزىندىردى.
كونتسەرتتىڭ شارىقتاۋ شەگى – قازاقستاننىڭ حالىق ءارتىسى, الەمگە تانىمال ءانشى ديماش قۇدايبەرگەننىڭ ساحناعا شىعۋى بولدى. ولار ءبىر ساحنادا ونەر كورسەتىپ, جان تەبىرەنتەر كۇيلەردى بىرگە ورىندادى. كەشكە سونداي-اق قازاقستاننىڭ ەڭبەك سىڭىرگەن قايراتكەرى, كومپوزيتور رەنات عايسين, اباي اتىنداعى قازاق ۇلتتىق وپەرا جانە بالەت تەاترىنىڭ سوليستەرى, مەملەكەتتىك «سالتانات» بي ءانسامبلىنىڭ ارتىستەرى مەن دومبىراشىلار توبى قاتىسىپ, ۇلتتىق ونەر دۋمانىنىڭ مازمۇنىن بايىتا ءتۇستى. ءاربىر ونەرپازدىڭ ساحناداعى شەبەرلىگى مەن شىعارماشىلىق ىزدەنىسى كەشتىڭ كوركەمدىك دەڭگەيىن ارتتىردى.
«سەرپىن» – تەك جەكە كونتسەرت قانا ەمەس, قازاق مۋزىكا ونەرىنىڭ وتكەنى مەن بۇگىنى اراسىنداعى التىن كوپىر ىسپەتتى رۋحاني كەش بولدى. سونداي-اق ۇلتتىق مۇرانى جاڭعىرتۋ مەن ونى زاماناۋي فورماتتا دامىتۋ جولىنداعى تىڭ ىزدەنىستەردىڭ جارقىن كورىنىسىنە اينالدى.