وزىق وقىرماندار ماراپاتتالدى

وسىمەن ءتورتىنشى رەت وتكەن وبلىستىق باي­قاۋدا جاس مولشە­رىنە قاراي ءۇش ساناتقا بولىنگەن وقىرماندار قازاق جانە ورىس تىلىندە باس-اياعى 18 كىتاپ وقىپ شىقتى. ءار كىتاپتى وقىپ بىتىرگەن سوڭ, سول كوركەم شىعارمانىڭ مازمۇنىنا قۇرىلعان ونلاين-تەست تاپسىرىپ وتىردى. ءۇش كەزەڭنەن جوعارى ۇپاي جيناعان وقىرماندار ءتورتىنشى كەزەڭگە ىرىكتەلىپ الىندى.

ماسەلەن, قازاقتىلدى وقىر­ماندار اراسىنان 10–14 جاس ارالى­عىنداعى بالالار باۋىرجان مومىش­ ۇلىنىڭ «ۇشقان ۇيا», رۇستەم ساۋىت­بايدىڭ «شوكو الەم», نۇر دومباي­جىنىڭ «قاباعى تۇنجىر بالاقاي» شىعار­مالارىن, 15-18 جاس ارالىعىنداعى جاسوسپىرىمدەر ورالحان بوكەيدىڭ «اتاۋ كەرەسىن», سپانديار كوبەەۆ­تىڭ «ورىندالعان ارمان» مەمۋارلىق رومانىن, يۆان تۋرگەنەۆتىڭ «اكەلەر مەن بالالار» رومانىن, ال جاسى 19-دان جوعارى ەرەسەك وقىرماندار ءسابيت مۇقانوۆتىڭ «اققان جۇلدىز», تولەن ابدىكتىڭ ء«ولىارا», كريستين حاننانىڭ «بۇلبۇل» روماندارىن وقىپ شىقتى.

بايقاۋعا قاتىسۋشىلاردىڭ ىشىندە وقۋشىلار, ستۋدەنتتەر, سان الۋان سالانىڭ وكىلدەرى – جۇمىسشىلار, دارىگەرلەر, مۇعالىمدەر, مەملەكەتتىك قىزمەت­شىلەر, كاسىپكەرلەر, زەينەتكەرلەر بار. العاشقى ءۇش كەزەڭنەن سۇرىنبەي وتكەن 122 وقىرمان ل.تولستوي اتىنداعى وبلىستىق عىلىمي-امبەباپ كىتاپحاناسىندا وزدەرى وقىعان ءۇش كىتاپتان العان اسەرلەرىن قاعازعا ءتۇسىرىپ, ەسسە جازدى.

سالتاناتتى جيىندا وبلىس­تىق مادەنيەت باسقارماسى باسشى­سىنىڭ ورىنباسارى سايات ءجۇسى­پوۆ كوپشىلىكتى وقىرماندار مارا­فونىنىڭ مارەگە جەتۋىمەن قۇتتىقتاپ, جەڭىمپازداردى ماراپاتتادى.

«وزدەرىڭىزگە بەلگىلى, پرەزيدەنت قاسىم-جومارت توقاەۆ كىتاپ وقي­تىن وزىق ون ەلدىڭ قاتارىنا ەنۋ كەرەك دەگەن تالاپ قويىپ وتىر. بايقاعانىمىز, وقىرمانداردىڭ كوبى وسى بايقاۋ باستالعالى جىل سايىن قالماي تۇراقتى تۇردە قاتىسىپ كەلە جاتىر. بۇل وڭىردە كىتاپ وقۋدى ءومىر سالتىنا اينالدىرعان ۇلكەن وقىرمان قاۋىم قالىپتاسقانىن كورسەتەدى. سونىمەن قاتار بيىل بايقاۋعا قاتىسقانداردىڭ ىشىندە مەكتەپ وقۋشىلارىنىڭ كوپتىگى ءبىزدى ەرەكشە قۋانتادى», دەدى س.ءجۇسىپوۆ.

بايقاۋدا ەڭ جوعارى ۇپاي جيناپ, قالىڭ وقىرماننان قارا ءۇزىپ شىققان 6 جەڭىمپازدىڭ ارقايسىسى ءبىرىنشى دارەجەلى ديپلومدار مەن 150 مىڭ تەڭگە كولەمىندە اقشالاي سىيلىققا يە بولدى. ەكىنشى ورىن العان 12 ادام 100 مىڭ تەڭگەدەن, ءۇشىنشى ورىن العان 18 وقىرمان 75 مىڭ تەڭگەدەن اقشالاي سىيلىق الدى. بۇدان تىس, بايقاۋدىڭ ىرىكتەۋ كەزەڭىنە وتكەن تاعى 18 وقىرمانعا 25 مىڭ تەڭگەدەن اقشالاي سەرتيفيكات تابىس ەتىلدى.

ەرەسەك وقىرماندار قاتارىنان قوستاناي قالاسىنىڭ تۇرعىنى, ۇستاز شىنار تولەگەنوۆا وزا شاۋىپ, ءبىرىنشى ورىندى جەڭىپ الدى.

«كىتاپ – ادامزات قۇندى­لىعىنىڭ ەڭ بيىگى. بۇگىندە ەلىمىزدە ۇلت بولا­شاعى ءۇشىن پايداسى زور ءتۇرلى جوبالاردىڭ ىسكە اسۋى ۇلكەن قۋان­تارلىق جايت. سونىڭ ءبىرى دە, بىرەگەيى – «وقى جانە جەڭ» بايقاۋى. اتالعان بايقاۋ ارقىلى شاكىرتتەرىمنىڭ ءار بۇرىشتا كىتاپ وقىپ, كىتاپحانادان كىتاپ ىزدەپ جۇرگەنى مەن ءۇشىن زور قۋانىش. تەلەفونعا تەلمىرگەن زاماندا مۇنداي كورىنىستى كورۋدىڭ ءوزى, شىنتۋايتىنا كەلگەندە, زور باقىت ەكەن. ءوزىم وقىعان ءۇش كىتاپتان ءۇش ءتۇرلى اسەر الدىم, ءۇش ءتۇرلى كۇي كەشتىم. «اققان جۇلدىز» رومانىن وقي وتىرىپ, تاريح قويناۋىنا ءبىر سۇڭگىپ, شوقانداي ۇلى تۇلعانىڭ ءومىر جولىنداعى وقيعالاردى كوز الدىمنان وتكىزدىم. ء«ولىارا» رومانىندا ار الدىنداعى ادامنىڭ شىنايى بەت-بەينەسى كوڭىلىمدى تولقىتتى. سول ءولىارا شاقتاعىداي مەن دە الاساپىران كۇيگە ءتۇستىم. ال «بۇلبۇل» رومانىن وقي وتىرىپ, كوزىمنەن تولاسسىز جاس اققانىن جاسىرمايمىن. رومان جانىمدى ءتىلىپ ءوتتى دەسەم, ارتىق بولمايدى», دەيدى جەڭىمپاز.

جىلىنا ەكى مارتە وتەتىن بايقاۋدى ل.تولستوي اتىنداعى وبلىس­تىق كىتاپحانا ۇجىمى باستان-اياق ۇيىمداستىرىپ, وزدەرىنە جۇك­تەلگەن مىندەتتى ابىرويمەن اتقارىپ كەلەدى.

«جوبانىڭ اۋقىمى جىلدان-جىلعا كەڭەيىپ كەلەدى. بايقاۋ ونلاين تۇردە ءوتتى. بۇل شالعاي ەلدى مەكەندەردىڭ تۇرعىندارىنا قولايلى بولىپ وتىر. بيىل, اسىرەسە جانگەلدين, قاراسۋ, ۇزىنكول, اۋليەكول, قارابالىق, جىتىقارا, بەيىمبەت مايلين اۋداندارىنان كوپ وقىرمان قاتىستى. وسى بايقاۋدىڭ ناتيجەسىندە وڭىردە كىتاپ وقيتىن تۇرعىنداردىڭ كوبەيگەنى بايقالىپ وتىر», دەيدى وبلىستىق كىتاپحانانىڭ باسشىسى ءسانيا سەرىكقىزى.

قوستاناي وبلىسى