ماڭعىستاۋدا جاڭا كونستيتۋتسياسىنىڭ نەگىزگى تۇجىرىمدارىن ءتۇسىندىرۋ ماقساتىندا «كاسپي جىلۋ, سۋ ارناسى» مەكەمەسىنىڭ ۇجىمىمەن كەزدەسۋ ءوتتى, دەپ حابارلايدى Egemen.kz.
جيىنعا اقپاراتتىق-ءتۇسىندىرۋ توبىنىڭ مۇشەلەرى – «ماڭعىستاۋ جەرگىلىكتى باستاما ورتالىعى» قوعامدىق قورىنىڭ ديرەكتورى جاقسىگۇل ماحانبەت جانە قازاقستان رەسپۋبليكاسىنداعى ادام قۇقىقتارى جونىندەگى ۋاكىلدىڭ ماڭعىستاۋ وبلىسى بويىنشا وكىلى اسلان كۋجيەۆ قاتىستى.
ساراپشى: اتا زاڭ اسىعىس جازىلعان جوق
كەزدەسۋ بارىسىندا جاڭا كونستيتۋتسيانىڭ نەگىزگى باعىتتارى, «مەملەكەت – ادام ءۇشىن» قاعيداتى جانە ادام قۇقىعى, بوستاندىعى مەن ءومىرىن باستى قۇندىلىق رەتىندە ايقىندايتىن 1-باپ ءماتىنى جان-جاقتى تالقىلاندى. سونداي-اق قۇجاتتىڭ باستى يدەيالارى – ءبىلىم, عىلىم, مادەنيەت پەن يننوۆاتسيانى دامىتۋ, تابيعاتتى قورعاۋ جانە تسيفرلاندىرۋ باعىتتارىنىڭ ماڭىزى ءتۇسىندىرىلدى. سونىمەن قاتار جيىندا مەملەكەت باسشىسىنىڭ جارلىعىنا سايكەس رەفەرەندۋم 15 ناۋرىزدا وتەتىنى, ءار ازامات رەفەرەندۋمعا قاتىسىپ, داۋىس بەرۋگە قۇقىلى ەكەنى اتالىپ ءوتتى.
ەرلان قارين اتا زاڭنىڭ باستى ەرەكشەلىگىن اتادى
ادام قۇقىقتارى جونىندەگى ۋاكىلدىڭ ماڭعىستاۋ وبلىسى بويىنشا وكىلى اسلان كۋجيەۆ جاڭا كونستيتۋتسيانى قابىلداۋ ۇدەرىسىنىڭ اشىق ءارى قوعامدىق قاتىسۋ ارقىلى جۇزەگە اساتىنىن ايتتى.
«جاڭا كونستيتۋتسيانى قابىلداۋ ۇدەرىسىنە قوعام بەلسەندى تۇردە قاتىسىپ وتىر. اتاپ ايتقاندا, ۇكىمەتتىك ەمەس ۇيىمدار, مەملەكەتتىك ورگاندار جانە قاراپايىم ازاماتتار ءوز ۇسىنىستارىن ءبىلدىرىپ, پىكىرلەرىن ورتاعا سالدى. وتكەن جىلى مەملەكەت باسشىسى ۇلتتىق قۇرىلتايدا حالىققا ۇندەۋ جاساپ, ساياسي جانە پارلامەنتتىك رەفورمالاردى جۇزەگە اسىرۋ قاجەتتىگىن اتاپ وتكەن بولاتىن. وسىعان سايكەس ارنايى جۇمىس توبى قۇرىلىپ, رەفورمالاردى ازىرلەۋ جۇمىستارى جۇرگىزىلدى. كونستيتۋتسيالىق كوميسسيا وتىرىستارى اشىق فورماتتا ءوتىپ, ازاماتتاردىڭ جولداعان ۇسىنىستارى مەن پىكىرلەرى تىڭدالدى. ناتيجەسىندە مەملەكەت باسشىسى ءتيىستى جارلىققا قول قويدى. وسى جىلدىڭ 15 ناۋرىزىندا رەفەرەندۋم وتكىزۋ جوسپارلانعان. رەفەرەندۋم بارىسىندا جاڭا كونستيتۋتسيانى قابىلداۋ ماسەلەسى حالىقتىڭ تالقىلاۋىنا ۇسىنىلادى. وسىعان بايلانىستى ءبىز ءتۇسىندىرۋ ماقساتىندا ەڭبەك ۇجىمدارىمەن كەزدەسۋلەر وتكىزىپ, جاڭا كونستيتۋتسيا نورمالارىن جان-جاقتى ءتۇسىندىرۋ جۇمىستارىن جۇرگىزەمىز, دەدى اسلان كۋجيەۆ.